आज दिनभर : प्रचण्ड-खनाललाई चाहियो भाग, कोरोनाले खायो सर्वसाधारणको दिमाग

A+ A A-

आज २२ साउनका नेपाली मिडियामा पनि कोरोना भाइरसकै विषय प्रमुख बनेर आए । यसका अतिरिक्त चलचित्र क्षेत्रका प्राविधिकका दु:ख, कृषि क्षेत्रका समस्या, युट्युबका कारण सिर्जित अराजकता आदि पनि प्रमुख विषय बने आजका मिडियामा ।

०००

कोरोनाका कारण चलचित्र क्षेत्र ठप्प भयो । चलचित्रजन्य कामहरू रोकिए । चलचित्रको छायांकनदेखि रिलिजसम्म रोकियो । त्यसैले चलचित्र प्राविधिकहरू बेरोजगार बन्न पुगे ।

बिहान कमाएर बेलुकाको छाक टार्नेहरूलाई निकै समस्या आइपर्‍यो । त्यसमा केही चलचित्रकर्मीहरू मिलेर मल्हम लगाउने काम पनि गरे । चलचित्र प्राविधिक संघले पनि उनीहरूलाई केही हदसम्मको सहयोग गर्‍यो ।

०००

नेपालमा विश्वसनीय च्यानलभन्दा बढी अरुका दुःख बेच्ने, झैझडा देखाउने\लगाउने, विषय र प्रसंगलाई अतिरञ्जित गर्ने, परिआए प्रहरी, अख्तियार, अदालत सबै बनेर आतंक सिर्जना गर्ने खालका युट्युबतिर धेरै मानिस अलमलिइरहेकाे पाइन्छ । अत्यासलाग्दो कुरा त के भने यस्तै च्यानल हेरेर हाम्राे समाजले धारणा बनाउन थालेको छ ।

०००

१३ प्रकारका क्षेत्रमध्ये सबैभन्दा बढी छुटमा कर्जा लिएको कृषि क्षेत्रले हो । त्यसो त सबै व्यापार व्यवसाय ठप्प रहँदा पनि कृषिक्षेत्र भने सञ्चालनमा नै थियो । ३१ प्रतिशत कृषिसम्बन्धी उत्पादन निरन्तर भइरह्यो भने ५२.६३ प्रतिशत आंशिक रूपमा सञ्चालनमा आएका थिए, जसले गर्दा कर्जा लिनेहरू पनि बढेका छन् ।

०००

कोरोना भाइरस (कोभिड- १९)को संक्रमणबाट काठमाडौंमा मृत्यु हुनेको संख्या २ पुगेको छ । कोरोना संक्रमणका कारण काठमाडौंको चाबहिलस्थित ओम अस्पतालमा १ जनाको मृत्यु भएको हो ।

ओम अस्पतालमा उपचारका क्रममा मृत्यु भएकी धनुषाको मिथिला नगरपालिका- १० लालगढकी ७२ वर्षीया महिलामा संक्रमण पुष्टि भएको हो ।

०००

नेपालमा कोरोना भाइरस (कोभिड-१९) बाट थप ५ जनाको मृत्यु भएको छ । स्वास्थ्य तथा जनसंख्या मन्त्रालयका अनुसार मोरङ, सर्लाही, धनुषा र सप्तरीमा ५ जना संक्रमितको कोरोना संक्रमणका कारण मृत्यु भएको हो ।

०००

सरकारले रुग्ण उद्योगको पहिचान, वर्गीकरण, पुनर्उत्थान, पुनर्निर्माण तथा व्यवस्थापनका लागि सरकारलाई सुझाव दिन दीपक सुवेदीको संयोजकत्वमा ६ सदस्यीय समिति गठन गर्नेलगायत १८ निर्णय गरेको छ ।

१९ साउनमा बसेको मन्त्रिपरिषद् बैठक शहरी विकास मन्त्रालयअन्तर्गत सञ्चालन हुने विकास आयोजना र कार्यक्रम सञ्‍चालनको लागि राजपत्राङ्कित पदका २ सय ९२ अस्थायी दरबन्दी स्वीकृतसमेत दिएको छ ।

