माछापुच्छ्रेमा १७ करोड ५५ लाख लागतमा बहुउद्देश्यीय टेनिङ सेन्टर बन्दै

A+ A A-

अखिल नेपाल फुटबल संघ (एन्फा)ले कास्कीको माछापुच्छ्रे गाउँपालिकामा बहुउदेश्यीय फुटबल ट्रेनिङ सेन्टर स्थापना गर्ने भएको छ । माछापुच्छ्रे गाउँपालिकाको भेडावारीमा बन्ने बहुउद्देश्यीय फुटबल ट्रेनिङ सेन्टर निर्माणका लागि नयाँ आर्थिक वर्षमा एन्फाले १७ करोड ५५ लाख रुपैयाँको बजेटसमेत छुट्याएको हो ।

सरकारको ‘एक गाउँपालिका एक पुटबल मैदान’ निर्माण गर्ने अभियान अन्तरगत बुहुउद्देश्यीय ट्रेनिङ सेन्टर निर्माण प्रक्रिया अगाडि बढेको कास्की जिल्ला फुटबल संघ एन्फाका अध्यक्ष मिलन गुरुङले जानकारी दिए । ‘गण्डकी प्रदेशको लागि फिफा मापदण्डअनुसारको सुविधासम्पन्न ट्रेनिङ सेन्टरको स्थापना गर्न लागेको हौँ’ उनले भने, ‘ट्रेनिङ सेन्टर निर्माणका लागि एन्फाको केन्द्रीय कार्यसमितिले बैठकले बजेट छुट्याएको छ ।’

विश्व फुटबल महासघं (फिफा) को सहयोगमा एन्फाले कास्कीमा ट्रेनिङ सेन्टर बनाउन लागेको गुरुङले बताए । करिब २ सय ५२ रोपनी जग्गा निर्माण हुने ट्रेनिङ सेन्टरका लागि गाउँपालिकाले जग्गा उपलब्ध गराएको छ ।

ट्रेनिङ सेन्टर निर्माणको विस्तृत परियोजना रिपोर्ट (डीपीआर) अनुसार करिब ३५जनासम्मलाई आवाशीय सुविधा सहितको व्यवस्था हुनेछ । सरकारले एन्फालाई जग्गा भोगचलन गर्न दिइसकेको अध्यक्ष गुरुङले बताए ।

‘कास्कीमा बन्न लागको बहुउद्देश्यीय ट्रेनिङ सेन्टरको लागि केन्द्रीय अध्यक्ष कर्माछिरिङ शेर्पा, खेलकुदमन्त्री तथा गण्डकी प्रदेशभित्र रहेका एन्फा अध्यक्षको महत्वपूर्ण भूमिका छ’ गुरुङले भने ‘जग्गा भने माछापुच्छ्रे गाउँपालिकाका अध्यक्ष कर्ण गुरुङको विशेष पहलमा उलब्ध भएको हो ।’

ट्रेनिङ सेन्टरमा राष्ट्रिय फुटबल टिम, रेफ्री, प्रशिक्षक तथा विभिन्न उमेर समूहको अभ्यास तथा ट्रेनिङहरू सञ्चालन गर्ने लक्ष्य राखिएको छ । नेपालकै ड्रिम प्रोजेक्टका रूपमा निर्माण गर्न लागेको ट्रेनिङ सेन्टर निर्माणले गण्डकी प्रदेशको फुटबल विकासमा ठूलो योगदान पुग्ने अपेक्षा गरिएको छ ।

अध्यक्ष गुरुङका अनुसार ५ हजार दर्शक क्षमता सहितको तीन प्राकृतिक मैदान, दुई कृतिम (आर्टिफिसियल) मैदान, दुई बालुवा मैदान, स्विमिङ पुल, रेष्टुरेन्ट, पुस्तकालय, जिमहल र सभा हल समेत निर्माण गरिनेछ ।

अहिलेको प्रारम्भिक बजेट भएको र फिफाबाट क्रमश बजेट बिनियोजन हुदै जाने बाताइएको छ । फिफाले परियोजना ३ चरणमा सक्न एन्फालाई निर्देशन दिएको छ ।

प्रकाशित मिति: बिहीबार, जेठ २२, २०७७ १५:१०