‘बिग मर्जर’ को प्रतीक्षामा हिमालयन र इन्भेस्टमेन्ट, देशकै ठूलो वाणिज्य बैंक बन्ने अवसर

‘बिग मर्जर’ को प्रतीक्षामा हिमालयन र इन्भेस्टमेन्ट, देशकै ठूलो वाणिज्य बैंक बन्ने अवसर

A+ A A-

नियमनकारी निकाय नेपाल राष्ट्र बैंकले मर्जरका लागि वाणिज्य बैंकहरूलाई प्रोत्साहन गरिरहेको बेला थुप्रै वाणिज्य बैंक मर्जरका लागि प्रक्रिया अघि बढाए पनि हालसम्म उक्त प्रक्रियाले सकारात्मक गति लिन सकेकाे छैन । तर पनि दुई वाणिज्य बैंकहरूले भने आपसमा मर्जर गरेर गत वर्षको २० मंसिरदेखि एकीकृत कारोबार सुरु गरेका छन् ।

पछिल्लो पटक पाकिस्तानी हबिब ग्रुपको २० प्रतिशत शेयर रहेको हिमालयन बैंक र नेपाली लगानीकर्ताको लगानी रहेको निजीक्षेत्रको नेपाल इन्भेस्टमेन्ट बैंक मर्जरका लागि अन्तिम कसरतमा छन् ।

इन्भेस्टमेन्ट बैंकका अध्यक्ष पृथ्वीबहादुर पाँडेका अनुसार दुवै बैंकले बैंकको कुल सम्पत्ति र दायित्वको मूल्यांकन (डीडीए) गराइसकेको र सञ्चालक समितिमा छलफल गरेर मर्जरमा लैजाने प्रक्रिया अगाडि बढाइने विषयमा छलफल भएको छ । इन्भेस्टमेन्ट बैंक स्रोतका अनुसार दुवै बैंकबीच महत्त्वपूर्ण विषयमा अनौपचारिक सहमतिसमेत भइसकेको छ ।

मर्जरका लागि कसिलो नीति अवलम्बन गर्ने क्रममा राष्ट्र बैंकले एकै घर-परिवार वा व्यावसायिक समूहका व्यक्तिको प्रत्यक्ष-अप्रत्यक्ष स्वामित्वमा रहेका, एउटै व्यक्ति तथा समूहद्वारा प्रवर्तित बैंक आपसमा गाभ्न-गाभिनुपर्ने मौद्रिक नीतिमार्फत व्यवस्था गरेको छ ।

इन्भेस्टमेन्ट बैंकका अध्यक्ष पाँडेको स्वामित्वमा रहेको छाया इन्टरनेसनल कम्पनीको हिमालयन बैंकमा ८ दशमलव ८९ प्रतिशत शेयर छ । त्यस्तै, हिमालयन बैंकका हिमालयशमशेर जबराको स्वामित्वमा रहेको आभा इन्टरनेसनल कम्पनीको इन्भेस्टमेन्ट बैंकमा ११ दशमलव ३८ प्रतिशत शेयर छ । यस कारण पनि राष्ट्र बैंकले यी बैंकलाई एकआपसमा मर्जर हुनका लागि पहल गरेको थियो ।

स्वाप रेसियो समान एक बराबर एक (१:१) वा हिमालयन बैंक र इन्भेस्टमेन्ट बैंक शेयर मूल्य समान हुँदा यो बैंक मर्जरपछि हालसम्मकै सबैभन्दा ठूलो वाणिज्य बैंक बन्नेछ । अहिले सबैभन्दा ठूलो वाणिज्य बैंक ग्लोबल आईएमई बैंकको चुक्ता पुँजी २१ अर्ब ६३ करोड छ । तर, समान स्वाप रेसियो हुँदा यी बैंक मिलेर बन्ने बैंकको चुक्ता पुँजी २४ अर्ब ९२ करोड पुग्नेछ ।

पुँजी, निक्षेप, कर्जा र नाफाका हिसाबले हिमालयन बैंकभन्दा इन्भेस्टमेन्ट बैंक अघि छ । चालू आवको ६ महिनामा इन्भेस्टमेन्ट बैंकले १ अर्ब ५८ करोड नाफा कमाउँदा हिमालयन बैंकको ६५ करोड छ ।

हिमालयन बैंकको अहिले १० अर्ब ६८ करोड चुक्ता पुँजी छ भने इन्भेस्टमेन्ट बैंकको १४ अर्ब २४ करोड रुपैयाँ चुक्ता पुँजी छ । यस हुँदा दुवै बैंकको चुक्ता पुँजी करिब २५ अर्ब २४ अर्ब ९१ करोड पुग्नेछ ।

खराब कर्जामा पनि हिमालयन बैंकको तुलनामा इन्भेस्टमेन्ट बैंक अघि नै छ । हिमालयन बैंकको २ दशमलव १३ प्रतिशत एनपीएल छ भने इन्भेस्टमेन्ट बैंकको २ दशमलव ७५ प्रतिशत छ ।

प्रकाशित मिति: सोमबार, चैत २, २०७७ १४:४५