सामाजिक विकासमन्त्रीको निवासमा कार्यरत कर्मचारीमा कोरोना पुष्टि

A+ A A-

प्रदेश २ का सामाजिक विकासमन्त्रीको निवासमा कार्यरत २ जना कर्मचारीसहित सो मन्त्रालयका ३ जना कर्मचारी कोरोना संक्रमित भएका छन् ।

सामाजिक विकास मन्त्रालय र प्रदेश स्वास्थ्य निर्देशनालयका २२ जना कर्मचारीको पीसीआर परीक्षण हुँदा उनीहरूमध्ये ३ जनामा कोरोना पोजिटिभ देखिएको हो ।

मन्त्रालयमा देखिएको कोरोना पोजिटिभमध्ये सामाजिक विकासमन्त्री नवलकिशोर साहका सवारी चालक, उनको निवासमा भान्सेको रूपमा रहेका कार्यालय सहयोगी र स्टोर किपरलगायत ३ जना संक्रमित भएको प्रदेश स्वास्थ्य निर्देशनालयका वरिष्ठ जनस्वास्थ्य प्रशासक विजयकुमार झाले जानकारी दिए ।

संक्रमितहरू तीनै जना मन्त्री साहकै निवासमा खानासमेत खाने गरेको उनले बताए ।

उता, महोत्तरीको प्रकौलीस्थित नेपाली सेनाको ब्यारेकमा पनि १५ जनाको पीसीआर परीक्षण गर्दा ११ जनामा कोरोना पोजिटिभ भेटिएको उनले जानकारी दिए ।

प्रदेश २ मा कोरोना समुदाय स्तरमा फैलिइसकेको छ । यस प्रदेशमा समाचार तयार पार्दासम्म सबैभन्दा बढी रौतहट जिल्लामा १ हजार २ सय ५५, महोत्तरीमा ७ सय ७२, सर्लाहीमा ७ सय ७, धनुषामा ६ सय ३८, सप्तरीमा ४ सय ५६, पर्सामा २ सय ७८, सिरहामा २ सय १० र बारामा १ सय ६७ जना गरी ४ हजार ४ सय ८३ जना व्यक्तिमा कोरोना संक्रमण पुष्टि भइसकेको छ ।

संक्रमितमध्ये सप्तरीका ३ सय २५, सिरहाका १ सय ५४, धनुषाका ५ सय ३३, महोत्तरीका ३ सय ४४, सर्लाहीका ६ सय २८, रौतहटका ७ सय ४१, बाराका १ सय १६ र पर्साका १ सय ७७ जना गरी ३ हजार १८ जना व्यक्ति डिस्चार्ज भई आ–आफ्नो घर फर्किसकेका छन् भने पर्सामा ५, बारामा २, रौतहटमा २, महोत्तरीमा १, धनुषामा १ र सप्तरीमा १ जना गरी १२ जनाको कोरोना संक्रमणका कारण मृत्यु भइसकेको छ ।

प्रकाशित मिति: बुधबार, साउन १४, २०७७ २२:४३