नागढुंगाबाट लागुऔषधसहित पक्राउ परेका अभियुक्त ललितपुरबाट कसरी भागे ?

A+ A A-

नागढुंगाबाट शनिबार लागुऔषधसहित पक्राउ परेका एक जना अभियुक्त प्रहरीलाई छक्क्याएर भागे । सर्लाही धनकौलका मोहम्द इल्ताफ प्रहरी नियन्त्रणबाट भागेका हुन् ।

काठमाडौं प्रहरी परिसरका प्रवक्ता प्रहरी नायब उपरीक्षक (डीएसपी) प्रमेश विष्टका अनुसार उनी ललितपुरको पाटनबाट प्रहरीलाई छक्क्याएर फरार भएका हुन् ।

इल्ताफको सुरक्षाका लागि प्रहरी निरीक्षकको कमाण्डमा प्रहरी टोली खटिएको थियो ।

‘नागढुंगा चेक पोस्टमा शनिबार इल्ताफ पक्राउ परेका थिए । आफूले पाटनका एक व्यक्तिका लागि लागुऔषध ल्याएको र उनलाई चिनाउँछु भन्दै प्रहरीसँगै पाटन पुग्दा भागेका हुन्,' डीएसपी विष्टले भने, ‘प्रहरीको गाडीबाट झरेर हिँड्दा उनी भागेछन् ।’

नागढुंगा प्रहरी प्रभागका अनुसार सर्लाहीबाट काठमाडौं आउँदै गरेको बस चेकजाँचका क्रममा उनी पक्राउ परेका हुन् । पक्राउलगत्तै उनलाई महानगरीय प्रहरी वृत्त थानकोटमा बुझाइएको थियो ।

थानकोट वृत्तका प्रहरी निरीक्षक रामप्रसाद सापकोटाको टोलीले पाटन पुर्‍याएपछि उनी भाग्न सफल भएको खुलेको छ । प्रहरी निरीक्षककै कमाण्डमा गएका प्रहरीलाई छक्याएर लागुऔषधका अभियुक्त कसरी भागे भन्ने प्रश्नको जवाफ थानकोट प्रहरीसँग छैन ।

वृत्तका डीएसपी मोहन खाँड भन्छन्, ‘कसरी भाग्यो भन्ने प्रश्न हामीले काठमाडौं प्रहरी परिसरलाई रिपोर्ट गरिसकेका छौँ । उत्तैबाट सूचना लिनुहोला ।’

प्रहरीका अनुसार, पक्राउ परेका इल्ताफबाट नाइट्राभेट ट्याब्लेट, डाइजेपाम, फेनारगन, नुर्फिनलगायतका लागुऔषध ठूलो मात्रामा बरामद भएको छ ।

परिसरका प्रवक्ता डीएसपी विष्टले प्रहरीको केही कमजोरीकै कारण अभियुक्त भाग्न सफल भएको स्वीकार गर्दै उनको खोजी भइरहेको बताए । अनुसन्धानकै क्रममा रहेका अभियुक्तलाई प्रहरीको नियन्त्रणबाटै भाग्नुलाई प्रहरीको गम्भीर कमजोरी मानिन्छ ।

प्रकाशित मिति: सोमबार, माघ १२, २०७७ १५:३६