ट्याङ्कर व्यवसायी भन्छन्– 'मेलम्ची आएकोमा खुसी छौँ तर ट्याङ्करको व्यवस्थापन गरिदेऊ सरकार !'

ट्याङ्कर व्यवसायी भन्छन्– 'मेलम्ची आएकोमा खुसी छौँ तर ट्याङ्करको व्यवस्थापन गरिदेऊ सरकार !'

A+ A A-

लामो समय साहुको पानी ट्याङ्कर चलाएका बालाजु बस्ने विनोद तामाङले चार वर्षअगाडि आफ्नै ट्याङ्कर किने । ऋण काढेर ९ लाख रुपैयाँमा किनेको सेकेन्ड ह्याण्ड उक्त ट्याङ्करले उनले दिनको सात/आठ ट्रिपसम्म पानी ओसार्न भ्याउँथे ।

‘ऋण पनि तिर्नुपर्थ्यो, परिवार पनि पाल्न परिहाल्यो । काम पाएको बेलामा त राम्रोसँग नसुती पानी बोक्थेँ,’ उनले भने ।

अहिले मेलम्चीको पानी काठमाडौं आएपछि भने उनी फुर्सदिला भएका छन् । काम पाउन छाडेपछि उनलाई ७ कक्षामा पढ्ने छोरी र ३ कक्षामा पढ्ने छोराको चिन्ताले पिरलिरहन्छ ।

‘अहिले त दिनको एक/दुई ट्रिप पाउन पनि गाह्रो छ । जहिलेसम्म टिकिन्छ, टिकौँला । टिक्न सकिएन भने आफ्नै घर त्रिशुली फर्किएर खेती–पाती गरौँला,’ उनले शिलापत्रसँग भने ।

उनलाई सरकारले केही व्यवस्थापन गरिदिन्छ भन्ने आस भने रहेछ । ‘हाम्रो ट्याङ्करलाई सरकारले सामान बोक्ने ट्रक बनाउन दिने रे भन्ने सुनेको छु । खै के हुन्छ, हेरौँ,’ तामाङले भने ।

यो समस्या उनको मात्रै होइन । उपत्यकामा सञ्चालित करिब ९ सय ट्याङ्करको अवस्था उस्तै हो । मेलम्चीको पानी आएपछि ७० देखि ७५ प्रतिशत पानीको माग घटेको खानेपानी स्रोत तथा ट्याङ्कर व्यवसायी संघका अध्यक्ष सुमन पाठकको अनुमान छ ।

‘हामी त लगभग विस्थापित नै भइसक्यौँ । पहिले एउटा ट्याङ्करले ४ ट्रिप गर्थ्यो भने अहिले एक/दुई ट्रिप पाउन पनि मुस्किल छ,’ उनले भने ।

यो व्यवसायमा साहु, चालक र सहचालक गरेर करिब २७ सय जनाको प्रत्यक्ष संग्लग्नता रहेको उनले बताए । काठमाडौं उपत्यका खानेपानी व्यवस्थापन बोर्डमा बारम्बार सम्पर्क गर्दा पनि व्यवसायीको माग सुनुवाइ नभएको उनको आरोप छ ।

‘हामीले राजधानी काकाकुल हुँदा सेवा दियौँ । अहिले हामीलाई अलपत्र पार्न पाइन्छ ?,’ उनले प्रश्न गरे, ‘मेलम्ची आएकोमा हामी धेरै खुसी छौँ तर सरकारले ट्याङ्करको व्यवस्थापन गरिदिनुपर्‍यो नि ।’

यी ट्याङ्करलाई स्वरुप परिर्वतन गरेर चलाउने र २० वर्ष पुरानो गाडी चलाउन नपाउने तगारो हटाइदिए समस्या सुल्झिने उनको सुझाव छ । आफूहरूको माग सम्बोधन नभए ट्याङ्कर लगेर खानेपानी बोर्ड घेर्ने उनले चेतावनी दिए ।

मेलम्चीको पानीले ट्याङ्कर व्यवसायीहरूलाई अहिले नै विस्थापित नगर्ने काठमाडौं उपत्यका खानेपानी व्यवस्थापन बोर्डका सूचना अधिकारी उदयकुमार केसीले बताए ।

‘अहिले उपत्यकामा ४५/४६ करोड लिटर पानीको माग छ । मेलम्चीको पानी जम्मा १७ करोड लिटर हो, काठमाडौं उपत्यका खानेपानी लिमिटेडले गर्दा ३४/३५ करोड लिटर मात्र धान्न सक्ने अवस्थामा पुगेका छौँ,’ उनले भने ।

पहिले उपत्यकामा पानीको क्राइसिस भएकाले ट्याङ्करको सङ्ख्या बढेको र अहिले सहज हुँदा व्यवसायीलाई केही समस्या देखिएको उनले स्वीकारे । केही समयमा यो समस्या सुल्झिने केसीले बताए ।

‘उहाँहरूलाई समस्या आएकै हो । त्यसलाई सुल्झाउन ट्याङ्कर व्यवसायी र सम्बन्धित निकायहरूसँग छलफल गरेर केही न केही उपाय निकाल्छौँ,’ उनले भने ।

प्रकाशित मिति: बिहीबार, चैत २६, २०७७ १८:३२