मेरियटमा माधव नेपालका पाेज र किस्साहरू, व्यापारीसँग बसे, पत्रकारबाट छड्किए

मेरियटमा माधव नेपालका पाेज र किस्साहरू, व्यापारीसँग बसे, पत्रकारबाट छड्किए

A+ A A-

आफूले 'नेकपाबाट हटाएका' एमाले अध्यक्ष केपी ओली भेट्न दाेस्राे दिन नक्सालस्थित मेरियट हाेटल पुग्दा माधव नेपाल हिजाे बुधबारभन्दा प्रसन्न देखिन्थे ।

ओली पनि आफूले कारबाही गरेका नेता नेपाल भेट्न दाेस्राेपल्ट मेरियट आउँदै थिए । उनीहरू दुवैजना काेठा नं ९०१ पुगेर सुस्ताए । निर्माण सम्पन्न धरहरा हेरे । एकअर्कासँग खनिए । अनि 'फेरि भेट्ने' भन्दै छुटे ।

राेचक के भने ओली भेट्न जानुअघि माधव र उनी पक्षका सांसदहरू ओलीसमक्ष दाेस्राे किस्ताकाे स्पष्टीकरण बुझाउँदै थिए ।

कुराे मिल्ने भाे त ?

माधवले दायाँ हातकाे चाेर औंला दुईपल्ट हल्लाउँदै भने 'नाे ।'

स्वकीय सचिव राजेश वज्राचार्यसँग निक्लेका ओली शब्दै नझारी गाडीमा बालुवाटार हुइँकिए । पत्रकारहरू माधव नेपालकाे प्रतीक्षामा थिए । उनी भने भित्र माेती दुगड, राजेन्द्र बजगाईंसँग एकछिन लबीकाे टेबुलमा बसे । एकछिन कुराकानी गरे । अनि शिलापत्रसँग भलाकुसारी गरे ।

'कुराकानी त भएकाे छ, तर सहमतिमा पुग्नेगरी कुनै छलफल भएकाे छैन, हेराैँ फेरि पनि छलफलमा बस्न सकिन्छ,' नेपालले भने ।

उनका अनुसार, प्रधानमन्त्री ओलीले पार्टी एकता बचाउने गरी कुनै ठाेस प्रस्ताव गरेका छैनन् । केवल विगतका दिनहरूमा गरेका असहयाेगहरूबारे गुनासाका पाेकाहरू फुकाएका छन् । उनले महाधिवेशन आयाेजक कमिटी भंग गर्ने निर्णय पुनर्विचार गर्ने संकेत देखाएका छैनन् ।

माधव पक्षका नेता भीम रावलले सहमतिका लागि छलफल हुनु सकारात्मक रहे पनि मेरियटकाे कुराकानीले उत्साह जगाउनुपर्ने गरी प्रगति नगरेकाे बताए ।

'एकताबाट अध्यक्ष ओली भाग्नुभएकाे छ, फरक मतलाई उहाँले अनुशासनकाे नाममा डण्डा चलाउनुभएकाे छ,' रावलले शिलापत्रसँग भने, 'उहाँ विगतकाे निर्वाचित एमालेकाे पक्षमा नफर्किँदासम्म, अनि हामीमाथि अन्यायपूर्ण ढंगले गरिएकाे कथित् अनुशासनकाे कारबाही फिर्ता नलिँदासम्म सहमतिकाे सम्भावना छैन ।'

आजै मात्र ओलीलाई स्पष्टीकरणकाे नाममा कडा जवाफ पठाएका माधव पक्षका अर्का नेता सुरेन्द्र पाण्डेले पार्टी एकता बचाउने तत्परता र गम्भीरता ओलीमा नदेखिएकाले सहमति कठिन रहेकाे बताए । ओलीसँग वार्तामा नेपाल एक्लै बसेका थिए ।

भेटकाे चाँजाे मिलाएका व्यापारी तथा सांसद माेती दुगडले वार्तामा एकैपल्ट नतिजा आउन गाह्रो भएकैले फेरि पनि आफूले नेताहरूलाई छलफलमा बस्न वातावरण मिलाउने बताए ।

वार्ता सकिएपछि हामीले माधव नेपाललाई तस्वीरका लागि अनुराेध गर्‍यौँ । केही तस्वीर खिचिसक्दा उनले झट्ट सम्झे । अनि मास्क खाेल्दै किसिमकिसिमका पाेज दिए ।

हामीले कम्प्लिमेन्ट दिँदै भन्याैँ, 'तपाईं फाेटाे कन्सस् हुनुहुन्छ भन्ने हामीलाई थाहा छ ।'

उनी फिस्स हाँस्दै लबीबाट भित्र छिरे । त्याे मुस्कानमा अघि ओलीसँग वार्तामा छिर्दा बेलाजस्ताे उल्लास थिएन ।

प्रकाशित मिति: बिहीबार, वैशाख ९, २०७८ १७:२८