प्रदेश १ : एमालेका १६ सांसदले फिर्ता लिए अविश्वासको प्रस्ताव, शेरधन राई सुरक्षित

प्रदेश १ : एमालेका १६ सांसदले फिर्ता लिए अविश्वासको प्रस्ताव, शेरधन राई सुरक्षित

A+ A A-

अविश्वासको प्रस्तावमा हस्ताक्षर गरेका नेकपा (एमाले) का सांसदले हस्ताक्षर फिर्ता लिएपछि प्रदेश- १ का मुख्यमन्त्री शेरधन राईको पद सुरक्षित भएको छ ।

अविश्वासको प्रस्तावमा हस्ताक्षर गरेका एमालेका सबै १६ जना सांसदले मंगलबार औपचारिक रूपमा फिर्ता लिएसँगै मुख्यमन्त्री राई सुरक्षित बनेका हुन् ।

मंगलबार सामूहिक रूपमा माधव नेपाल समूहका १६ जना सांसदले मुख्यमन्त्री राईविरुद्धको अविश्वास प्रस्तावमाथिको समर्थन फिर्ता लिएको लिएको प्रदेशसभा सचिव गोपाल पराजुलीले शिलापत्रलाई जानकारी दिए ।

११ चैतमा बसेको एमाले संसदीय दलको बैठकले अविश्वासको प्रस्तावमा हस्ताक्षर गरेका आफ्नो पार्टीका सबै सांसदलाई हस्ताक्षर फिर्ता लिन निर्देशन दिएको थियो ।

अविश्वास प्रस्तावमा हस्ताक्षर गरेका सांसद भीमप्रसाद आचार्य, राजेन्द्रकुमार राई, जीवन घिमिरे, गणेशकुमार काङबाङ, तुलसीप्रसाद न्यौपाने, लछुमन तिबारी, उपेन्द्रप्रसाद घिमिरे, लिलाबल्लभ अधिकारी, खिनु लाङ्बा (लिम्बू), पदमकुमारी गुरुङ, सरिता थापा, सुनिताकुमारी चौधरी, होमकुमारी साँवा, यसोदा अधिकारी, सावित्रा रेग्मी र सावित्रा जोशीले हस्तार फिर्ता लिएका हुन् ।

सांसदहरूले फिर्ता लिएसँगै मुख्यमन्त्री राईविरुद्ध प्रदेशसभामा टेबुल भएको अविश्वास प्रस्ताव स्वतः फेल हुने भएको छ । प्रदेशसभामा विपक्षी दलहरू नेपाली कांग्रेस, माओवादी केन्द्र, जनता समाजवादी पार्टी मिल्दा पनि बहुमत पुग्ने स्थिति नभएकाले अविश्वास प्रस्ताव स्वतः फेल हुने भएको हो ।

अविश्वास प्रस्ताव पारित गराउन ४७ सिट आवश्यक पर्छ । ९३ सदस्यीय प्रदेशसभामा एमाले एक्लैको ५१ सिट छ । प्रदेशसभामा प्रमुख प्रतिपक्षी कांग्रेसको २१, माओवादी केन्द्रको १६, जसपाको तीन र राप्रपा र संयुक्त लोकतान्त्रिक राष्ट्रिय मञ्चको एक/एक सिट छ । विपक्षी सबै दल एक ठाउँमा हुँदा पनि ४२ सांसद मात्र पुग्ने भएकाले अविश्वासको प्रस्ताव फेल हुने निश्चित भएको हो ।

नेकपा हुँदा प्रचण्ड–नेपाल समूहका ३७ जना सांसदको हस्ताक्षरसहित मुख्यमन्त्री राईविरुद्ध १२ पुसमा अविश्वासको प्रस्ताव दर्ता भएको थियो । उक्त अविश्वासको प्रस्तावमा एमालेका २१ र माओवादी केन्द्रका १६ सांसदले हस्ताक्षर गरेका थिए । अविश्वास प्रस्तावमा हस्ताक्षर गरेको केदी दिनमै एमालेका पाँच सांसदले फिर्ता लिइसकेका थिए ।