हिमाल खबरपत्रिका छाडे किरण नेपालले, सम्पादकमा अब कनक दीक्षित नै

A+ A A-

हिमाल खबरपत्रिकाका सम्पादक किरण नेपालले आफ्नो १२ वर्षे सम्पादकीय नेतृत्वबाट बिदा लिएका छन् ।

शुक्रबार पाटनढोकामा आयोजित कार्यक्रममा प्रकाशक कनक दीक्षितले उनलाई अहिलेसम्मको योगदानको कदर गर्दै शुभकामना दिएका छन् ।

गत वर्ष चैतमा कोभिड संकटका कारण उत्पन्न लकडाउनपछि हिमाल साप्ताहिक म्यागजिनको प्रिन्ट संस्करण बन्द भएको थियो । नेपाल अहिलेसम्म हिमालखबर डटकमका सम्पादकका रुपमा कार्यरत थिए । उनी २१ वर्ष हिमालका विभिन्न विभागहरुमा रहँदै आएका थिए । हिमाल पाक्षिक उनी सम्पादक रहेकै बेला साप्ताहिकमा परिणत भएको हो ।

नेपालसँगै प्रबन्ध सम्पादक इन्द्र श्रेष्ठले पनि दुई दशक लामो हिमाल यात्रा टुंग्याएको उल्लेख गरेका छन् । योसँगै हिमालको सम्पादकमा यसका प्रकाशक तथा संस्थापक सम्पादक कनक दीक्षितले सम्हाल्नेछन् । उनले यो जानकारी आफ्नो टिमलाई दिइसकेका छन् ।

हिमाल नेपाली पत्रकारितामा गुणस्तरीय व्यावसायिक म्यागेजिनकारिता थाल्ने, स्तरीय पत्रकारहरु उत्पादन गर्ने थलोका रुपमा चिनिँदै आएको छ । आफूलाई मध्यमार्गी धारको पत्रिका भनी चिनाउँदै आए पनि यसले लिने सम्पादकीय नीतिहरु बेलाबखत विवादको केन्द्रमा छाउने गरेका छन् ।

प्रधानमन्त्री केपी ओलीको गैरसंवैधानिक संसद विघटनमाथि आलोचना गर्दै नेपालले आफ्नो पोर्टल हिमालखबर डटकममा सम्पादकीय लेखेका थिए । तर हिमालकै भगिनी प्रकाशन नेपाली टाइम्सले भने प्रचण्ड–माधव नेपालहरुको अभिप्रायमाथि प्रश्न उठाउँदै ओलीलाई शंकाको लाभ दिएको थियो ।

यति हुँदाहुँदै पनि हिमाल नेपालको उल्लेख्य सञ्चारगृह बन्न सफल संस्था हो । हिमालका समाचार सम्पादक रामेश्वर बोहरा पनि माघ १ देखि समाचारकक्षबाट बिदा भएका छन् । उनी नेपाल लाइभ अनलाइन पोर्टलको सम्पादक भएका छन् ।

किरण नेपालको बिदाइसँगै अब हिमालले खबरपत्रिकाबाट आफ्नो सम्पादकीय नीति परिवर्तन गर्दै विचारमूखी लङ फर्म पत्रकारिता गर्ने धारमा फर्काउने छ । हिमाल सूत्रका अनुसार अब यसमा निरन्तरको खबर अपडेटभन्दा गहिरा खोजमूलक सामग्रीले प्रवेश पाउने छन् । सम्पादकीय टिमका एक सदस्यले भने, ‘अब टिम चुस्त हुनेछ । अनि मल्टिमिडियाको काममा केन्द्रित हुनेछ ।’

हामीले यसबारे प्रकाशक तथा सम्पादक कनक दीक्षितसँग सम्पर्क गर्न खोज्यौं । उनी उपलब्ध भएनन् । किरण नेपालले लामो सम्पादकीय नेतृत्वपछि केही समय आराम गर्ने बताएका छन् । उनले आफ्नो सिंगो अनुभव मिडिया क्षेत्रमा नै लगाएको भन्दै फेरि पनि मिडियामै आउने शिलापत्रलाई जानकारी दिए । उनले आफ्नो न्युजरुम, व्यवस्थापन, पाठक सबैलाई धन्यवाद दिएका छन् ।

प्रकाशित मिति: शनिबार, माघ ३, २०७७ १६:२८