बालुवाटार किन गएनन् गृहमन्त्री बादल ?

A+ A A-

नेकपा नेताहरूबीच अध्यक्ष केपी ओलीले स्थगित गरिदिएको स्थायी कमिटी बैठक चलाउने कि नचलाउने भन्ने विषयमा माथापच्ची भइरहेका बेला एक जना स्थायी कमिटी सदस्य भने मन्त्रालयमा बसेर काम गरिरहेका छन् ।

कहिले कार्यकारी अध्यक्ष पुष्पकमल दाहाल (प्रचण्ड) र माधव नेपाल समूहनिकट त कहिले अर्का अध्यक्ष ओलीनिकटका रूपमा व्याख्या गरिइरहने स्थायी कमिटी सदस्य तथा गृहमन्त्री रामबहादुर थापा बादल अहिले सिंहदरबारस्थित कार्यालयमा काम गरिरहेका छन् ।

स्थायी कमिटीका अधिकांश नेता प्रधानमन्त्री निवास बालुवाटारमा भेला भएका छन् । तर, बादल भने मन्त्रालयमै काममा ब्यस्त छन् ।

गृहमन्त्रीका प्रेस संयोजक किरण भट्टराईका अनुसार मन्त्री हाल मन्त्रालयमै काममा ब्यस्त छन् ।

उता प्रधानमन्त्री ओलीसँग भेट गरेर फर्किएका प्रचण्डले बालुवाटारमा उपस्थित नेताहरूलाई भेटबारे बिफ्रिङ गरेका छन् । प्रचण्डले ब्रिफिङमा भने, 'स्थायी कमिटीको बैठक त भन्न मिलेन तर बैठक बस्नका लागि केही समझदारी गर्नुपर्ने देखियो । ओलीले एकल अध्यक्षजस्तो ठान्नुभो । यसलाई आज बैठक माने दुर्घटना हुन्छ । त्यसैले अब पूर्ण बैठकका लागि गृहकार्य गरौँ ।’

नेकपा नेताबीचको विवाद नाटकीय बन्दै जान थालेपछि अर्का स्थायी कमिटी सदस्य तथा पर्यटनमन्त्री योगेश भट्टराई भने सबैखाले भेला रोकेर सल्लाह गरेर अघि बढेर पार्टी जोगाउनुपर्ने पक्षमा देखिएका छन् । सामाजिक सञ्जाल ट्विटरमा उनले यो अभिव्यक्ति सार्वजनिक गरेका छन् ।

नेपाल कम्युनिस्ट पार्टी (नेकपा)का स्थायी कमिटी सदस्य योगेश भटराईले पार्टी दुर्घटनानजिक पुगेको भन्दै दुर्घटनाबाट जोगाउन शीर्ष नेताको ध्यानाकर्षण गराएका छन् ।

प्रकाशित मिति: मंगलबार, साउन १३, २०७७ १४:२९