२ सय मिटर दूरीकाे पार्टी बैठकमा पनि किन जाँदैनन् प्रधानमन्त्री ओली ?

A+ A A-

प्रधानमन्त्री निवास बालुवाटारमा सत्तारूढ नेपाल कम्युनिस्ट पार्टी (नेकपा)को स्थायी कमिटी बैठक चलिरहेको छ । तर, प्रधानमन्त्रीसमेत रहेका पार्टी अध्यक्ष केपी शर्मा ओली हम्मेसी बैठकमा जाँदैनन् ।

गत १० असरदेखि सुरू बैठक अहिलेसम्म ६ पटक बस्यो तर ओली बैठकमा २ पटक मात्रै उपस्थित भए । पहिलो दिन उद्घाटन मन्तव्य दिए भने दोस्रो दिन उपस्थित भएनन् । तेस्रो दिनमा उनी अनुपस्थित रहे । चौथो दिन उपस्थित भएका अध्यक्ष ओली पाँचौँ र छैटौँ दिनमा उपस्थित भएनन् ।

जबकि, उनकै निवासमा नेकपाको स्थायी कमिटी बैठक चलिरहेको छ । जुन स्थलमा बैठक चलिरहेको छ, त्यो स्थल र प्रधानमन्त्री निवासमा करिब २ सय मिटरकाे दूरीमा छ । तर, पनि २ सय मिटरयताको बैठक कक्षमा आउँदैनन् उनी ।

किन त ?

ओलीनिकट नेकपा संसदीय दलका उपनेता सुवासचन्द्र नेम्वाङका अनुसार सो बैठक ओलीको अनिच्छामा भएको छ । ‘नेकपाभित्रको विवाद पहिला शीर्ष नेता बसेर टुङ्ग्याउनुपर्ने, त्यसपछि मात्र स्थायी कमिटीमा जानुपर्छ भन्ने अध्यक्ष ओलीको भनाइ थियो तर उहाँको सो भनाइ नमानी अरुले जबर्जस्ती बैठकमा नै सबै कुरा गरौँ भन्नुभयो', नेम्वाङले भने, ‘शीर्ष नेतृत्वबीच सहमति नगरी स्थायी कमिटीमा जाँदा भाँडभैलो हुने उहाँकाे कुरा कसैले सुनेनन् ।’

उनका अनुसार अध्यक्ष ओली पार्टीभित्रको विवाद २ अध्यक्षको तहमा र त्यहाँ सम्भवः नभए सचिवालय तहमा न्यूनतम सहमति गरेर मात्रै बैठक सञ्चालन गर्नुपर्ने पक्षमा थिए । तर, कार्यकारी अध्यक्ष पुष्पकमल दाहाल प्रचण्ड, वरिष्ठ नेताद्वय माधव नेपाल, झलनाथ खनाललगायत ओलीको सर्त स्वीकार गरेनन् ।

‘स्थायी कमिटी बैठक बोलाउने विषयमा नै ओलीको सहमति थिएन, त्यहाँ उनले जवाफ दिन किन जानु ? किन अरुको कुरा सुन्नु ?’, ओलीनिकट एक स्थायी कमिटी सदस्यले भने ।

उनका अनुसार स्थायी कमिटीभन्दा पहिला नै २ अध्यक्ष र सचिवालय तहबाट नै समस्याको समाधान गरेर स्थायी कमिटीमा जाने ओली मतको कुनै सुनवाइ भएन ।

स्थायी कमिटी बैठक आफूलाई घेराबन्दी गर्नका लागि डाकिएकाे ओलीको बुझाइ छ । उनलाई त्यो मन परेको छैन्, त्यसमाथि ओलीले ‘गुटका बैठक बसेर निर्णय गर्ने’ अनि ‘बाहिर’ गरिएका निर्णय आफूले मान्नुपर्ने भन्दै निरन्तर असहमति जनाउँदै आएका छन् ।

प्रकाशित मिति: शुक्रबार, असार १९, २०७७ १०:२९