प्रचण्ड–माधवलाई ओलीको सुझावः सडकमा बसेर लुगा नबिगार्नुस्, बरु चुनावमा हाेमिनाेस्

प्रचण्ड–माधवलाई ओलीको सुझावः सडकमा बसेर लुगा नबिगार्नुस्, बरु चुनावमा हाेमिनाेस्

काठमाडौँको बबरमहलस्थित पार्टी प्यालेसमा बुधबार आयोजित सुदूरपश्चिम प्रदेशस्तरीय कार्यकर्ता भेलामा प्रधानमन्त्री केपी शर्मा ओली । तस्वीरः चन्द्रकला क्षेत्री/रासस

A+ A A-

प्रधानमन्त्री केपी ओलीले संसद पुनर्स्थापना गर्न संविधानले नै नदिने बताएका छन् । संसद विघटनलाई असंवैधानिक कदम भन्दै नेकपाकै प्रचण्ड–माधव समूह आन्दोलनमा रहेका बेला ओलीले संविधानको परिधिभित्र रहेर नै संसद विघटन गरेको दाबी गर्दै पुनर्स्थापना गर्न संविधानले नै नदिने बताएका हुन् ।

बुधबार काठमाडौंमा सुदूरपश्चिम प्रदेशका आफूनिकट नेताकार्यकर्ताको भेलामा प्रधानमन्त्री ओलीले भने, ‘संविधानको धारा ७६ अनुसार ६४ प्रतिशत बहुमत भएको दलको नेताले सिफारिस गरेकाले संसद विघटन भएको हो । ३४ प्रतिशतमा विकल्प छैन । यसरी संविधानअनुसार विघटित संसद पुनर्स्थापना हुँदैन ।’

संविधानको धारा ८५ मा यसअघि विघटितबाहेक प्रतिनिधिसभाको म्याद ५ वर्षको हुने उल्लेख रहेकाले संसद पुनर्स्थापना नहुने ओलीको तर्क छ ।

ओलीले आफूलाई संसद विघटन गर्न प्रचण्ड–माधव समूहले नै बाध्य पारेको आरोप लगाए । ‘बहुमतको धाकमा राष्ट्रपतिलाई महाअभियोग लगाउछौँ भन्दै हिँडने, प्रधानमन्त्रीलाई अविश्वासको प्रस्ताव ल्याउन बैठक गर्दै हिँड्ने काम उहाँहरूबाट भयो । म त बहुमतको सरकारको नेतृत्व गरिरहेको व्यक्ति हुँ । मैले जनतामा जाने निर्णय गर्नु कसरी असंवैधानिक हुन्छ ?’ ओलीले प्रश्न गरे ।

यसअघि मंगलबार काठमाडौंको प्रदर्शनीमार्गबाट प्रचण्ड–माधव समूहका नेताले गरेको टिप्पणी र लगाएका आरोपबारे ओलीले सविस्तार खण्डन एवं प्रत्यारोप गरे ।

प्रचण्डको टिप्पणीबारे..

नेकपाका अर्का अध्यक्ष प्रचण्डले मंगलबार प्रदर्शनीमार्गमा आयोजित सभामा भनेका थिए, ‘वैशाखपछि ओलीको पत्तासाफ हुने छ ।’

यही सन्दर्भमा ओलीले प्रचण्ड–नेपालको भविष्यवाणी सधैँ असफल हुने गरेको टिप्पणी गरे । भने, ‘प्रचण्डले हिजो भन्नुभएछ– वैशाखको चुनावमा केपी ओली पत्तासाफ हुन्छ । फेरि उहाँ नै भन्नुहुन्छ– चुनाव हुँदैन । तर, जे होस्, उहाँहरूको भविष्यवाणी अहिलेसम्म पुगेको छैन ।’

काठमाडौँको बबरमहलस्थित पार्टी प्यालेसमा बुधबार आयोजित सुदूरपश्चिम प्रदेशस्तरीय कार्यकर्ता भेलामा प्रधानमन्त्री केपी शर्मा ओलीलगायत सहभागी । तस्वीरः चन्द्रकला क्षेत्री/रासस

