नेपाली क्रिकेट टोलीलाई प्रधानमन्त्रीको बधाई

A+ A A-

युएईसंगको अन्तर्राष्ट्रिय एक दिवसीय सिरिज जितेको नेपाली राष्ट्रिय क्रिकेट टोलीलाई प्रधानमन्त्री केपी शर्मा ओलीले बधाई दिएका छन ।

सामाजिक सञ्जाल ट्वीटरमार्फत प्रधानमन्त्री ओलीले नेपाली टोलीलाई बधाई दिएका हुन । उनले पछिल्लो सफलताले खेल जगतमा नेपाल उदीयमान शक्तिका रूपमा देखिएको उल्लेख गरेका छन् । प्रधानमनत्री ओलीले खेलकुद क्षेत्रको विकासका लागि सरकारले थप ध्यान दिनेमा प्रतिबद्धता समेत व्यक्त गरेका छन् ।

बधाई सन्देशमा प्रधानमन्त्रीले भनेका छन्– ‘एक दिवसीय क्रिकेट श्रृंखला जित्दै नेपाललाई गौरवशाली सफलता दिलाएकोमा नेपाली राष्ट्रिय क्रिकेट टोलीलाई बधाई । अन्तर्राष्ट्रिय क्रिकेटमा प्राप्त यस सफलताले विश्व खेल जगतमा नेपाल उदीयमान शक्तिको रूपमा देखिएको छ, खेलकुद क्षेत्रको विकासका लागि सरकारले थप ध्यान दिने विश्वास दिलाउँछु ।’

नेपालले सोमबार यूएईमा जारी तीन खेलको श्रृंखला २–१ ले जित्दै ऐतिहासिक सफलता प्राप्त गरेको थियो ।

प्रधानमन्त्री ओलीले कम उमेरमा अन्तर्राष्ट्रिय एकदिवसीय श्रृंखलामा अर्धसतक प्रहार गर्ने किर्तिमान कायम गरेका रोहित कुमार पौडेललाई पनि बधाई दिएका छन । उनले युएइ बिरुद्ध आइतबार भएको दोस्रो खेलमा ५५ रन बनाए ।

यस अघि सबै भन्दा कम उमेरमा अन्तर्राष्ट्रिय क्रिकेटमा अर्ध शतक बनाउने रेकर्ड भारतका स्टार ब्याट्सम्यान सचिन तेंदुलकरको नामा थियो भने एक दिवसीय अन्तर्राष्ट्रियमा अर्ध शतक बनाउने रेकर्ड पाकिस्तानका आक्रामक ब्याट्सम्यान शाहिद आफ्रिदीको नाममा थियो ।

सचिन तेंदुलकारले २३ नभम्बर १९८९ मा पाकिस्तानसँगको टेस्ट म्याचमा ५९ रन बनाउँदै सबै भन्दा कान्छो उमेरमा अर्धशतक बनाउने रेकर्ड कायम गरेका थिए । त्यसबेला सचिनको उमेर १६ वर्ष २ सय १७ दिन थियो ।

शाहिदले क्रिकेट क्यारियको पहिलो खेलमा केन्यामा खेल्दै अक्टुबर १९९६मा श्रीलंका विरुद्ध यो रेकर्ड कायम गरेका थिए । उनले त्यसबेला १ सय २ रन बनाएका थिए । एक दिवसीय अन्तर्राष्ट्रियमा अर्धशतक बनाउने कान्छा खेलाडी बन्दा आफ्रिदीको उमेर १६ वर्ष २ सय १७ दिन थियो । रोहितले १६ वर्ष १ सय ४६ दिनमा अर्धशतक बनाउँदै विश्व किर्तीमान बनाएका छन् ।

प्रकाशित मिति: मंगलबार, माघ १५, २०७५ १५:२६