कोभिड–१९ : टोखाद्वारा २ करोड ५० लाखको कोष स्थापना

A+ A A-

काठमाडौँको उत्तरी क्षेत्रमा रहेको टोखा नगरपालिकाले कोरोना नियन्त्रणका लागि २ करोड ५० लाख रुपैयाँको राहत कोष स्थापना गरेको छ ।

टोखाको शुक्रबार बसेको ५२औँ कार्यपालिकाको बैठकले विश्वव्यापी रुपमा फैलँदै गएको नोबेल कोरोना भाइरसबाट हुनसक्ने सम्भावित सङ्क्रमणलाई ध्यानमा राखेर सो नगद राशिको कोष स्थापना गरेको हो ।

नगरपालिकाका प्रमुख प्रकाश अधिकारी कोभिड–१९ बाट हुनसक्ने भैपरी समस्या समाधानका लागि ‘कोरोना सङ्क्रमण, रोकथाम तथा उपचारका कोष’ स्थापना गरेको बताए ।

कोषमा रकम जम्मा गर्न इच्छुक व्यक्ति तथा सङ्घसंस्थालाई आह्वान गर्ने निर्णयसमेत बैठकले गरेको छ ।

टोखाले नगर विपद् व्यवस्थापन समितिको बैठक र राहत वितरण मापदण्ड निर्धारण उपसमितिले निर्धारण गरेको मापदण्ड, उपत्यका नगरपालिका फोरम र सरकारले तोकेको मापदण्डलाई आधार मानी वडास्तरबाट राहत वितरण गर्ने निर्णय गरेको छ ।

यसअघि टोखाले राहत वितरण मापदण्ड निर्धारणका लागि उपप्रमुख ज्ञानमाया डङ्गोलको संयोजकत्वमा छ सदस्यीय कार्यसमिति निर्माण गरेको थियो ।

राहत वितरण उपसमितिको बैठकको निर्णयअनुसार वडाध्यक्ष वा वडाध्यक्षले तोकेको सदस्यको संयोजकत्वमा राहत पहिचान तथा वितरण गर्नका लागि पाँच सदस्यीय सर्वपक्षीयसहितको छानविन समिति गठन गरेको छ ।

टोखाले राहत वितरणका लागि यसभन्दा पहिले सबै वडालाई १/१ लाख नगद विनियोजन गरेको थियो । शुक्रबारको बैठकले वडा नं. १ मा ४ लाख र अरु १० वडामा पेश्कीस्वरुप ७/७ लाख रुपैयाँ विनियोजन गरेको नगरप्रमुख अधिकारीले जानकारी दिए ।

टोखा नगरपालिकाले बनाएको राहत मापदण्डअनुसार ३ जनाभन्दा धेरै व्यक्ति भएको परिवारलाई ३० किलोग्राम चामल, ३ किलोग्राम दाल, २ प्याकेट नुन, २ लिटर खानेतेल, ४ पुरिया साबुन र २ किलोग्राम चिनी रहेको छ ।

२ जनासम्मको परिवारले ३ जनाभन्दा धेरै व्यक्ति भएको परिवारभन्दा आधा खाद्यान्न पाउनेछन् । टोखा नगरपालिकाले रकमको आधारमा ३ जनाभन्दा बढी परिवारलाई २ हजार ५ सय रकम बराबरको खाद्यान्न र त्यसभन्दा कम व्यक्ति भएको परिवारलाई २ हजार २ सय ५० रकम बराबरको खाद्यान्न वितरण गर्नेछ । रासस

प्रकाशित मिति: शनिबार, चैत २२, २०७६ १३:५९