राष्ट्रपतिको कार्यभार सम्हालेसँगै बाइडेनले उल्ट्याए ट्रम्पका विभिन्न नीति

राष्ट्रपतिको कार्यभार सम्हालेसँगै बाइडेनले उल्ट्याए ट्रम्पका विभिन्न नीति

A+ A A-

अमेरिकी राष्ट्रपति जो बाइडेनले कार्यभार सम्हालेसँगै डोनाल्ड ट्रम्पको कार्यकालका विभिन्न निर्णय उल्ट्याएका छन् । कार्यभार सम्हालेको पहिलाे दिनमै बाइडेनले ट्रम्पले गरेका धेरै निर्णय उल्ट्याएका हुन् ।

उनले कोरोना भाइरस महामारीको संकट सम्बोधनमा संघीय कारबाही तीव्र पार्ने कार्यकारी आदेश जारी गरेका छन् ।

बाइडेनले जारी गरेका आदेशले विगतमा ट्रम्प प्रशासनले जलवायु परिवर्तन, आप्रवासन तथा जातीय सम्बन्धबारे अख्तियार गरेका नीति उल्ट्याइनेछ ।

७८ वर्षीय बाइडेनले कोरोना महामारीसँग जुझ्न विभिन्न उपाय अपनाइने आदेशमा आदेशमा गरेका छन् । उनले आफ्नो आदेशमा डब्लूएचओबाट फिर्ता हुने अमेरिकी कार्यको अन्त्य गरिने, भाइरस विज्ञ डा. एन्थोनी फाउचीले यसै साता हुने डब्लूएचओको अन्तर्राष्ट्रिय कार्यकारी समितिको बैठकमा अमेरिकाको प्रतिनिधित्व गर्दै भाग लिने निर्णय पनि गरेका छन् ।

साथै, उनले कोभिडको राष्ट्रिय सम्बोधन गर्ने कार्य केन्द्रीकृत गर्दै सुरक्षा सामग्री, खोप तथा परीक्षण सामग्रीको वितरणमा समन्वय बढाउने, सबै सङ्घीय परिसरमा मास्क तथा दूरीको नियम पालना गरिने, आगामी १ सय दिनसम्म मास्क लगाइरहन मानिसलाई आग्रह गर्नेगरी १ सय दिने मास्क चुनौती अभियान थालनी गर्नेसमेत निर्णय गरेका छन् ।

बाइडेनले वातावरणसम्बन्धी कतिपय ट्रम्प प्रशासनका नीतिहरू उल्ट्याउन चाहेका छन् । उनले सन् २०१५ मा हस्ताक्षर गरिएको पेरिस जलवायु सम्झौतामा अमेरिका पुनः सामेल हुने बताएका छन् । राष्ट्रपति बाइडेनले विवादास्पद किस्टोन एक्सएल पाइपलाइन निर्माण रद्द गर्नसमेत आदेश दिएका छन् ।

उनले आप्रवासनको विषयमा महत्त्वपूर्ण दुई निर्णय गरेका छन् । बाइडेनले ट्रम्पले लागू गरेको तथाकथित् मुस्लिम प्रतिबन्धअन्तर्गत केही मुस्लिम बहुल देशबाट यात्रामा लगाइएको प्रतिबन्ध फुकुवा गर्ने निर्णय गरेका छन् ।

साथै, उनले मेक्सिकोसँगको सिमानामा पर्खाल निर्माणकार्य बन्द गर्नेसमेत निर्णय गरेकाे बीबीसीले उल्लेख गरेको छ ।

प्रकाशित मिति: बिहीबार, माघ ८, २०७७ ०७:५९