माओवादी केन्द्रले भन्यो- प्रदेश प्रमुखले प्रदेश सरकारमाथि हस्तक्षेप गरे

A+ A A-

नेपाल कम्युनिस्ट पार्टी (माओवादी केन्द्र) ले कर्णाली प्रदेश सरकारलाई प्रदेश प्रमुख गोविन्द्रप्रसाद कलौनीले हस्तक्षेप गरेको आरोप लगाएको छ ।

माओवादी केन्द्र, कर्णाली प्रदेश संसदीय दलको बैठकले प्रदेश प्रमुख कलौनीले सरकारमाथि हस्तक्षेप गरेको आरोप लगाएको हो । नेकपा (एमाले) ले गरेको समर्थन फिर्ता लिएको विषयमा दुई पटक प्रदेश प्रमुखको कार्यालयले ध्यानाकर्षण गराएको विषयमा माओवादी केन्द्रले प्रदेश सरकारमाथि हस्तक्षेप बढाएको आरोप लगाएको हो ।

समर्थन फिर्ता लिएको जानकारी दिएको ३० दिन नपुग्दै पटक-पटक प्रदेश प्रमुखले मुख्यमन्त्री तथा मन्त्रिपरिषद्को कार्यालयलाई पत्र पठाउनुमा संविधानले दिएको अधिकारभन्दा बढी पार्टीको गुटमा लागेको माओवादी केन्द्रको प्रदेशसभाका प्रमुख सचेतक सीता नेपालीले बताइन् ।

‘संविधानले दिएको अधिकारभन्दा बढी उहाँले गुटको राजनीति गर्नुभएको छ,’ उनले भनिन्, ‘संविधानमा उहाँ संघको एउटा प्रतिनीधि मात्र हो ।’

समर्थन फिर्ता लिएको विषयमा एमालेको आधिरिक निर्णय के हो ? त्यो विषयमा पूर्ण रूपमा जानकारी नभएको प्रमुख सचेतक नेपालीले बताइन् । ‘एमालेका १० जना सांसदहरूले समर्थन फिर्ता लिएको जानकारी आएको छ,’ उनले भनिन्, ‘१९ जना सांसदमा १० जनाको मात्र हस्ताक्षर हुनु, त्यो विषयमा एमालेको आधिकारिक निर्णय वा नक्कली निर्णय बुझ्न सकिएको छैन ।’

एमालेका १९ जना सांसदहरूले माओवादी केन्द्रको सरकारलाई समर्थन दिएको र अहिलेको सरकारमा ३ जना मन्त्री एमालेको नै रहेका कारणले त्यो समर्थन फिर्ता लिएको भन्न नमिल्ने नेपालीले बताइन् ।

प्रकाशित मिति: शनिबार, चैत २१, २०७७ १६:३५