कडा लकडाउनदेखि कर्फ्यु लगाउनेसम्म विज्ञले दिए प्रधानमन्त्रीलाई सुझाव

A+ A A-

काठमाडौं उपत्यकासहित देशभरी नै कोरोना भाइरसको संक्रमणदर बढ्न थालेपछि प्रधानमन्त्री केपी शर्मा ओलीले जनस्वास्थ्य विज्ञ र सरोकारवालाहरूसँग छलफल गरेका छन् । प्रधानमन्त्रीको सरकारी निवास बालुवाटारमा भएको छलफलमा विज्ञहरूले २ हप्ता लकडाउन बढाउनदेखि कर्फ्यु लगाउनुपर्नेसम्मका सुझाव दिएका छन् ।

जनस्वास्थ्य विज्ञ डा. रवीन्द्र पाण्डेले समुदायस्तरमै १ व्यक्तिबाट अर्को व्यक्तिमा संक्रमण फैलिने दर बढेकाले १५ दिन कडा खालको लकडाउन गर्नुपर्ने सुझाव प्रधानमन्त्रीलाई दिइएको बताए । सुरुमा भारतलगायत तेस्रो मुलुकबाट आउनेहरूमा संक्रमण देखिने गरेकोमा पछिल्लो समय नेपालमै बस्ने १ व्यक्तिबाट अर्को व्यक्तिमा संक्रमण फैलिरहेकाले १५ दिन कडा लकडाउन गरी स्वास्थ्य सुरक्षाका मापदण्ड कडाइका साथ अपनाउने गरी अगाडि बढ्नुपर्ने उनले बताए ।

केही विज्ञहरूले भने लकडाउन मात्रै महामारी नियन्त्रणको १ मात्रै उपाय नभएकाले संक्रमण देखिएका निश्चित ठाउँहरू सिलबन्दी गरी सीमानाकामा कडाइ गर्नुपर्ने सुझाव दिएका छन् । अर्का जनस्वास्थ्यविज्ञ डा. समिरमणि दीक्षितले लकडाउन गरेर कोरोना पूर्ण रूपमा नियन्त्रणमा नआउने भएकाले बढी संक्रमण फैलिएको क्षेत्रमा कडाइ गर्नुपर्ने सुझाव प्रधानमन्त्रीलाई दिइएको बताए ।

स्वास्थ्य सुरक्षाका मापदण्ड नअपनाए अवस्था भयावह हुने उल्लेख गर्दै उनले सबैका सल्लाह सुझावअनुसार प्रधानमन्त्रीले उचित निर्णय लिने विश्वास व्यक्त गरे ।

नेताहरू शेरबहादुर देउवा, महन्थ ठाकुर, राष्ट्रिय योजना आयोगका पूर्वउपाध्यक्षलगायत जनस्वास्थ्य विज्ञहरू सहभागि छलफलपछि प्रधानमन्त्री ओलीले सुझावहरू कार्यान्वयन प्रक्रियामा लैजाने बताए । प्रधानमन्त्रीको प्रेस सल्लाहका सूर्य थापाका अनुसार स्वास्थ्य मन्त्रालय, सीसीएमसी र मन्त्रिपरिषदमा छलफल गरेर आगामी कदम चाल्ने प्रतिवद्धता प्रधानमन्त्रीले गरे ।