खनाल-नेपाल समूहले आज सुदूरपश्चिममा समानान्तर कमिटी घोषणा गर्ने

A+ A A-

नेकपा (एमाले) को खनाल–नेपाल सुदूरपश्चिम प्रदेशमा आज समानान्तर कमिटी गठन गर्ने भएको छ । धनगढीमा सोमबारदेखि बसेको सो समूहको प्रदेश कमिटीको विस्तारित बैठकले समानान्तर कमिटी बनाउने निष्कर्ष निकालेको हो ।

प्रधानमन्त्री तथा एमाले अध्यक्ष केपी शर्मा ओलीले माधव नेपाल, भीम रावल, घनश्याम भुसार र सुरेन्द्र पाण्डेलाई पार्टीबाट निलम्बन गरेपछि खनाल-नेपाल समूहले समानान्तर कमिटी गठनलाई तीव्रता दिएको छ ।

प्रदेश कमिटीको बैठक आज पनि जारी छ । जेठ २ अघिका कमिटीहरूलाई सक्रिय बनाउँदै लैजाने तयारी भएको बैठकमा सहभागी एक नेताले बताए ।

सुदूरपश्चिमका ९ वटै जिल्लामा बैठक राखी कमिटीहरू गठन गर्न निर्देशन जारी हुने तायारी समेत भएको छ । नेता भीम रावलले बैठकमा ओली समूहले गरेको एकपक्षीय निर्णय कार्यान्वयन नहुने जानकारी गराएका थिए ।

बैठकमा सुदूरपश्चिम प्रदेशसभाका १६ जना सांसदहरूको उपस्थिति छ । खनाल-नेपाल समूहका तारा लामा तामाङबाहेक सबै सांसद उपस्थित रहेको प्रदेश कमिटी सदस्य दिनेश चन्द्र सुवेदीले जानकारी दिए । तामाङले आफू जिल्लाबाहिर रहेकोले आउन नसकेको जानकारी गराएको सुवेदीले बताए ।

बैठकमा एमालेका सांसद लीलाधर भट्ट, रतन थापा, नेपालु चौधरी, गेल्बुसिंह बोहरा, माया तामाङ बोहरा र पठानसिंह बोहरा उपस्थित थिएनन् ।

बैठकमा भीम रावलसहित, खनाल-नेपाल समूहका प्रदेश अध्यक्ष भानुभक्त जोशी, प्रतिनिधिसभा सदस्य झपट रावल, केन्द्रीय सदस्य, प्रदेश र जिल्लाका पदाधिकारीहरूको उपस्थित छ ।

प्रकाशित मिति: मंगलबार, चैत २४, २०७७ ११:५६