सुदूरपश्चिममा पहिलो पटक स्वास्थ्यकर्मीलाई कोरोना संक्रमण, भन्छन्, 'सीमामा सुरक्षित हुन सकिनँ'

सुदूरपश्चिममा पहिलो पटक स्वास्थ्यकर्मीलाई कोरोना संक्रमण, भन्छन्, 'सीमामा सुरक्षित हुन सकिनँ'

A+ A A-

सुदूरपश्चिम प्रदेशमा पहिलो स्वास्थ्यकर्मीमा पनि कोरोना भाइरसको संक्रमण देखिएको छ । कञ्चनपुरको पुनर्वासमा कार्यरत एकजना स्वास्थ्यकर्मीमा कोरोनाको संक्रमण पुष्टि भएको हो ।

धनगढीस्थित प्रयोगशालामा गरिएको परीक्षणका क्रममा पुनर्वास नगरपालिकामा कार्यरत ३६ वर्षीय स्वास्थ्यकर्मीमा कोरोना संक्रमण पुष्टि भएको हो ।

स्वास्थ्य कार्यालय कञ्चनपुर स्रोतका अनुसार संक्रमित स्वास्थ्यकर्मी कोरोना देखिएपछि आफैं उपचारका लागि सेती प्रादेशिक अस्पताल धनगढी आएका छन् ।

भन्छन् : सीमामा सुरक्षित हुन सकिनँ

कञ्चनपुरको पुनर्वास नगरपालिकाका ३६ वर्षीय ल्याब असिस्टेन्ट त्रिनगर नाकामा नागरिकको स्वास्थ्य परीक्षणमा खटिएका थिए । ८ जेठमा ८ सयभन्दा बढी नेपालीको उद्धार गरियो ।

सोही भीडमा रहेका १० जनाभन्दा बढीलाई कोरोना पुष्टि भयो । उनी भन्छन्, ‘नाकामा व्यक्तिगत सुरक्षा सामग्री त प्रयोग गरेकै थिएँ, तर, सीमामा भीड धेरै भएकाले आफूलाई पूर्ण रूपमा सुरक्षित भने राख्न सकिएको थिएन । सोही दिनदेखि आफूमाथि पनि आशंका उब्जिएको थियो ।’

उनले सीमा क्षेत्रमा र्‍यापिड टेस्ट बन्द भए पनि विभिन्न क्वारेन्टाइनमा गएर र्‍यापिड टेस्ट र शंकास्पद बिरामीको स्वाब संकलन गरे । १७ गते आफ्नो समेत स्वाब संकलन गरेर पठाए ।

‘मंगलबार दिउँसो मेडिकल ल्याब एसोसिएसन अफ नेपालको धनगढीमा छलफल थियो । म पनि जिल्ला सदस्य भएकाले छलफलका लागि धनगढी आएको थिएँ । प्रयोगशालाकर्मीकै रिपोर्ट पोजिटिभ आएको जानकारी भएपछि सुरुमा त विश्वास लागेन । सत्य खबर रहेछ । पछि विश्वास गर्नैपर्‍यो । त्यसपछि मोटरसाइकलमै सेती अस्पतालतर्फ हानिएँ ।’

‘मैले स्वाब संकलन गरेका चार जनामा कोरोना पुष्टि भएको जानकारी पाएको छु,’ उनले भने, ‘स्वाब संकलनकै क्रममा कोरोना सरेको होला जस्तो त मलाई लाग्दैन । किनकि मैले व्यक्तिगत सुरक्षाका सामग्री प्रयोग गरेको थिएँ । सतर्कता पनि अपनाएको थिएँ । तर, सीमामा सयौँको भीड भएकाले आफूलाई सुरक्षित राख्न सकेनजस्तो लागिरहेको छ ।’