यार्सा संकलन गर्न १५ बुँदे आचारसंहिता

A+ A A-

जिल्ला प्रशासन कार्यालय डोल्पाले यार्सागुम्बा संकलनका लागि १५ बुँदे आचारसंहिताको घोषणा गरेको छ । प्रशासनले यार्सा संकलनका लागि निश्चित दिनसमेत तोकेको छ । यार्सा संकलन कार्यलाई व्यवस्थित र सुरक्षित बनाउन आचारसंहिता लगाइएको डोल्पा जिल्लाका पमुख जिल्ला अधिकारी मुकेश कुमार केसरीले जानकारी दिए ।

जेष्ठ १६ गतेदेखि मात्र यार्सा संकलन गर्न पाइनेछ । सोहि दिन यार्सा संकलन गर्ने पाटनहरुका मुख्य नाकाहरु सुलिगाढ, तैजुम र धोमा खुल्नेछन् । यार्सा संकलनकर्तालाई तीन तहको प्रवेश शुल्कको प्रावधान राखिएको छ ।

सम्बन्धित गाउँपालिकाका व्यक्तिलाई प्रवेश शुल्क पाँच सय रुपैयाँ तोकिएको छ भने जिल्लाभित्रकै नागरिकले यार्सा संकलन गर्न जाँदा दुई हजार तिर्नुपर्नेछ । त्यस्तै जिल्ला बाहिरकालाई भने तीन हजार रुपैयाँ प्रवेश शुल्क लाग्नेछ ।

यार्सा संकलनका क्रममा हुने अपराध नियन्त्रणका लागि सञ्चारमाध्यमको प्रयोग गरिने प्रशासनले जनाएको छ । हामीले स्याटेलाईट फोनमार्फत अपराधको निरन्तर निगरानी गर्छाैं, प्रमुख जिल्ला अधिकारी केसरीले भने, बालबालिकाको शिक्षामा पर्ने असर र स्वास्थ्यको जोखिमलाई मध्यनजर गर्दै उनीहरुलाई यार्सा संकलनमा रोक लगाएका छौं ।’

त्यस्तै यार्साको गैरकानुनी निकासीलाई पनि प्रशासनले रोक लगाउने भएको छ । चिनियाँ व्यापारीले हेलिकप्टरको प्रयोग गरी यार्सा चोरी निकारी गर्दै आएका थिए । यस पटक भने सीमा क्षेत्रमा सुरक्षा चौकी स्थापना गरी यार्साको चोरीलाई नियन्त्रण गरिने प्रशासनको भनाई छ ।

आरक्ष र निषेधित क्षेत्रमा हुने चोरी निकासीलाई पनि निरुत्साहित गरिने प्रशासनको दावी छ । करिब १५ हजार व्यक्ति यार्सा संकलन गर्न जाने गरेको सरकारको दावी छ । एक महिना यार्सा संकलनका लागि उनीहरुले घरबाटै खाद्यान्नको पनि व्यवस्था गर्ने गरेका छन् । पर्याप्त खाद्यान्न नलगेको भेटिए प्रशासनले फिर्ता पठाइदिने निर्णय भएको छ ।

त्यसैगरी यार्सा संकलन गर्ने स्थानमा स्वास्थ्यकर्मीको पनि व्यवस्था गरिने भएको छ । यार्सा संकलन कार्यलाई व्यवस्थित बनाउने जिम्मा जनप्रतिनिधिलाई दिइएको छ ।

भीम कसिंगर

प्रकाशित मिति: शनिबार, वैशाख २८, २०७६ २०:२६