मध्यपहाडी लोकमार्गः रोकियो म्याङलुङ–खुरुंगा खोला सडक निर्माण कार्य

A+ A A-

मध्यपहाडी लोकमार्गअन्तर्गत तेह्रथुमको म्याङलुङ खुरुङ्गा खोला सडकको निर्माण कार्य यो वर्ष पनि नसकिने भएको छ ।

म्याङलुङदेखि खुरुंगा खोलासम्मको ९ दशमलव ७ किलोमिटर कालोपत्रे सडकको निर्माण कार्य यसै आर्थिक वर्षमा सम्पन्न हुनुपर्ने थियो । तर, केही दिनयता अविरल वर्षा भएकाले निर्माण कार्य रोकिएको छ ।

२०६३ सालमा २९ करोड रुपैयाँमा हिमडुङ एन्ड ठोकर/आश्रय निर्माण सेवा जेभीले यो सडक निर्माणको जिम्मा पाएको थियो । कम्पनीका सहायक सुपरभाइजर उदय कार्कीका अनुसार चालू आवमै सडक निर्माणको काम सकेर सरकारलाई हस्तान्तरण गर्ने तयारी गरिए पनि वर्षाका कारण नसकिएको हो ।

पक्की नाला, विभिन्न स्थानमा कल्भर्ट निर्माणसहित बनिरहेको सडकमा आगामी दसैंअगाडि कालोपत्रे गरिने सहायक सुपरभाइजर कार्कीले बताए ।

‘यसै वर्ष सक्ने हाम्रो योजना थियो,’ उनले भने, ‘तर, निरन्तर पानी परेर काम गर्न समस्या भएको छ । यसले गर्दा काम गर्न गाह्रो भएको हो ।’

सदरमुकाम म्याङलुङ बजारदेखि खुरुंगा खोलासम्मको सडकको आधारभूत काम सकिएको छ । सो सडकको आधारभूत संरचना निर्माणको काम ९५ प्रतिशत सकिएको र सडक निर्माणको ६५ प्रतिशत बढी काम सम्पन्न भएको सहायक सुपरभाइजर कार्कीले जानकारी दिए ।

‘बेस र सबबेसको काम पनि भइरहेको छ । अन्य स्ट्रक्चरको काम पनि अन्तिम चरणमा पुगेको छ । प्रकृतिले साथ दियो भने हामी दसैंसम्ममा काम सम्पन्न गरेर हस्तान्तरण गर्नेछौं,’ कार्कीले भने ।

स्थानीय मध्यपहाडी लोकमार्गअन्तर्गतको सो सडक कहिले सम्पन्न होला भन्ने व्यग्र प्रतीक्षामा छन् ।

सडक निर्माण सम्पन्न भएपछि यातायात सहज हुने र स्थानीय कृषि उत्पादनहरु बजारसम्म पु-याउन सहज हुने स्थानीयको विश्वास छ ।

म्याङलुङ नगरपालिका–९ साब्लाका केशर घतानीले भने, ‘मध्यपहाडी लोकमार्ग बनेपछि हाम्रा सबै कृषि उत्पादनले बजार पाउनेछन् । यात्रा सहज र छिटो हुनेछ । खुरुंगा खोलापारिका विभिन्न गाउँ सिधै सदरमुकामसम्म जोडिनेछ । हामीलाई यो सडक बन्दा निकै खुसी लागेको छ ।’

वर्षायाममा बिजोग

बर्खा लागेसँगै विभिन्न स्थान पुग्नुपर्ने यात्रुलाई पैदल यात्रा गर्नुको विकल्प नरहेको स्थानीय बताउँछन् । पानी नपरेको मौका पारेर २/३ वटा बस औंसी डाँडासम्म पुग्ने गरेको स्थानीय केशर घतानी बताउँछन् ।

मध्यपहाडी लोकमार्ग सम्पन्न भएपछि पाँचथर सदरमुकाम फिदिम बजारसम्म सहज यातायात सञ्चालन हुने भएकाले स्थानीयलाई ठूलो राहत पुग्नेछ ।