ओलीले विगतमा आफू बिरामी हुँदा गरिएका भविष्यवाणी पनि नमिलेको बताए । ‘पोहोर म बिरामी परेँ । अब मरिहाल्छ भनेका थिए । उपचार गराउन थाइल्याण्डको बैंकक जाँदा काठको बाकसमा फर्किन्छ भने । म त प्लेनको सिटमै बसेर आएँ’, ओलीले भने, ‘अस्ति अपरेसन गर्दा यो गयो भनेर भविष्यवाणी गरे । म मर्न त मर्छु एक दिन, मरिहाल्छु । उहाँहरूको आकांक्षा पूरा हुन्छ । म मर्छु सत्य हो । मान्छे मरोस् भन्ने कामना विरोधी मात्र होइन, शत्रुलाई पनि गर्नुहुन्न ।’

साथीहरू जस्ताको त्यस्तै

ओलीले पार्टीभित्र आफूईतरका नेताहरूलाई सन्तुष्ट बनाउन आफूले जति प्रयास गरे पनि असफल भएको बताए । एकता जोगाउन आफूले पहल गरे पनि प्रचण्ड–नेपाल समूहका कारण असफल भएको उनको गुनासो थियो । ‘साथीहरूलाई नुहाउनका लागि धेरै डभ साबुन, धेरै स्याम्पु, ट्याङ्कका ट्याङ्क पानी खर्च गरियो । तर, साथीहरू जस्ताको त्यस्तै छन्’, ओलीले भने ।

प्रचण्डसँगका सम्झौताले ब्रिफकेस भरिएको छ

उनले प्रचण्डसँगका सम्झौताहरूले आफ्नो एउटा ब्रिफकेस भरिएको बताए । ‘कति सम्झौता गर्नु ?’, उनले भने, ‘पार्टी एकता गर्दाको आधा–आधा कार्यकाल प्रधानमन्त्री हुने सहमति भए पनि पछि उहाँ (प्रचण्ड)ले नै पार्टीको कार्यकारी अध्यक्ष मागेर मलाई पाँच वर्ष सरकार चलाउन भनेर सम्झौता गर्नुभयो ।’

पार्टीको कार्यकारी अध्यक्षको प्रस्ताव प्रचण्डले नै सचिवालयमा राख्दा आफूले हुन्छ भनेको बताउँदै ओलीले भने, ‘भोलिपल्ट मैले गल्ती गरेँ कि क्या हो कमरेड भनेर मलाई भन्नुभयो ।’

दाहालकै कारण महाधिवेशनको मिति सारिएको ओलीको दाबी थियो । ‘एमालेमै माधव गुट थियो । पूर्वमाओवादी मिलेपछि बहुमत हुन्छ भन्ने कुरा मलाई थाहा थिएन र ? तर, एकता भागवन्डाका लागि थिएन, समृद्धि र स्थायित्वका लागि थियो’, उनले भने ।

कार्की ब्याक्वेटमै जवाफ

संयोग, कार्की ब्याक्वेटमै प्रचण्ड–समूहको केन्द्रीय कमिटीले ओलीलाई कारबाही गर्ने निर्णय गरेको थियो । सोही ब्याक्वेटको हलमा उभिएर ओलीले जवाफ दिए, ‘कारबाही गर्न उहाँहरूले दिएको अध्यक्ष हो र ? मलाई कार्यकर्ताले चुनेका हुन् ।’

चुनावमा आउन आव्हान

भाषणको धेरै समय उनले आफूईतर समूहका नेताहरूको आलोचना र उनीहरूलाई जवाफ दिनमा खर्चिए । उनले एक घण्टाभन्दा बढी भाषण गरेका थिए । समृद्धि र स्थायित्वको पथमा अघि बढ्न खोज्दा प्रचण्ड–नेपाल समूहले अवरोध गरेकाले अहिलेको परिस्थिति उत्पन्न भएको आरोप उनको थियो । उनले प्रचण्ड–नेपाल समूहलाई चुनावमा आउन आह्वान पनि गरे । यति मात्र होइन, चुनावमा आए मिलेर अघि बढ्न तयार रहेको समेत बताए ।

