भारतबाट फर्केका ५६ जनाको एन्टिजेन परीक्षणको नतिजा पोजिटिभ

A+ A A-

भारतबाट फर्कने बढेसँगै कोरोनाको संक्रमणसमेत बढ्दो रूपमा रहेको छ । सीमा नाका त्रिनगर (डोकेबजार) भएर भारतबाट फर्कने व्यक्तिमा कोरोनको संक्रमण अधिक देखिन थालेको छ ।

शुक्रबार र शनिबार गरी सीमानाका भएर फर्केका व्यक्तिको एन्टिजेन परीक्षण गर्दा ५६ जनाको परीक्षणको नजिता पोजिटिभ आएको छ ।

शनिबार मात्रै सीमानाका भएर फर्केका ७६७ जनाको एन्टिजेन परीक्षण गरिएकोमा ३२ जनाको नतिजा पोजिटिभ आएको सशस्त्र प्रहरी बल नेपाल नम्बर ३५ हेडक्वार्टर शैलेश्वरीका सशस्त्र प्रहरी उपरीक्षक वीरेन्द्रबहादुर ऐरले जानकारी दिए ।

उनका अनुसार एन्टिजेन पोजिटिभ आएका सबै जनालाई धनगढी उपमहानगरपालिकाले सञ्चालन गरेको आइसोलेसनमा राखिएको छ । एन्टिजेन परीक्षणमा १४ वर्षीय बालकदेखि ६० वर्षीय वृद्धसम्मको नतिजा पोजिटिभ आएको छ ।

एन्टिजेन पोजेटिभ आएकामा १५ जना कैलाली, दुई जना सुर्खेत, सात जना अछाम, एक जना कञ्चनपुर, तीन जना डोटी, एक जना जुम्ला, एक जना बझाङ र दुई जना डडेल्धुराका रहेका छन् ।

सीमानाकामा रहेको हेल्थ डेस्कमा भारतबाट फर्केकाको एन्टिजेन परीक्षणको व्यवस्था गरिएको छ । भारतबाट फर्कनेको संख्या धेरै भए पनि हेल्थ डेस्कमा भने स्वास्थ्यकर्मीको संख्या थोरै मात्र हुँदा परीक्षणमा समस्या हुँदै आएको छ ।

सीमानाका त्रिनगर र गड्डाचौकी भएर भारतबाट फर्केका तीन जनामा नयाँ प्रकारको (भेरियन्ट) कोरोनाको संक्रमणसमेत देखिएको थियो । तीनै जना अहिले घरमै आइसोलेसनम बसेका छन् ।

भारतमा कोरोनाको संक्रमण बढेसँगै मजदुरीका लागि गएका नेपाली घर फर्कन थालेका छन् । केही खेतमा लगाएको गहुँबाली भित्र्याउन र सुदूरपश्चिमको चाडपर्व चैते दसैँ मनाउनका लागिसमेत घर फर्केका हुन् ।