कोरोना संक्रमित बढेसँगै कञ्चनपुर र दार्चुलाका ४ वडा सिल

A+ A A-

सरकारले लकडाउन खुकुलो बनाए पनि सुदूरपश्चिमका स्थानीय तहहरूले आ–आफ्नो स्थानीय तह सिल गर्न थालेका छन् । सुदूरपश्चिममा दिनप्रति दिन कोरोना संक्रमित थपिँदै गएपछि यहाँका स्थानीय तहले सिल गर्न थालेका हुन् ।

कोरोना भाइरसको संक्रमित बढेसँगै दार्चुलाको मार्मा गाउँपालिकासँग सीमा जोडिएको नौगाड गाउँपालिकाले १ वडाबाट अर्को वडामा प्रवेश बन्द गरेको छ । मार्मा गाउँपालिका–६ सँगको सीमा जोडिएको नौगाड गाउँपालिका–४ मा प्रवेश बन्द गराएको हो ।

नौगाड गाउँपालिकाले सूचना जारी गर्दै वडा नम्बर ४ सिप्टीको पूरै गाउँमा मार्माबाट आवत जावत बन्द गराएको हो । कोरोनाको फैलिने संक्रमण उच्च रहेको भन्दै अर्को सूचना जारी नभएसम्मका लागि पूरै गाउँमा आवतजावत बन्द गराइएको निमित्त प्रमुख प्रशासकीय अधिकृत प्रितमसिह ठगुन्नाले जानकारी दिए ।

यता, कञ्चनपुरको भीमदत्त नगरपालिका–१२ ले पनि कोरोनाको जोखिम बढदै गइरहेको भन्दै मंगलबार राति १० बजेदेखि वडालाई सिल गरेको छ । भीमदत्त नगरपालिका १२ र १३ को सीमानामा भारतबाट आएका र होम क्वारेन्टाइनमा बसिरहेका १ जनामा संक्रमण देखिएपछि वडालाई सिल गर्ने निर्णय गरेको हो ।

स्वाब संकलनपछि ती व्यक्ति घरमा नबसी बजारमा समेत घुमेको, पसलहरूमा गएको पाइएकोले संक्रमण फैलिन नदिन वडालाई सिल गरिएको वडा अध्यक्ष कृष्णसिंह देउपाले जानकारी दिए । उनका अनुसार संक्रमित व्यक्तिको सम्पर्कमा आएका ३४ जनाको पनि पीसीआर गरिएको छ ।

सबैको रिपोर्ट आउन समय लाग्ने र संक्रमण पनि फैलिन सक्ने खतरा रहेको हुँदा अर्को सूचना जारी नहुँदासम्म वडामा रहेका सबै पसल र वडाभित्र आवतजावत पूर्ण रूपमा बन्द गरिएको उनले बताए । यसअघि भीमदत्तका १३ र १७ वडाले पनि जोखिम बढदै गइरहेको भन्दै वडालाई सिल गरिसकेका छन् ।

प्रकाशित मिति: बुधबार, साउन २१, २०७७ ०१:१५