माधव बोल्दाबोल्दै ओलीले बैठक रोक्ने अड्डी लिएपछि...

A+ A A-

तीन दिनअघि नेकपा सचिवालयमा अध्यक्ष तथा प्रधानमन्त्री केपी ओलीले पेस गरेको 'काउन्टर' प्रस्तावबारे वरिष्ठ नेता माधवकुमार नेपाल आफ्नो टिप्पणी राख्दै थिए । अकस्मात् ओली बैठकबाट उठ्न खोजे ।

‘तपाईं किन उठ्न खोज्नुभएको ? पख्नुस्, पहिले हाम्रो कुरा सकियोस् ।’

‘अब यहीँ रोकौं । बाँकी भोलि कुरा गरौंला ।’

‘माधवजीको कुरा सकिएको छैन । हाम्रो त बाँकी नै छ’, झलनाथ खनाल र वामदेव गौतमले भने, ‘बैठक रोक्ने यो के तरिका हो कमरेड ?’

‘किनभने तपाईंहरूले बहुमतको तागत देखाउनु खोज्नुभयो नि त । तपाईंहरूले के गर्न खोजेको, अब स्पष्ट भन्नुहोस् । म पार्टीको दुइदिने पाहुना होइन । यही पार्टीमा वर्षाैं जेलनेल खेपेर आएको छु’, ओलीले भने ।

‘ओलीजी, हामीचाहिँ यत्तिकै यहाँसम्म आइपुगेका हाैं भनेर मिनिमाइज गर्न खाेज्नुभएकाे हाे ?' वामदेव गाैतमलाई उद्धृत गर्दै एक नेताले भने ।

‘साथीहरू यहाँसम्म कसरी आइपुग्नुभयाे, आफैं भन्नुहाेला । मैले यत्ति भन्न सक्छु, दुई/चार जनाले बाेकेर ल्याएर म प्रधानमन्त्री र पार्टी अध्यक्ष भएको होइन । अहिले एक ठाउँमा दुई/चार जना उभिएर केही हुँदैन । यो संकटको अवस्था तपाईंले ल्याउनु भएको हो । समाधान गर्नुहोस ।'

ओलीले थपे, 'अरुसँग मैले केही भन्नु छैन । मलाई घेराबन्दीमा पार्ने षडयन्त्र गर्नुभएको छ । तपाईंले कस्तो राजनीति गर्न चाहनु भएको हो । खुमलटारमा एउटा कुरा बालुवाटारमा अर्को कुरा गर्नुहुन्छ । प्रचण्डजीले पेस गर्नुभएको प्रतिवेदन गाउँगाउँमा कुन कार्यकर्तालाई पठाउनु भएको हो । पार्टीभित्र झगडा लगाउन नखोज्नु । पटक-पटक किन बैठक बोलाएर के गर्न खोजिरहनु भएको हो ?'

प्रचण्डले उनकाे प्रतिवाद गरे, 'पार्टी सिद्धान्तमा चल्न जान्नुहुन्न भने निकास दिनुहोला । सरकार सञ्चालन गरिरहनु भएको छ । कतातिर नाच्दै छु भनेर देख्न छाडनुभयो । हिजो जनतासँग गरेका प्रतिवद्धता बिर्सनु भयो ? पार्टीमा नेता कार्यकता के चाहन्छन् सोध्न पनि छोडनुभयो ।

प्रचण्डले दुई तिहाइको सरकारका कामले आफू लज्जित भएकाे टिप्पणीसमेत गरे । पार्टीलाई एकातिर छाडेर ओली अर्कै बाटो हिँडेकाे उनकाे आराेप थियाे ।

'यो राम्रो भएन । तपाईंले पेस गर्नुभएको प्रतिवेदन आरोपपत्र हो कि आफ्नाे बचाउ गर्न ल्याउनु भएको सिफारिस पत्र हो ? प्रष्ट पार्नु होला । अब यस्तो तरिकाले सरकार र पार्टी दुवै चल्न सक्दैनन् । कहिले पाटी दर्ता गर्न उक्साउनु हुन्छ, कहिले सँगै हिँडन सकिँदैन भन्नु हुन्छ । वार कि पारको राजनीति गर्छु भन्नुहुन्छ । के गर्ने मनसाय हाे, सबै साथीका अगाडि प्रष्ट भन्नु होला ।'

सडकमा राजसंस्थाका पक्षमा भइरहेकाे प्रदर्शनलाई लिएर प्रचण्डले ओलीलाई चेतावनीसमेत दिए । 'सरकारका गतिविधिविरुद्ध सडकमा आन्दोलन हुन थालेको छ । जवाफ दिनुहोला ।

बैठकमा वरिष्ठ नेता माधव नेपालले पार्टी र सत्ताकाे चुस्त सञ्चालनमा ओलीले नै अवराेध गरिरहेकाे आराेप लगाए । 'तपाईंले गर्न खोजेको के हो ? के चाहनुहुन्छ ? पार्टी र सत्ता सञ्चालनमा अवरोध गरिरहनु भएको छ । समीक्षा गराैँ भनेर बैठक राख्न खाेज्दा टार्न खाेज्नुहुन्छ ।'

उनले सत्तामा बसेर के काम राम्रो गर्नुभयो भनी प्रश्नसमेत गरे । 'तपाईंको सचिवालयले के गरिरहेको छ । अब जवाफ चाहिन्छ', नेपालले भने ।

विवादका बीच ओलीले बैठक राेकेपछि खनाल र गाैतमले बाेल्न पाएनन् । उनीहरूले भाेलि बुधबार अफ्नाे मत राख्ने बताइएकाे छ ।

प्रकाशित मिति: मंगलबार, मंसिर १६, २०७७ १८:०५