प्रचण्ड–माधव समूहले छुट्टै चुनाव लड्न खोजे केही सिट ल्याउन पनि मुस्किल हुने दाबीसमेत ओलीले गरे । ‘चुनावमा आउनोस्, केही सिट ल्याउनुस् शुभकामना छ । बेकारमा माइतीघरमा बसेर कपडा नबिगार्नुस्’, प्रचण्ड–नेपाललाई उनले कटाक्ष गरे ।

चुनावमा जान डराएको आरोप

उनी यतिमै रोकिएनन्, प्रचण्ड–माधव समूहलाई पखेटा पलाएको कमिलासँग तुलना गरे । ‘कमिलालाई काल आयो भने पखेटा पलाउँछ । पखेटा नपलाएसम्म कमिला दुलोभित्रै बस्छ । तर, पखेटा पलाएपछि उड्न मन लाग्छ, बाहिर निस्कन्छ । बाहिर निस्केपछि चराले टपक्कै टिपेर लान्छ’, ओलीले भने, ‘अहिले यिनीहरू उफ्रिँदै हिँडेका छन् । फुरफुर गर्दै हिँडेका छन् । चुनाव भनेपछि सात्तो गएको छ यिनको । चुनावमा गए त चराले कमिला उडाएजस्तै उडिने हो कि भन्ने डर छ यिनलाई ।’

माधव नेपालबारे टिप्पणी

प्रधानमन्त्री एवं नेकपा अध्यक्ष ओलीले पार्टी वरिष्ठ नेता माधव नेपाललाई ‘प्रचण्डको मामुली’ कार्यकर्ता भने । उनले नेता नेपालबारे आफूलाई टिप्पणी गर्नसमेत मन लाग्न छोडेको बताए । ‘माधव नेपालजीको त मलाई टिप्पणी नै गर्न मन लाग्दैन । किनकि उहाँ प्रचण्डको मामुली कार्यकर्ता बन्न जानुभएको छ’, उनले भने ।

यस क्रममा ओलीले नेता नेपालको क्यारिकेचरसमेत गरे । ‘अपमान ! मलाई मान चाहिन्छ । मलाई पदको लोभ छैन, पद केही होइन, मलाई उधारो चाहिँदैन । हाताहाती चाहिन्छ भन्नुहुन्थ्यो । नगद के रहेछ भन्दा द्वितीय अध्यक्ष पो रहेछ !’, ओलीले नेता नेपालको क्यारिकेचर गर्दै भने ।

झलनाथ खनालबारे

उनले नेता झलनाथ खनाललाई घर कसले बनाउँछ भन्ने कुरासमेत थाहा नभएको भन्दै कटाक्ष गरे । भने, ‘उहाँ (झलनाथ) ले भन्नुभएछ– ओलीले धरहरा बनाएको होइन, इन्जिनियरले बनाएको हो । तर, खनालजीलाई पनि थाहा रहेनछ, घर इन्जिनियरले बनाउँदैन, डकर्मी, कालीगढले बनाउँछ ।’

खनाल कहिले घर बनाएको ठाउँमा नगएकाले उनलाई घर कसले बनाउँछ भन्ने कुरा थाहा नभएको ओलीको टिप्पणी थियो । ‘कहिले घर बनाएको ठाउँमा गएको भए पो थाहा हुनु ।’

यसअघि हिजो खनालले धरहरा केपी ओलीले नभएर कालीगण, सिकर्मी र इन्जिनियरहरूले बनाएको टिप्पणी गरेका थिए । उनले भनेका थिए, ‘रानी पोखरी र धरहरा केपी ओलीलीले बनाएको होइन, कालीगढहरूले बनाएका हुन्, सिकर्मीहरूले बनाएका हुन्, इन्जिनियरहरूले बनाएका हुन् ।’

नेकपामा आन्तरिक विवाद चलिरहेका बेला प्रधानमन्त्री ओलीको सिफारिसमा राष्ट्रपति विद्या भण्डारीले संसद भंग गरी १७ र २७ वैशाखमा चुनाव तोकेकी छन् । यसपछि नेकपा विभाजित भएको छ । यद्यपि, फुटको औपचारिक घोषणा भने भएको छैन । तर, नेताहरू एकले अर्को पक्षलाई लाञ्छित गर्दै आफू नै आधिकारिक नेकपा भएको दाबी गर्दै आएका छन् ।

प्रकाशित मिति: बुधबार, पुस १५, २०७७ १८:५५