प्रहरी–व्यवसायी विवादः पसल बन्द गर्ने र खोल्ने होडबाजी

A+ A A-

मकवानपुर उद्योग वाणिज्य संघको नेतृत्वमा हेटौँडाका अधिकांश पसलहरू खुलेपछि प्रहरी परिचालन गराएर बन्द गराइएको छ ।

बागमती प्रदेशको राजधानी हेटौँडामा बुधबारदेखि सबै पसल खुल्ने भन्दै जारी लकडाउन उल्लंघन गर्ने चेतावनी संघले दिएको थियो । लकडाउनको उल्लंघन गर्दै बुधवार बिहानैदेखि हेटौँडाका सबै पसल खुलेका थिए ।

व्यवसायीले प्रशासनको अनुमतिबिनै पसल खोलेपछि मकवानपुरका प्रहरी जिल्ला अधिकारी दीपक राज नेपालले प्रहरी खटाएर बन्द गराउन लगाए ।

पसल बन्द गराउँदै हिँडेको प्रहरीसँग व्यवसायीको विवाद भएको छ । मकवानपुर उद्योग वाणिज्य संघका केन्द्रीय सदस्य राजकुमार न्यौपाने, संघका अध्यक्ष कृष्ण कटुवाल, वरिष्ठ उपाध्यक्ष माधव न्यौपानेलगायतले व्यवसायीहरूको नेतृत्व गर्दै प्रहरीसँग विवादमा उत्रिएका थिए ।

लकडाउन जारी रहेको अवस्थामा पसल खोल्ने अनुमति व्यवसायीलाई नभएको भन्दै प्रहरीले बन्द गर्न आग्रह गरेको थियो । लकडाउन कार्यान्वयन गराउने जिम्मेवारी बोकेको प्रहरीलाई अवरोध नगर्न प्रहरीले व्यवसायीलाई आग्रह गरेको थियो ।

व्यवसायीहरूले लामो समयसम्म लकडाउन हुँदा आफूहरु मर्कामा परेको भन्दै पसल खोल्न पाउनुपर्ने धारणा राखेका थिए । हेटौँडाका मुख्य बजारमा केही बेर पसल खोल्न र बन्द गराउन व्यवसायी र प्रहरीबीच होडबाजी नै चल्यो ।

संघको आग्रहमा अत्यावश्यक बाहेकका पसल प्रहरीले बन्द गरायो । लगत्तै प्रहरीले बन्द गराएको पसल व्यवसायीहरूले खोल्दै हिँडे । मेनरोड, राप्तिरोड, स्कूलरोड, कान्तिराजपथ, पारिजातपथ, टीसीएन रोड, बसपार्कलगायतका बजारमा कपडा, जुत्ता पसलदेखि साना होटल र मदिरा पसल पनि खुलेका थिए ।

आज खुलेका अत्यावश्यक सेवाबाहेकका सबै पसलहरू बिहान ९ बजेपछि बन्द भएका थिए । मकवानपुर प्रशासनले बिहान ६ देखि ९ बजेसम्म अत्यावश्यक सेवाका पसलहरू मात्रै खुल्ने अनुमति दिएको थियो । मकवानपुरका प्रमुख जिल्ला अधिकारी दीपकराज नेपालले अनुमतिबिना अत्यावश्यक सेवाबाहेकका पसलहरू खोल्न नपाइने बताए ।

उद्योग वाणिज्य संघको संस्थागत सहमतिका आधारमा हेटौँडाका पसलहरू खोलिएको संघका अध्यक्ष कृष्ण कटुवालले बताए । व्यवसायीलाई करको ताकेता, भोकभोकै बस्नुपर्ने बाध्यता भएपछि पसल खोल्न बाध्य भएको उनको भनाइ छ ।

प्रकाशित मिति: बुधबार, जेठ २१, २०७७ १४:३१