लकडाउनका कारण मिथिलाञ्चलको चैती छठ प्रभावित

A+ A A-

लकडाउनका कारण मिथिलाञ्चलको महापर्व चैती छठ प्रभावित भएको छ ।

आज अस्ताउँदो सूर्यलाई अर्घदिने कार्यक्रम हुँदा पोखरीमा प्रहरीले कसैलाई आउन दिइरहेको छैन ।

सामाजिक दुरी कायम राखेर घर–घरमा मात्रै मनाउन सबैलाई आग्रह गरेको जिल्ला प्रहरी कार्यालय धनुषाका प्रहरी नायब उपरीक्षक रामेश्वर कार्कीले जानकारी दिए ।

अहिले पूजाभन्दा मानवता बचाउनु आवश्य रहेको उनले बताए । दर्जनौं पोखरीमा प्रहरी परिचालन दिएको छ ।

पोखरीहरुमा सुरक्षाकर्मी राखेपछि दर्जनौं व्यक्ति आ–आफनो घरमै छठ गर्ने तयारी गरिरहेका छन् । जनकपुरधाम–४ कि देवकी देवीले भनिन्, ‘के गर्ने पूजा छोड्न सकिँदैन घरको छतमै पोखरी जस्तो बनाएर छठ गरिरहेका छौं ।’

चार दिवसीय चैती छठको पहिलो दिन नुहाई खाई, दोस्रो दिन खरना, तेस्रोदिन अस्ताउदो सूर्यलाई अर्घ तथा चौथो दिन उदाउदो सूर्यलाई अर्घ दिएने परम्परा रहेको छ ।

छठ पर्व पोखरीमै हुने भएकाले यसअघिका वर्षहरुमा पोखरीहरुमा विशेष तयारी हुने गथ्र्यो । पोखरीमै पर्व भएकाले केही समयका लागि भएपनि पोखरीमा जान दिनुपर्ने जानकी युवा कमिटीका सल्लाहकार सुशील कर्ण बताउँछन् ।

उनले यससम्बन्धमा प्रमुख जिल्ला अधिकारीसँग पनि कुरो गरेका छन् । सबैले नगर्न भनेको बताउँदै उनले भने, ‘मिथिलाको संस्कृतिमाथि आक्रमण भएको छ ।’

जनकपुरधामको गंगा सागर, रुक्मीणी सर, धनुष सागर, अरगज्जा सागर, दशरथ तलाउ, रत्न सागर, भुतही पोखरीसहितका पोखरीहरु अहिले शान्त देखिएका छन् ।

छठमा केरा, भुसबा, ठकुवा, नरिवल, उखु, मुलासहित विभिन्न फलफूल लिएर भक्तजनहरुले सूर्यलाई अर्घ दिने गर्छन् ।

आदिकालमा सती अनुसुयाले रोग ग्रस्त पतिलाई निको होस् भनेर भगवान सूर्य र षष्टी देवीको पुजापाठ गरेकी थिइन् । त्यसैगरी महाभारत कालमा पाँच पाण्डवका द्रोपदीले कौरबलाई पराजित गर्नका लागि सूर्य देवको उपासना गरि छठ पर्व मनाएको पौराणिक कालमा उल्लेख रहेको छ ।

छठ पूजा गर्नाले दुःख कष्टबाट मुक्ति, सन्तान प्राप्ति, चर्मरोग निको हुने र पारिवारिक सुख शान्ति रहने जन विश्वास रहेको छ । छठ कातिक र चैत गरी दुई महिनामा मनाउने परम्परा रहेको संस्कृतिविद डा. भोगेन्द्र झाले बताए ।

प्रकाशित मिति: सोमबार, चैत १७, २०७६ ०९:२८