नेपाल समूहको सर्कुलर- ५ पुस कालो दिन, राष्ट्रिय भेलाको निर्णयअनुसार परिचालित हुन निर्देशन [पूर्णपाठसहित]

नेपाल समूहको सर्कुलर- ५ पुस कालो दिन, राष्ट्रिय भेलाको निर्णयअनुसार परिचालित हुन निर्देशन [पूर्णपाठसहित]

A+ A A-

एमालेको माधव नेपाल समूहले सर्कुलर जारी गरे राष्ट्रिय कार्यकर्ता भेला, त्यसअघि र पछि भएका स्थायी कमिटी तथा केन्द्रीय कमिटीका निर्णयअनुसार कार्यकर्तालाई परिचालित हुन निर्देशित दिएको छ ।

'राष्ट्रिय कार्यकर्ता भेलाको आयोजना गर्‍यौँ । अत्यन्त उत्साहजनक एवं भव्य रूपमा सम्पन्न उक्त भेलाका निर्णयहरू, त्यसअघि र पछि भएका स्थायी कमिटी तथा केन्द्रीय कमिटीका निर्णयहरू समेत मातहत कमिटीहरूमा प्रेषित गर्न यो सर्कुलर जारी गरिएको छ । अब सम्पूर्ण पार्टी पंक्ति यसैअनुसार परिचालित हुन निर्देशित गरिन्छ' जारी सर्कुलरमा भनिएको छ ।

उक्त समूहले प्रधानमन्त्री केपी शर्मा ओलले ५ पुसमा गरेको संसद् विघटनको कदमलाई कालो दिनका रूपमा अर्थ्याएको छ । 'प्रधानमन्त्री पद गुम्नेजस्तो भएपछि उहाँले घोर असंवैधानिक ढङ्गले २०७७ पौष ५ गतेका दिन जनताले ५ वर्षका निम्ति निर्वाचित गरेको प्रतिनिधिसभालाई नै विघटन गरिदिनुभयो । शक्तिशाली नेकपाको अध्यक्ष र झण्डै दुई तिहाई सांसदको समर्थन प्राप्त प्रधानमन्त्रीको हैसियत दुरूपयोग गर्दै प्रतिनिधिसभा विघटन गरिएको दिन नेपालको इतिहासमा एउटा कालो दिनको रूपमा रहनेछ ।'

संघीय लोकतान्त्रिक गणतन्त्रलाई समाप्त गर्ने र नेपाली कम्युनिस्ट आन्दोलनलाई विसर्जनको दिशामा धकेल्ने मनशाय बोकेर ओलीले असंवैधानिक कदम चालेको र त्यसबाट देशलाई बचाउन आफूहरू शीरमा कफन बाँधेर सडकमा उत्रिएको उक्त समूहको जिकिर छ । आफूहरूले नेतृत्व गरेको आन्दोलन, जनताको आन्दोलन र चौतर्फी दबाबले गर्दा सर्वोच्च अदालतले ओलीको उक्त गलत कदमलाई उल्टाउँदै विघटित प्रतिनिधिसभा पुनर्स्थापनाको फैसला गरेको सर्कुलरमा उल्लेख छ ।

'नेपाली जनताको आन्दोलन र चौतर्फी दबाबले गर्दा सर्वोच्च अदालतले प्रधानमन्त्री केपी ओलीको उक्त गलत कदमलाई उल्टाउँदै विघटित प्रतिनिधिसभा पुनर्स्थापनाको फैसला गर्यो‍ । त्यसबाट रन्थनिएका केपी ओलीले षडयन्त्रका अनेकौं तानाबाना बुन्न थाल्नुभयो । त्यसै क्रममा फाल्गुण २३ गते वादीले माग नै नगरेको बिषयमा प्रवेश गरेर सर्वोच्च अदालतले २०७५ जेष्ठ ३ गते भएको पार्टी एकतालाई खारेज गर्दै एकताबद्ध भएका दुबै पार्टीलाई पूर्ववत अवस्थामा अर्थात २०७५ जेष्ठ २ गतेको अवस्थामा फर्काइदियो' सर्कुलरमा भनिएको छ ।

ओलीको दक्षिणपन्थी एवं विसर्जनवादी प्रवृत्तिले एमालेलाई विघटन गर्नेतर्फ उद्दत गरेको सो समूहको ठहर छ । नेपाल समूहले त्यसैको एउटा कडी २८ फाल्गुणको कदमलाई ठानेको छ । त्यस दिनको ओलीको कदमले नवौँ महाधिवशेनको सम्पूर्ण म्यान्डेटलाई ध्वस्त बनाएको नेपाल समूहको जिकिर छ । ओलीले गरेको निर्णयहरू अवैधानिक भएको र त्यसलाई सच्याउँदै २ जेठ २०७५ कै अवस्थामा पार्टीलाई पुर्‍याउन उनीसँग केन्द्रीय कार्यालय धुम्बाराहीमा छलफल गरेको तर ओलीले दम्भ र घमण्ड देखाउँदै सच्याउन तयार नभएको सर्कुलरमा उल्लेख छ ।

'पार्टी विधान, पार्टीमा स्थापित विधि र पद्धतिविपरीत केन्द्रीय कमिटीका सम्पूर्ण सदस्यहरूलाई खबर नै नगरी केन्द्रीय कमिटीको तथाकथित विशेष बैठकको नाममा गुटको भेला गरेर मनपरी ढंगले अवैधानिक निर्णय गरी पार्टीलाई विभाजित हुने स्थितिमा पुर्‍याउनुभयो । केपी ओलीले यस किसिमको बल मिच्याँई र मनमौजी ढंगले गरेका सम्पूर्ण निर्णयहरू अवैधानिक भएको र त्यसलाई सच्याउँदै २०७५ जेष्ठ २ गतेको अवस्थामा पार्टीलाई पुर्‍याउन उहाँसँग दबावमूलक ढंगले कुरा गर्न हामी केन्द्रीय कार्यालय धुम्बाराही पुग्यौं तर कमरेड ओलीमा यति धेरै दम्भ र घमण्ड देखियो की उहाँ कुनै कुरा पनि सच्याउन तयार हुनुभएन र आफ्नो विखण्डकारी अडानमै रहनुभयो' सर्कुलरमा भनिएको छ ।

प्रकाशित मिति: सोमबार, चैत ३०, २०७७ १५:०६