नेपाल दक्षिण एसियाको राइजिङ स्टारः प्रधानमन्त्री (सम्बाेधनकाे पूर्णपाठसहित)

नेपाल दक्षिण एसियाको राइजिङ स्टारः प्रधानमन्त्री (सम्बाेधनकाे पूर्णपाठसहित)

A+ A A-

प्रधानमन्त्री केपी शर्मा ओलीले नेपाल आर्थिक हिसावले दक्षिण एसियाको राइजिङ स्टार भएको बताएका छन् । नयाँ वर्षको अवसरमा आइतबार बिहान प्रधानमन्त्री निवास बालुवाटारबाट देशबासीका नाममा सम्बोधन गर्दै उनले नेपालको विकास र उन्नती अब कसैले पनि रोक्न नसक्ने बताएका हुन् ।

हालै राजधानीमा आयोजना गरिएको लगानी सम्मेलनमा आएका विदेशी पाहुनाहरु तथा वित्तीय क्षेत्रका अधिकारीहरुले नेपाललाई दक्षिण एसियाको उदाँउदो अर्थतन्त्र (राइजिङ स्टार) भनेको प्रसङ्ग स्मरण गर्दै प्रधानमन्त्री ओलीले विकास र समृद्धिको बाटोमा आफूहरुसँग समय छोटो रहेको हुँदा विकास र समृद्धि हासिल गर्न छिटो दौडनुको अर्को विकल्प नभएको बताए । २०७५ मा धेरै ऐन, कानुनहरु बनेको र ती ऐन कानुनहरु विकास र समृद्धिकै मार्ग भएकाले त्यसै मार्गबाट तिब्र गतिमा विकास र समृद्धि हासिल गर्ने बताए ।

उनले आफूपनि विकासका लागि बिहानदेखि बेलुका सम्म दौडिरहेको बताउँदै एक वर्षको अवधिमा आफू ३१४ वटा कार्यक्रममा सहभागी भएको समेत प्रधानमन्त्रीले बताए । यसअनुसारका परिणाम पनि अहिले देखिन थालेको उनको भनाई थियो।

प्रधानमन्त्री ओलीले सरकार प्रगति सुनाउने अवस्थामा पुगेको दाबी गर्दै अब प्रश्न सोध्ने तरिका नै फेर्न समेत सबैलाई आग्रह गरेका छन् । एक वर्षमा के नै भयो ? भनेर निराशा व्यक्त नगर्न आग्रह गर्दै उनले सरकारलाई प्रश्न सोध्ने तरिका फेर्न आग्रह गरे । यो वर्ष कति बाटो बन्यो, कति कानुन बने पानी जहाज कार्यालय खुल्यो कहिलेबाट सञ्चालन हुन सक्छ ? सामाजिक सुरक्षाको अभियानले जेष्ठ नागरिक स्वास्थ्य बिमाबाट आमा बाबालाई कस्तो फाइदा हुन्छ ? जनतालाई कसरी लाभ हुन्छ ? अन्तर्राष्ट्रिय फोरममा भएको सहभागिताबाट नेपालले के फाइदा पाउन सक्छ भन्ने जस्ता विषयमा प्रश्न सोध्न आग्रह गरे । उनले अबको नेपालको एजेण्डा शान्ति,एकता र विकास भएको समेत बताए ।

प्रश्न सोध्नेलाई व्यवहारबाट जवाफ दिन सरकार तयार रहेको समेत उनले बताए । देश र जनता नै सरकारको प्राथमिकता भएको चर्चा गर्दै प्रधानमन्त्रीले भ्रष्टाचारीलाई छानबिनको दायरामा ल्याउने काम भइरहेको र राज्यको अनधिकृत दोहनलाई बन्द गर्ने र जालझेल गरेर हडपिएका सरकारी जग्गा फिर्ता गर्दै ल्याइने समेत बताएका छन् ।

उनले भ्रष्टाचार नियन्त्रण गर्न सरकाले कदम चालिरहेको बताउँदै भ्रष्टाचारी नेपाली हुन नसक्ने समेत बताएका छन् । अहिले सरकार प्रणालीगत स्थायित्व निर्माण गर्ने तहमा आइपुगेको जनाउँदै संयुक्त राष्ट्रसंघीय बालकोषको हालैको प्रतिवेदनले नेपाल सिक्ने तयारीको अवस्थामा पुगेको समेत प्रधानमन्त्रीले चर्चा गरे ।

प्रधानमन्त्री ओलीले अब मुलुकलाई हिंसा र अतिवादबाट मुक्त गरेरै छाड्ने प्रतिबद्धता पनि व्यक्त गरे । उनले अर्को हिंसाको दुष्चक्र किमार्थ स्वीकार्य नहुने धारणा राखे । समृद्धिको अर्को पूर्वसर्त शान्ति हो भन्दै उनले मुलुकबाट पृथकतावाद अन्त्य भएको दावी गरे । ‘अलग देश, अलग राष्ट्रिय झण्डा, अलग राष्ट्रिय गान र अलक संविधानको अभियान चलाउँदै आएको समूहले नेपालको संविधानअनुरुप राजनीतिक क्रियाकलपामा सहभागी हुनु सामान्य विषय होइन,’ प्रधानमन्त्री ओलीले भने, ‘यससँगै मुलुकबाट पृथकतावादको अन्त्य भएको छ भन्ने सुनाउन पाउँदा सन्तोष अनुभव गरिरहेको छु ।’