नेपाली क्रिकेट टोली स्वदेश फर्कंदै

A+ A A-

घरेलु टोली संयुक्त अरब इमिरेट्स (युएइ) विरुद्धको एकदिवसीय र टी–२० अन्तर्राष्ट्रिय क्रिकेट श्रृंखला जितेको नेपाली राष्ट्रिय क्रिकेट टोली आज दिउँसो स्वदेश फर्कंदै छ ।

दुईवटा ऐतिहासिक श्रृखंला विजेता नेपाली टोली अपरान्ह तीन बजे नेपाल आइपुग्ने कार्यक्रम रहेको नेपाली राष्ट्रिय टोलीका व्यवस्थापक रमन शिवाकोटीले जानकारी दिए । त्रिभुवन अन्तर्राष्ट्रिय विमानस्थलमा ओर्ले लगत्तै नेपाली टोलीलाई भव्य स्वागतको तयारी गरिएको छ ।

राष्ट्रिय खेलकुद परिषद् (राखेप) का उपाध्यक्ष पिताम्बर तिम्सिनाका अनुसार क्रिकेट टोलीको स्वागतका लागि राष्ट्रिय सभाका अध्यक्ष गणेश तिम्सिना, उपप्रधान एवं रक्षामन्त्री ईश्वर पोखरेल, युवा तथा खेलकुदमन्त्री जगतबहादुर विश्वकर्मा, राष्ट्रिय खेलकुद परिषद्का सदस्य सचिव केशवकुमार विष्ट लगायतका पदाधिकारी त्रिभुवन अन्तर्राष्ट्रिय विमानस्थल पुग्ने कार्यक्रम तय भएको छ ।नेपाली टोलीलाई विमानस्थलमा स्वागत गरेसँगै त्रिपुरेश्वरस्थित राखेप परिसर पुर्याइने कार्यक्रम छ ।

नेपाली युवा बलर सन्दीप लामिछाने भने राष्ट्रिय टोलीका साथ आज नेपाल फर्कने छैनन् । लामिछाने बिग बोस लिग खेल्न संयुक्त अरब इमिरेट्स (युएइ) बाट अष्ट्रेलिया जाने भएका कारण आज टोलीसंगै नफर्कने भएका हुन् । उनी सो लिग बीचमै छोडेर बिपिएलका लागि बंगलादेश गएका थिए ।

अष्ट्रेलियामा जारी बिग बोस लिगमा सन्दीप मेलबर्न स्टार्सबाट खेलिरहेका छन् । बिग बोसको शुरुआती चार खेल खेलेर सन्दीप बंगलादेश प्रिमियर लिग (बिपिएल) खेल बंगलादेश आएका थिए ।

घरेलु टोली युएईविरुद्ध नेपालले तीन खेलको एकदिवसीय र तीन खेलकै टी–२० श्रृखंला समान २–१ ले जितेको थियो । दुवै श्रृखंलाको सुरुवाती खेल गुमाए पनि उत्कृष्ट पुनरागमन गर्दै नेपालले दुई श्रृखंला आफ्नो पक्षमा पारेको थियो । गतवर्ष मात्र एकदिवसीय मान्यता पाएको नेपालले पहिलो पटक एकदिवसीय र टी–२० श्रृखंला जितेको हो ।

प्रतियोगितामा नेपालका दुई खेलाडीले विश्व कीर्तिमान समेत बनाएका छन् । रोहितकुमार पौडेल एकदिवसीयमा अर्धशतक बनाउने कान्छो क्रिकेटर बनेका छन् । उनले भारतका पूर्व ब्याट्सम्यान सचिन तेन्दुलकर र पाकिस्तानी खेलाडी शाहिद अफ्रिदीको रेकर्ड तोडेका थिए । यस्तै सन्दीप जोरा टी–२० मा अर्धशतक बनाउने कान्छो खेलाडी बने ।

प्रकाशित मिति: सोमबार, माघ २१, २०७५ १२:०२