०००

विदेशमा अलपत्र नेपालीको उद्धारका लागि भइरहेको जारी उडानमा हिमालय एयरलाइन्सले थप २ दिन चार्टर्ड उडान गर्ने भएको छ ।

यसअघि ३० जुलाईदेखि ७ अगस्टसम्म विभिन्न मुलुकमा उडान तालिका बनाएर चार्टर्ड उडान गरिरहेको हिमालयले थप २ गन्तव्यमा ४ उडान गर्ने निर्णय गरेको हो ।

०००

इपिडिमियोलोजी तथा सरुवा रोग नियन्त्रण महाशाखाका मेडिकल टेक्नोलोजिस्ट धनप्रसाद पौडेलले मङ्गलबार गरिएको ८० जनाको परीक्षणमा २० जना कर्मचारीमा संक्रमण देखिएको जानकारी दिए । यसअघि आयोगमा १५ जना कर्मचारीमा संक्रमण देखिएको थियो । ती संक्रमण देखिएका अधिकांश अग्रपंक्तिमा काम गर्ने कर्मचारी र सुरक्षाकर्मी छन् ।

०००

नक्सालस्थित प्रहरी प्रधान कार्यालयमा कार्यरत थप १० जनामा कोरोना भाइरसको संक्रमण पुष्टि भएको छ ।

महाराजगञ्जस्थित नेपाल प्रहरी अस्पतालमा गरिएको परीक्षणमा थप १० जनामा कोरोना संक्रमण देखिएको प्रहरी प्रवक्ता एसएसपी कुवेर कडायतले जानकारी दिए ।

०००

नेपाल कम्युनिस्ट पार्टी (नेकपा) का अध्यक्ष पुष्पकमल दाहाल (प्रचण्ड)सहित परिवारका सबै सदस्यको कोरोना भाइरस (कोभिड-१९) परीक्षण रिपोर्ट नेगेटिभ आएको छ ।

प्रचण्ड पुत्री गंगा दाहालले फेसबुकमार्फत आफ्नो परिवारका सदस्यमा कोरोना संक्रमिण देखिएको जानकारी दिएकी हुन् । प्रचण्ड, उनका परिवारका सदस्यसहित ५३ जनाको विध म्यानेजमेन्ट प्रालिको प्रयोगशालामा परीक्षण गर्दा ६ जना सुरक्षाकर्मीमा भने संक्रमण देखिएको छ ।

०००

संघीय संसदका प्रवक्ता रोजनाथ पाण्डेलाई कोरोना संक्रमण भएको छ । प्रवक्ता पाण्डेसहित संसद सचिवालयका ८ जना कर्मचारीमा कोरोना संक्रमण देखिएको हो ।

सार्वजनिक लेखा समितिका सदस्य प्रदीप यादवसहितको संसदीय अनुगमन उपसमितिको टोली दुई साताअघि वन व्यवस्थापनबारे अनुगमनका लागि सुदूरपश्चिमसम्म गएको थियो ।

०००

लेबनानको राजधानी बेरुतको प्रमुख बन्दरगाहमा मड्गलबार भएको शक्तिशाली विस्फोटमा परी ज्यान गुमाउनेको संख्या १ सय ३५ पुगेको छ ।

करिब २ हजार ७५० टन ‘एमोनियम नाइट्रेट’ नामक रासायनिक पदार्थ भण्डारण गरेको एक गोदाम घरमा भएको यस विस्फोटनमा परी ४ हजारभन्दा बढी घाइते भएका बताइएको छ ।

०००

प्रधानमन्त्री केपी शर्मा ओलीले सरकारी नियुक्तिहरूमा एकलौटी गरेको भन्दै कार्यकारी अध्यक्ष पुष्पकमल दाहाल (प्रचण्ड_ र वरिष्ठ नेता झलनाथ खनालले गुनासो गरेका छन् ।

बुधबार आफूनिकट पत्रकारसँगको संयुक्त भेलामा कार्यकारी अध्यक्ष प्रचण्ड र वरिष्ठ नेता खनालले सरकारी नियुक्ति गर्दा आफूहरूलाई नसोधेको गुनासो गरेका हुन् ।

प्रकाशित मिति: शुक्रबार, साउन २३, २०७७ ०१:१०