प्रधानमन्त्रीको किचनमा 'ठग'को रजगज

A+ A A-

स्कट बर्न्सको लेखनमा स्टिभन सडरबर्गले सन् २०११ मा बनाएको ‘कन्टेजन’ चलचित्र कोरोना भाइरसजस्तै एमईभी–१ भाइरस र त्यसले विश्वलाई पुर्‍याएको क्षतिसँग सम्बन्धित छ । संसारभर एमईभी–१ को प्रकोपले लाखौं मानिस मरिरहेका बेला कतिपय मानिस उक्त परिस्थितिको फाइदा लुटिरहेको दृष्य चलचित्रमा देखाइएको छ । त्यस्ता मानिसहरूको प्रतिनिधिका रूपमा एलन नामको पात्रलाई प्रस्तुत गरिएको छ । एलन झण्डै १ करोड फलोअर्स भएको ब्लगर हुन्छ ।

एमईभीको औषधी पाइएको दाबी गर्दै एक फार्मेसीसँग मिलेर एलनले पैसा कमाउने युक्ति निकाल्छ । उसको यो चाल कसैले बुझ्दैनन् । जब उसलाई प्रहरीले पक्राउ गर्छ तब मात्र उसले स्वीकार गर्छ कि आफूले एक फार्मेसीसँग मिलेर पैसाका लागि ‘छल’ गरेको हो । तर, उसको यो छलका कारण लाखौं स्वस्थ मानिस पनि संक्रमित हुन्छन् र मृत्युको मुखमा पुग्छन् ।

चलचित्र बनेको ९ वर्षपछि विश्व वास्तवमै एमईभीजस्तै खतरनाक महामारीसँग जुधिरहेको छ ।

नेपाल पनि कोविड–१९ को त्रासबाट मुक्त छैन । यसको प्रकोप रोकथाम गर्ने सरकारको योजनालाई साथ दिएर आम नेपाली घरघर बसेका छन् ।

तर, यो मानवीय संकटको घडीमा नेपालमा पनि एलनजस्ता पात्र देखिएका छन् । त्यो पनि अन्त कतै नभएर प्रधानमन्त्री केपी शर्मा ओलीकै वरिवरि । कन्टेजनमा एलनले आफ्नो व्यक्तिगत प्रभावको दुरुपयोग गरेको देखाइएको छ । तर, प्रधानमन्त्री वरिवरिका केही व्यक्तिले जिम्मेवारी र निकटताको दुरुपयोगसँगै संकटको यो समयमा राज्यको ढुकुटी ‘लुट्ने’ प्रयास गरेको खुल्न आएको छ ।

सरकारले कोविड–१९ को प्रकोप रोकथाम तथा नियन्त्रणका लागि चीनबाट स्वास्थ्य उपकरण खरिद गर्न ओम्नी समूहसँग गरेको सम्झौता आजै मात्र रद्द गरेको छ । यसमा ओम्नी समूहले सम्झौताअनुसार काम गर्न नसकेको एक मात्र कारण देखाइएको छ । हुन त, सम्झौता भएलगत्तै धेरैले यसको विरोध गरेका थिए । किनकि, बजार मूल्यभन्दा अति महङ्गोमा सामान ल्याउने गरी सम्झौता भएको थियो ।

विरोधका बाबजुद प्रधानमन्त्री ओलीलाई ‘गलत ब्रिफिङ’ गरी सम्झौता गरियो र प्रक्रिया अघि बढाइयो । यसमा मध्यस्थकर्ताको भूमिका खेल्ने प्रधानमन्त्रीका केही सल्लाहकार थिए । उनीहरूले ‘भाग’ लगाएरै यसरी जोखिम मोलेको अनुमान लगाउन सकिन्छ । सत्यतथ्य के हो सरकारले बाहिर ल्याउनुपर्छ भन्ने मत धेरैको छ ।

स्रोतका अनुसार प्रधानमन्त्री ओलीले ठूलो आर्थिक चलखेल भएको थाहा पाएपछि सम्झौता रद्द गर्ने निर्णय लिएका हुन् । उनकै आदेशमा स्वास्थ्य मन्त्रालयले ओम्नी समूहसँगको सम्झौता रद्द गरेको बताइएको छ ।

सम्झौता रद्द भएसँगै यसमा ठूलो चलखेल थियो भन्ने कुरा पुष्टि पनि भएको छ । अब त यो झन् छानबिनको विषय हो ।

आफूलाई गलत ब्रिफिङ गर्ने सल्लाहकार र उनीहरूको उद्देश्यबारे प्रधानमन्त्रीले आफ्नै एक शुभचिन्तकबाट थाहा पाएका छन् ।

यसमा को–को संलग्न थिए र प्रधानमन्त्रीले उनीहरूलाई के कारबाही गर्छन्, त्यो हेर्न बाँकी छ ।

यसअघि खासै गतिलो काम गर्न नसकेको भन्दै सहयोगी र सल्लाहकार हेरफेर गरेका ओलीले यो संकटको घडीलाई कमाउने अवसर बनाउने सल्लाहकारमाथि कडा कारबाही गर्नुपर्ने आवाज सामाजिक सञ्जालमा उठिरहेको छ ।

यस्तो संकटको घडीमा राज्यको ढुकुटी र लाखौँ नेपालीको ज्यानमाथि खेलवाड गर्न खोज्ने जोकोही भए पनि सरकारले उन्मुक्ति दिन हुँदैन । यतिबेला सक्नेजति सहयोग, योगदान गरेर मुलुकलाई क्षतिबाट बचाउन भूमिका खेलनुपर्नेमा उल्टै ढुकुटी लुट्न लाग्नेहरू देशका शत्रु हुन् ।

यस्तो बेलामा त मानवीयताको ख्याल नगर्नेले सामान्य अवस्थामा देश र जनताको बारेमा सोच्लान् भनेर पत्याउन सकिँदैन । त्यसैले प्रधानमन्त्री ओलीले यो अनियमिततामा संलग्न जो सुकै भए पनि कारबाही गराउनै पर्छ । पटक–पटक वरिपरिकै व्यक्तिबाट बद्नाम भइरहेका प्रधानमन्त्री ओलीले यो घटनालाई गम्भीरपूर्वक लिएर कारबाही प्रक्रिया अघि बढाउन नलगाएर बचाउनतिर लाग्दा उनलाई नै घाटा छ ।

प्रधानमन्त्री ओलीले भ्रष्टाचारीविरोधी अभिव्यक्ति दिए पनि उनका आसेपासेको रवैयाका कारण धेरैले पत्याएका छैनन् । त्यसैले जनतालाई विश्वास दिलाउन प्रधानमन्त्री ओलीका लागि यो एउटा अवसर पनि हो ।

प्रकाशित मिति: बुधबार, चैत १९, २०७६ २२:०४