सभामुख सापकोटाले भने, 'संसदले सरकारलाई सहयोग गरेन भन्ने कुरामा सत्यता छैन'

A+ A A-

सभामुख अग्निप्रसाद सापकोटाले संसदले सरकारलाई सहयोग गरेन भन्ने कुरामा कुनै सत्यता नभएको बताएका छन् । सोमबार अन्तरपार्टी महिला सञ्जालले संसद सञ्चालन गर्न माग गर्दै बुझाएको ध्यानाकर्षणपत्र बुझ्दै उनले प्रतिनिधिसभाले कहिल्यै पनि सरकारलाई असहयोग नगरेको बताएका हुन् ।

सापकोटाले संसदमा एक दिन पनि सत्तापक्ष र प्रतिपक्ष कसैले पनि सरकारको विरोध गरेर सरकारले दिएको बिजनेसमाथि प्रभाव नपारेको बताए । संसदमा अराजकता भयो, अनुशासन भएन भन्ने सरकारको आरोपमा कुनै सत्यता नभएको उनकाे भनाइ छ ।

सापकोटाले भने, ‘कुनै दिन पनि न त्यहाँ त्यस्तो नारा लाग्यो, न वेल घेर्ने काम भयो । सौहार्दपूर्ण ढंगले हामीले लोकतन्त्रको मूल्य मान्यता, आदर्शलाई स्थापित गर्नका लागि छलफलको वातावरण बनाउन हामीले भगिरथ मेहनत गर्‍यौँ । हामी सबै सांसदहरू, सचिवालयका कर्मचारीहरू सबैले अहोरात्र खटेर र सबै अनुशासित भएर सदन सञ्चालन गरेका थियौँ । जुन अहिले सहयोग भएन, त्यहाँ अराजकता भयो, अनुशासन भएन भन्ने कुरा आइरहेको छ, त्यो सत्यमा आधारित छैन । त्यो सत्य छैन ।’

सापकोटाले प्रतिनिधिसभाको अधिवेशन सञ्चालन गर्ने कुरामा सरकारले अवरोध गर्नु बेठीक भएको बताउँदै संसदले नीति तथा कार्यक्रम र बजेट पास गर्ने कुरामा कहिल्यै पनि अवरोध नगरेको तर सरकारले विघटन गरेर प्रतिनिधिसभालाई सञ्चालन गर्न अवरोध गरेको बताए ।

उनले भने, ‘म के भन्न चाहन्छु भने एउटा यस्तो अवरोध गरेको कुरा चाहे त्यो नीति तथा कार्यक्रम पास गर्ने कुरामा होस्, चाहे बजेट पास गर्ने कुरामा होस्, कुनै कुरामा पनि प्रतिनिधिसभाले सहयोग नै गरेको छ । कार्यपालिकालाई कहिल्यै पनि असहयोग गरेको छैन । त्यस कारण यस्तो परिस्थितिमा जुन खालको अवरोध सिर्जना गरिएको छ, त्यो बेठीक छ ।’

संसदले संविधान संशोधन गरेर नक्सा पास गरी अभूतपूर्व एकता देखाएको अवस्थामा अवरोध सिर्जना गर्‍यो भन्नु गलत भएको पनि उनले बताए । संसदभित्र कहिल्यै पनि प्रतिपक्ष र कुनै पनि सांसदले अवरोध नगरेको उनकाे भनाइ थियो । उनले भने, ‘हामीले संविधान संशोधन गरेर नक्सा पास गर्‍यौँ । त्यो सायदै अभूतपूर्व एकता थियो हाम्रो संसदमा प्रकट भएको । त्यसैगरी यो पनि स्पष्ट पार्न चाहन्छु- संसदभित्र न प्रतिपक्षले न कुनै माननीय सदस्यहरूले कुनै खालको अवरोध गर्नुभएको थिएन ।’

संसद फेरि पनि सञ्चालन गर्नुपर्छ भन्ने आवाज आइरहेको उल्लेख गर्दै सभामुख सापकोटाले यस सम्बन्धमा आफूले अध्ययन गरिराखेको बताए ।

उनले भने, ‘दुईवटा सदन चलाएको अनुभवसहित हाम्रो व्यवस्थित देशको सर्वाङ्गीण कुरामा ध्यान दिँदै व्यवस्थित ढंगले संसद सञ्चालन गर्ने तयारी हुँदै गर्दा हठात् संसद सञ्चालनमा अवरुद्धता आएको छ । त्यसलाई सञ्चालन गर्नपर्छ भनेर तपाईंहरूले मात्रै होइन, यो देशका सबै संविधानविद्, कानुनविद, विज्ञ, राजनीतिक पार्टीका नेताहरू अधिकांशले चिन्ताका साथ सञ्चालन हुनुपर्छ भन्ने आवाज उठाइराख्नुभएको छ । त्यससम्बन्धमा म गम्भीरतापूर्वक जिम्मेवारीपूर्वक अध्ययन गरिराखेको छु । विश्लेषण गरिरहेको छु ।’

सभामुख सापकोटाले संसदले सरकारलाई जहिले पनि सहायोग गरेको कुरालाई समेटेर अदालतलाई समेत जवाफ दिएको बताए । प्रतिनिधिसभाले सरकारलाई कहिल्यै पनि कार्यपालिकालाई असहयोग नगरेको अवस्थामा सरकारले विघटन गरेर प्रतिनिधिसभालाई अवरोध गर्न नहुने पनि उनको भनाइ छ ।

प्रकाशित मिति: सोमबार, माघ १२, २०७७ १६:१८