भिजिट भिसामा विदेश जाँदा महिलालाई वडाको सिफारिस र परिवारको सहमति अनिवार्य

A+ A A-

भिजिट भिसामा विदेश जाँदा महिलालाई अब वडा कार्यालयको सिफारिस र परिवारको सहमति अनिवार्य चाहिने भएको छ ।

अध्यागमन विभाग अध्यागमन कार्यविधि- २०६५ को भिजिट भिसासम्बन्धी व्यवस्थालाई संशोधन गर्दै ४० वर्षमुनिका महिला विदेश जाँदा वडा कार्यालयको सिफारिस र परिवारको सहमति अनिवार्य चाहिने व्यवस्था गरेको हो । विभागले उक्त कार्यविधि संशोधनका लागि तीन दिनअघि गृह मन्त्रालयमा प्रस्ताव समेत पठाइसकेको छ ।

विभागले महिला एक्लै विदेश जाँदा मानव तस्करी बढेको, शोषणमा परेको, समस्यामा भए उद्धार गर्न नसकिएको, औषधि उपचार नपाएर बिजोग भएको अवस्थालाई मध्यनजर गरेर कार्यविधि संशोधनको प्रस्ताव गृहमा पठाइएको विभागका महानिर्देशक रमेश केसीले जानकारी दिए ।

उनका अनुसार गृह मन्त्रालयको कानुन शाखाले प्रस्तावित कार्यविधिबारे स्वीकृति दिएपछि चाँडै लागू गरिने छ । ‘प्रस्तावित कार्यविधिमा अब ४० वर्षमुनिका महिला एक्लै विदेश जाँदा सम्बन्धित वडा कार्यालय र परिवारको सहमति लिएर मात्रै जान पाउनेछन्,’ उनले भने, ‘कतिपय महिला परिवारलाई थाहा नदिएर विदेश जाने र अलपत्र पर्ने क्रम बढेपछि कडाइ गर्न लागिएको हो । ’

उनले परिवार र वडाको स्वीकृतिविना अब ४० वर्षमुनिका महिलालाई भिजिट भिसामा विदेश जान नदिइने बताए । ‘भिजिटद भिसामा जाने र त्यहाँ गएर उतै काम खोजेर बस्ने गरेकाले कडाइ गर्नु पर्ने देखियो । त्यतिमात्रै होइन त्यसरी भिजिट भिसामा गएर बस्ने महिला पछि शोषणमा पर्ने गरेको पनि भेटियो,’ उनले भने, ‘अब भिजिट भिसाको दुरुपयोग नहोस् र महिला शोषणामा नपरून भनेर कार्यविधि संशोधनको प्रस्ताव गरिएको हो ।’

उनका अनुसार कार्यविधि लागू भएपछि भिजिट भिसामा विदेश जाने महिलाका लागि १५ लाख रुपैयाँसम्मको निर्जीवन दुर्घटना बीमा अनिवार्य गर्नुपर्नेछ । श्रीमान वा परिवारका सदस्यसँग महिला विदेश जाँदा भने वडा कार्यालयको सिफारिस आवश्यक नपर्ने र बीमा अनिवार्य गर्नु पर्ने छैन ।

नयाँ कार्यविधिमा भिजिट भिसामा जाँदा न्यूनतम एक हजार अमेरिकी डलर बोक्नुपर्ने पुरानै नियमलाई कायमै राखिएको छ । यसअघि डलर सटही गरेको पासपोर्टको छाप अध्यागमनलाई देखाउनु पर्ने भएपनि अब सटहीको रसिद नै देखाउनुपर्नेछ । यस्तै दुईतर्फी टिकट, होटल बुकिङ लगायतको प्रावधानलाई कायमै राखिएको को प्रावधानलाई कायमै राखिएको महानिर्देशक केसीले बताए ।

कोरोना महामारीपछि ठूलो संख्यामा नेपालीहरू भिजिट भिसामा खाडी मुलुकमा काम गर्न गएको उजुरी परेपछि गृह मन्त्रालयले छानविनसमेत गरेको थियो । छानविनका गर्दा महिलाहरू भिजिट भिसामा गएर उतै काम गरेर बसेको पुष्टि भएको थियो ।