सरकारी अध्ययन : लागुऔषध नियन्त्रणको उपाय पर्याप्त रोजगारी सिर्जना

A+ A A-

सरकारले पर्याप्त रोजगारी सिर्जना गर्न सके लागुऔषध नियन्त्रणमा ठूलो सहयोग पुग्ने १ अध्ययनले देखाएको छ । झण्डै ४० प्रतिशत व्यक्तिले बरोगजारीका कारण लागुऔषध प्रयोग गर्ने गरेकोले सरकारले रोजगारी सिर्जनाका लागि विशेष कार्यक्रम ल्याउनुपर्ने अध्ययनले देखाएको छ ।

सीमानाकामा चेकजाँच बढाउने, सचेतना कार्यक्रम गर्ने, निःशुल्क उपचारको व्यवस्था गर्ने र सीप विकासका कार्यक्रम गर्न सके लागुऔषधको प्रयोग घटनाउन सकिने अध्ययनले देखाएको छ । कूल प्रयोगगकर्तामध्ये ३९.७ प्रतिशत बेरोजगारी, १५.९ प्रतिशत व्यापार र १५.६ प्रतिशत दैनिक ज्यालादारी गर्ने व्यक्ति रहेका छन् ।

यसैगरी नोकरी गर्ने, ११.७, अध्ययन ८.७, वैदेशिक रोजगारीमा रहेका ४.१, कृषि क्षेत्रमा ३ र अन्य क्षेत्रमा कार्यरत शून्य.६ प्रतिशत लागुऔषध प्रयोगकर्ता रहेका छन् । गृहमन्त्रालय लागुऔषध विभागका प्रमुख उपसचिव झंकनाथ ढकालका अनुसार लागुऔषध प्रयोग गर्नेको संख्या पनि बढ्दै गएको छ ।

केन्द्रीय तथ्याङ्क विभागको सहयोगमा गृहमन्त्रालयले गरेको अध्ययनअनुसार विस २०६९ को तुलनामा ०७६ सालमा ५.६ प्रतिशतले प्रयोगकर्ताको संख्या बढेको छ । २०६९ मा ९१ हजार ५ सय ३४ जना प्रयोगकर्ता रहेकोमा २०७६ सालमा गरिएको अध्ययनले त्यो संख्या बढेर १ लाख ३० हजार ४ सय २४ पुगेको उनले बताए ।

२०६९ मा गरिएको अध्ययनको तुलनामा २०७६ मा गरिएको अध्ययनले २५ देखि २९ वर्ष उमेर समूहका व्यक्ति लागुऔषधको बढी प्रयोग गर्छन् । साथीहरूको संगतले ६७.७ प्रतिशतले लागुऔषध प्रयोग गर्नेहरू रहेको अध्ययनले देखाएको छ । डुलन्ते विक्रेताबाट १४.१, औषधि पसलबाट ८.४, अन्य पसलबाट ७.२ र इन्टरनेको माध्यमबाट २.५ प्रतिशतले लागुऔषधि लिइरहेका छन् ।

सबैभन्दा बढी ५१.१ प्रतिशतले एकान्त ठाउँ र २०.४ प्रतिशतले घरमै यसको प्रयोग गर्ने गरेका अध्ययनले देखाएको छ । झाडीमा १२.८, होटल तथा रेष्टुरेण्टमा २ प्रतिशत, पाटी-पौवामा डेढ प्रतिशत, पुलमुनि ४.३ प्रतिशतले लागुऔषध सेवन गर्नेहरू रहेका छन् ।

साथीसँगीको दबाबा कारण लागुऔषध प्रयोग गर्नेको संख्या बढी रहेको छ । ८९.४ प्रतिशतले साथीहरुको दबाबमा यसको प्रयोग गर्छन् । ७२.१ प्रतिशले मनोरञ्जनका लागि, ६२.५ प्रतिशतले उत्सुकताका लागि ४५ ६ प्रतिशतले खुसी हुन ३०.६ प्रतिशतले मानसिक तनावका कारण यसको सेवन गर्ने गरेका छन् । यस्तै पारिवारिक समस्याका कारण १८.९, डिप्रेसनका कारण १४.९ र पढाइमा आउने समस्याका कारण ८.९ प्रतिशतले लागूऔषध सेवन गर्ने गरेको अध्ययनले देखाएको छ ।

लागुऔषध सेवनकर्तामध्ये १५ प्रतिशतमा हेपाटाइटिसको समस्या देखिने गरेको छ । मानसिक विचलन ४.१ प्रतिशत, क्षयरोग ४ प्रतिशत, एचआइभी/एड्स ३.५ प्रतिशत र २.५ प्रतिशतमा एसटिडीको समस्या देखिने गरेको छ । ४७.२ प्रतिशत प्रयोगकर्ताहरूले आफ्ना जीवन सुधारका लागि रोजगारी वृद्धि गर्नुपर्ने अपेक्षा राखेका छन् । ३६.९ प्रतिशतले निःशुल्क उपचार, २२.८ प्रतिशतले सीप विकास तालिमको व्यवस्था, २१.१ प्रतिशतले सचेतना कार्यक्रम र १५ प्रतिशतले प्रभावकारी आपूर्ति नियन्त्रण गरे प्रयोगकर्ताहरुको जीवनमा सुधार ल्याउन सकिने अपेक्ष उनीहरूले गरेका छन् ।

प्रकाशित मिति: मंगलबार, असार २३, २०७७ १६:१०