राजीनामा घोषणा गरेकी उपमेयरको यसरी भयाे ‘यु टर्न’

राजकुमारी चाैधरी, उपप्रमुख, बेलका नगरपालिका, उदयपुर (तस्वीर स्राेत-चाैधरीकाे फेसबुक)

A+ A A-

७ साउनमा उदयपुरकाे बेलका नगरपालिकाकी उपप्रमुख राजकुमारी चौधरीले फेसबुकमा एक पोस्ट सेयर गरिन्, ‘उपमेयर पद पार्टीलाई हस्तान्तरण गर्न चाहन्छु । जनतासँग माफी माग्न चाहन्छु । काला कर्तुतहरूका विषयमा कार्यान्वयन हुँदैन । धिक्कार छ दुईतिहाइ सरकार !’

नगरपालिकाभित्र मनलाग्दी भइरहेको उनको आशय थियो । नगरपालिका न्यायिक समिति संयोजकले नै ‘अन्यायमा परेको’ भन्दै राजीनामाको घोषणा गरेपछि सञ्चारमाध्यमले उनको समाचारलाई ‘कभरेज’ दिए ।

उपप्रमुख चौधरीले सबैतिर एउटै कुरा भनिन्, ‘नगरपालिकाभित्र भ्रष्टाचार व्याप्त छ । नगरप्रमुख र कर्मचारीले मनलाग्दी गरिरहेका छन् । स्काभेटर खरिद गर्दा १२ लाख रुपैयाँ भ्रष्टाचार भएको छ ।’

शिलापत्रलाई दिएको प्रतिक्रियामा उनले यसो भनेकी थिइन्- न्यायिक समितिको प्रमुख भएर पनि म डेढ वर्षदेखि नगरपालिकाभित्रै अपमानित भएर बस्न बाध्य छु । कर्मचारी, प्रहरी प्रशासन सबै मेयरले भनेको मात्र मान्छन्, मैले भनेको केही मान्दैनन् । त्यसो भए मेरो औचित्य के रह्यो ?

हिनामिनासहितका कतिपय फाइल मैले लामो समयसम्म अड्काइदिएँ, मलाई अनेक खालका दबाब दिएर ती फाइल पास गराइएका छन् । भोलि भ्रष्टाचारमा म फस्दिनँ भन्ने के ग्यारेन्टी छ ? यो कुरा मैले पार्टीमा पनि राखेकी छु । अब पार्टीले यसबारेमा के बोल्छ, त्यो हेरेर थप कदम चाल्छु ।

नगरपालिकामा के–के भयो र भइरहेको छ, प्रमाण मसँग छ । स्काभेटर किन्दा १२ लाख भ्रष्टाचार भएको छ । एउटा कर्मचारीलाई राख्न मेयरले किन यति मरिहत्ते गरिरहेका छन् ? यसभित्र के रहस्य छ ? ७ सय ५२ वटा स्थानीय तह त्यो कर्मचारीविना चल्न सक्ने तर बेलका नगरपालिका मात्र चल्न नसक्ने भन्नुमा भित्री कुरा के छ ?

सञ्चारमाध्यममार्फत उनले मेयरसहित केही कर्मचारीलाई लाञ्छित गरेपछि नगरपालिकाका कर्मचारीले विज्ञप्ति निकालेर आपत्ति जनाएका थिए ।

अर्कोतिर, नगरभित्र विपक्षी नेपाली कांग्रेस, जनता समाजवादी पार्टी, राप्रपालगायतले संयुक्त विज्ञप्ति निकालेर नगरभित्र भएको भनिएको भ्रष्टाचारको छानबिन गर्नुपर्ने भन्दै नाराबाजी गरे ।

तस्वीर स्राेत : ध्रुव काेइरालाकाे फेसबुक

उपप्रमुखको अभिव्यक्तिलाई लिएर नगरपालिकामा खैलाबैला मच्चियो ।

तर, ११ साउनमा उपप्रमुख चौधरीले एक प्रेस नोट जारी गरेर सबैलाई चकित पारिदिइन् । प्रेस नोटमार्फत उनी अचानक ‘यु टर्न’ भएकी थिइन् । आत्मआलोचनासहित उनले आफ्नो अभिव्यक्तिबारे स्पष्टीकरण मात्रै दिइनन्, सञ्चारमाध्यममा आफूले भनेका कुरालाई बंग्याइएको तर्क पनि गरिन् । जबकि, धेरैजसो सञ्चारमाध्यमले उनको अडियोसहति अन्तर्वार्ता प्रकाशन तथा प्रसारण गरेका थिए ।

‘७ साउनको अभिव्यक्तिलाई विभिन्न सामाजिक सञ्जाल प्रयोगकर्ता र सञ्चार जगतले आवश्यकताभन्दा बढी प्रचार गरेको विषयप्रति मेरो गम्भीर ध्यानाकर्षण भएको छ’, उनले जारी गरेको प्रेस विज्ञप्तिमा भनिएको छ । तर, ‘आवश्यकता’ के र कति थियो भन्ने कुरा उनले खुलाएकी छैनन् । आफूले फेसबुकमा राखेको स्टाटसको विषयमा समेत उनले प्रस्टीकरण दिएकी छैनन् । उक्त फेसबुक स्टाटस उनले हटाइसकेकी छन् ।

उपप्रमुख चाैधरीले जारी गरेकाे विज्ञप्ति :

कुरा अर्कै

नगरपालिकाका जनप्रतिनिधि र कर्मचारीलाई लाञ्छित गरेपछि नेकपा बेलका नगर कमिटीले उनलाई कारबाही गर्ने चेतावनी दिएको थियो । ‘उपप्रमुख युटर्न हुनुको मुख्य कारण पनि यही हो’, नेकपाका स्थानीय एक नेताले भने, ‘पार्टीले उहाँलाई आत्मआलोचनासहितको प्रेस नोट जारी गर्न निर्देशन दिएको थियो ।’

उनका अनुसार यसबारे मेयरसँग राय तथा उपमेयरसँग स्पष्टीकरण सोध्ने निर्णय पनि पार्टीले गरेको थियो । ‘पार्टीको नगर कमिटीले शक्तिशाली छानबिन आयोग गठन गरी सत्यतथ्य पत्ता लगाउन संसदीय दललाई निर्देशन पनि दिएको थियो । निर्णयअनुसार भोलि (१४ साउन)मा पत्रकार सम्मेलन गरी घटना र यसको छानबिनमा भएको प्रगतिबारे पार्टीले स्पष्ट पार्नेछ’, ती नेताले भने ।

उपप्रमुख चौधरीको विज्ञप्तिलाई प्रमुख प्रतिपक्षी कांग्रेसले अत्यन्तै ‘अपरिपक्व’ र ‘हास्यास्पद’ भनेको छ । कांग्रेस दलका नेता अशोक कार्कीले उपमेयरको ‘यु टर्न’ले बार्गेनिङ झल्काएको बताए । ‘केहीमा भाग नपुगेर यो नाटकीय बार्गेनिङ भएको रहेछ । झन् प्रस्ट भएको छ’, उनले भने ।

उपप्रमुख चौधरी र नगरप्रमुख दुर्गाकुमार थापा एउटै पार्टी अर्थात् तत्कालीन नेकपा एमालेबाट निर्वाचित भएका थिए ।

प्रकाशित मिति: मंगलबार, साउन १३, २०७७ १७:०८