कर्णालीकै ठूलो राशिको पुरस्कार ‘मोहपथ’लाई

A+ A A-

ललित विष्टको कथाकृति ‘मोहपथ’लाई कर्णाली साहित्य समाज वीरेन्द्रनगर सुर्खेतले स्थापना गरेको कर्णालीकै ठूलो धनराशिको पुरस्कार प्रदान गरिएको छ । समाजले बुधबार एक आयोजना कार्यक्रम आयोजना गरेर मोहपथका लेखक ललित विष्टलाई कर्णाली साहित्य समाज कृति पुरस्कार नगद ५० हजार राशिको पुरस्कार प्रदान गरिएको हो ।

शताब्दी पुरुष सत्यमोहन जोशीलाई कर्णाली साहित्य समाज साधना सम्मान अर्पण गरिएको कर्णाली साहित्य समाजका अध्यक्ष खगेन्द्र अधिकारीले जानकारी दिए । ‘ताम्रपत्रसहितको यो सम्मान जोशीले नेपाली भाषा, साहित्यको क्षेत्रमा पुर्‍याएको योगदानको कदर गर्दै प्रदान गरिएको छ,’ उनले भने, ‘शताब्दी पुरुष आउन सक्नुभएन । उहाँलाई काठमाडौं पुगेर साधना सम्मानबाट अर्पण गरिनेछ ।’

नेपाली लोक साहित्य, लोकगीत र बाद्यवादनको क्षेत्रमा पुर्‍याएको योगदानको कदर गर्दै लोकसाधक प्रेमदेव गिरीलाई नगद २५ हजारसहितको कर्णाली साहित्य समाज प्रतिभा पुरस्कार प्रदान गरिएको छ ।

कर्णाली प्रदेश सरकारले कर्णालीको साहित्य, कला र संस्कृतिको संरक्षण गर्न प्रदेश सरकारले साहित्य प्रष्तिठान बनाउने भएको छ । पुरस्कार तथा सम्मान अर्पण कार्यक्रममा बोल्दै कर्णाली प्रदेश सरकारका मुख्यमन्त्री महेन्द्रबहादुर शाहीले कर्णालीको साहित्य, कला र संस्कृति संरक्षणका लागि सरकारी प्रतिष्ठान बनाएर अघि बढ्ने बताए ।

‘कर्णालीको भाषा, साहित्य, कला र संस्कृति संरक्षणका लागि ऐनमार्फत प्रतिष्ठान अगाडि बढाउने तयारी रहेको छ,’ उनले भने, ‘मुलुकमा साहित्य, कला, संस्कृति र भाषाले सम्पन्न प्रदेश हो कर्णाली । यसको उत्थानका लागि नागरिक तहबाट समाजले गरेको कार्य सराहनीय छ ।’

भाषा, साहित्य र कलामा पहिचानका निम्ति गहिरिएर लाग्न लेखक, पत्रकार र साहित्यकारले लाग्नुपर्ने मुख्यमन्त्री शाहीले बताए । ‘निरन्तरताले नयाँ पुस्तालाई ऊर्जा मिल्ने र यहाँको समृद्धि तथा विकासका साथै उज्ज्वल भविष्य निर्माणमा साहित्य र कलाको विशेष योगदान रहेको छ ।’

कर्णालीकै ठूलो र पहिलो पुरस्कारको रूपमा कर्णाली साहित्य समाजले सुरुवात गरेको कार्यले नेपालमा कर्णालीलाई चिनाउन सहयोग पुग्ने समाजका संस्थापक संरक्षक वरिष्ठ कथाकार महेशविक्रम शाहले बताए । ‘सबै कुरामा सरकारको मुख ताक्नुभन्दा पनि सबैले आ-आफ्नो क्षेत्रबाट गर्न सकिने कामलाई गर्दै अगाडि बढेमा मात्र समृद्धिमा पुग्न सकिन्छ,’ उनले भने ।

समारोहमा मध्यपश्चिमाञ्चल विश्वविद्यालयका उपकूलपति प्राडा. नन्दबहादुर सिंहले विश्वविद्यालयले भाषा साहित्यका क्षेत्रमा अध्ययन, खोज र अनुसन्धानका लागि गर्नुपर्ने काम गर्ने बताउँदै सभ्यताको विकास गर्नका लागि भाषा र साहित्यको विकास महत्त्वपूर्ण रहेको बताए ।

प्रकाशित मिति: बुधबार, चैत ११, २०७७ १७:५१