म्याग्दीमा २ महिनालाई पुग्ने खाद्यान्न मौज्दात

A+ A A-

हिमाली जिल्ला म्याग्दीमा दुई महिनाका लागि पुग्ने खाद्यान्न मौज्दात रहेको छ ।

विभिन्न उद्योगका आधिकारिक बिक्रेतासँग मौज्दात रहेको खाद्यान्नले जिल्लावासीलाई २ महिना पुग्ने म्याग्दी उद्योग वाणिज्य सङ्घले जनाएको छ ।

कोरोना भाइरस रोकथामका लागि गरिएको लकडाउनको अवधिमा पनि ग्रामीण क्षेत्रमा खाद्यान्न आपूर्ति भैरहेको सङ्घका अध्यक्ष उत्तम कर्माचार्यले बताए ।

बेनीका चामल डिलरसँग १० हजार २ सय ९३ बोरा, नुन ५ सय ४३ बोरा, खानेतेल १ हजार ६ सय १७ कार्टुन, २ सय८८ बोरा दाल, ५ सय २५ बोरा चिनी, ८ हजार लिटर पेट्रोल, ३० हजार लिटर डिजेल र ३ हजार लिटर मट्टितेल मौज्दात रहेको सङ्घका महासचिव लीलाराम गौतमले बताए ।

विपन्नलाई वितरण गर्न रघुगंगा गाउँपालिकाले २ सय ५० बोरा, अन्नपूर्णले २ सय, धवलागिरीले २ सय र मालिकाले १ सय ५० बोरा चामल खरीद गरेर राखेको जनाएका छन् ।

खाद्यान्न पसल र ढुवानीमा लकडाउनको प्रभाव नपरेपनि उद्योगमा कर्मचारीले कोरोनाको त्रासले काम गर्न छाडेकाले उत्पादनसँगै बजारमा आपूर्ति भने घटेको छ ।

बेनीमा बुधबार म्याग्दी उद्योग वाणिज्य सङ्घको आयोजनामा जनप्रतिनिधि, प्रशासन, सुरक्षा अधिकारी, घरेलु तथा साना उद्योग कार्यालय, स्थानीय तह र व्यापारीबीच जिल्लामा खाद्यान्न मौज्दात र आपूर्तिका सम्बन्धमा छलफल भएको थियो ।

सहभागीले बजारमा नुन, तेल र ग्यासको अभाव हुनुका साथै खाद्यान्न पदार्थको मूल्यसमेत बढेको पाइएकाले त्यसलाई नियमन गर्नुपर्ने बताएका थिए ।