लागुऔषध कारोबारी र प्रहरीबीच झडप, ६ जना पक्राउ

A+ A A-

मोरङको बूढीगंगा गाउँपालिका– १, आरती स्ट्रिपपछाडि रहेको खोरैया बस्तीमा लागुऔषध कारोबार नियन्त्रणका लागि गएको प्रहरीमाथि बिहीबारराति आक्रमण भएको छ ।

गएराति ९ बजे लागुऔषध नियन्त्रण गर्न गएका सादा पोशाकका तीन जना प्रहरीलाई लागुऔषध कारोबारीले आक्रमण गरी घाइते बनाएका हुन् ।

घाइते हुनेहरूमा प्रहरी जवान ज्ञानबहादुर बस्नेत, जीवन काफ्ले र श्रवण चौधरी रहेका छन् । घाइतेहरूको विराट टिचिङ अस्पतालमा उपचार भइरहेको छ । प्रहरी जवान बस्नेतको टाउकोमा सातवटा टाँका लगाइएको छ ।

प्रहरी निरीक्षक मिलन थापाको नेतृत्वमा गएको टोलीमाथि आक्रमण भएको हो ।

लागुऔषध कोरेक्स र गाँजा स्टोर गरेर बिक्रीका लागि तयारी अवस्थामा राखिएको सूचना पाएर नियन्त्रणमा लिन गएको टोलीमाथि तस्करीमा संलग्न र लागुऔषध कारोबारीले आक्रमण गरेको मोरङ प्रहरी प्रमुख प्रहरी उपरीक्षक सन्तोष खड्काले जानकारी दिए ।

उनका अनुसार प्रहरी पुग्नासाथ स्थानीय लागुऔषको कारोबारीहरूले लाठी, भाला र खुकरी लिएर आक्रमणमा उत्रिएका थिए ।

लागुऔषको कारोबारीले आक्रमण गर्दै प्रहरीसँग भएको हतियार खोस्ने प्रयास गरेपछि टोलीले स्थितिलाई नियन्त्रणमा लिन पेस्तोलबाट दुई राउण्ड हवाई फायरसमेत गरेको प्रहरी उपरीक्षक खड्काले जानकारी दिए ।

घटनापछि थप प्रहरी परिचालन गरेर प्रहरीले लागुऔषधको कारोबारीसहित घटनामा संलग्न ६ जनालाई पक्राउ गरेको छ । उनका अनुसार पक्राउ पर्नेमा बलराम ऋषिदेव, २८ वर्षीय देव ऋषिदेव, २१ वर्षीय वीरेन्द्र ऋषिदेव, २५ वर्षीय महादेव ऋषिदेव, नन्दनीकुमारी ऋषिदेव र एलिशा ऋषिदेव रहेका छन् ।

पक्राउ पर्ने बलराम लागुऔषधको कारोबारी रहेको प्रहरीले जनाएको छ । उनीहरूले घरमा भण्डारण गरी अवैध लागूऔषधको कारोबार गर्ने गरेको बुझिएको छ ।

बलरामले घरमा अवैध लागुऔषध राखेर बिक्री वितरण गर्ने गरेको सूचना पाएपछि नियन्त्रण गर्न उनको घरमा प्रहरी पुगेको थियो । पक्राउ परेकाहरूलाई जिल्ला प्रहरी कार्यालयमा ल्याएर थप अनुसन्धान सुरू गरिएको एसपी खड्काले बताए ।

प्रकाशित मिति: शुक्रबार, साउन १६, २०७७ १७:४९