नर्सका दु:ख : हाम्रै सुरक्षा छैन, बिरामीले कसरी बाँच्ने आस गर्ने ?

A+ A A-

अहिले विश्व कोरोना भाइरस (कोभिड- १९)को महामारीसँग जुधिरहेको छ । धेरै राष्ट्र पूरै ‘लकडाउन’को अवस्थामा छन् ।

चीनपछि इटाली र स्पेन शोकमा डुबेका छन् । कोरोना भाइरसकै कारण यी २ मुलुकमा दैनिक ५ सयजनाभन्दा बढीले ज्यान गुमाइरहेका छन् ।

यसरी ज्यान गुमाउनेहरूमा कतिपय कोरोना भइरसका बिरामीको उपचार गर्ने डाक्टर र नर्सहरू पनि छन् ।

उच्च जोखिममा नेपाली स्वास्थ्यकर्मी

चीनको वुहानबाट फैलिएको कोभिड- १९ को उच्च जोखिमा नेपाल रहेको विश्व स्वास्थ्य सङ्गठन (डब्लुएचओ)ले घोषणा नै गरिसकेको छ ।

तथापि, नेपालमा अहिलेसम्म डब्लुएचओले भनेजस्तै कोरोनाका बिरामी देखिएका छैनन् । नेपालमा हालसम्म ३ जनामा मात्र कोरोनाको संक्रमण देखिएको छ, जसमध्ये १ जना निको भएर घर फर्किसकेका छन् भने २ जना उपचारका क्रममा छन् ।

सरकारले कोरोनाको महामारीबाट जोगिन देश १ साताका लागि लकडाउन गरेको छ ।

कोरोनाबाट सबैभन्दा बढी जोखिममा स्वास्थ्यकर्मीहरू डाक्टर र नर्सहरू देखिएका छन् ।

डाक्टर र नर्सहरूसँग कोरोनाबाट बच्ने पर्सनल प्रोटेक्टिभ इक्विपमेन्ट (पीपीई) नहुँदा उनीहरू उच्च जोखिममा रहेको कतिपय डाक्टरहरू नै स्वीकार गर्छन् ।

हालसम्म सरकारले राष्ट्रिय जनस्वास्थ्य प्रयोगशाला टेकुका स्वास्थ्यकर्मीबाहेक अन्य अस्पतालका स्वास्थ्यकर्मीलाई पीपीई उपलब्ध गराउन सकेको छैन ।

यसको सबैभन्दा ठूलो मारमा निजी अस्पतालहरू परेका छन् । निजी अस्पतालका एक डाक्टरले भने, ‘कोरोना भाइरस लक्षण देखिएका बिरामी अस्पताल आउँँछन् । उनीहरूलाई भर्ना गरेर राखौँँ, आफैँलाई जोखिम छ, भर्ना नलिए निजी अस्पताल उपचार गर्नबाट पन्छियो भन्छन् ।’

निजी अस्पतालहरूको छाता सङ्गठन ‘अफिन’का वरिष्ठ उपाध्यक्ष कुमार थापाले सुरक्षा सामग्री अभावले कोरोनाका बिरामीलाई उपचार सेवा दिन नसकिने यसअघि नै बताएका थिए ।

नर्सका दुःख

स्टाफ नर्सहरूका दुःख भने अस्पतालदेखि घरसम्मै छन् । कोरोनाका बिरामीबाट जोगिन अस्पतालले डाक्टरहरूलाई एक किसिमको र नर्सहरूलाई अर्कै व्यवहार गरेको गुनासो उनीहरूको छ ।

त्यसो त नर्सहरूलाई अस्पतालहरूले कम पारिश्रमिक दिएर बढी काम लगाउँदै आएका छन् । कोरोनाबाट जोगिनसमेत कुनै निजी अस्पतालले डाक्टरलाई पीपीई उपलब्ध गराउँदा नर्सहरूलाई मास्कसमेत उपलब्ध नगराएको दुखेसो उनीहरूको छ ।

निजी अस्पतालकी एक नर्सले भनिन्, ‘अहिलेसम्म अस्पतालले मास्कसम्म उपलब्ध गराएको छैन । हामी नै जोखिममा छौँँ, बिरामीले कसरी बाँँच्ने आशा गर्ने ?’

अस्पतालले पीपीई उपलब्ध नगराए नर्सहरूले काम गर्न सक्ने अवस्था नहुने उनको भनाइ छ । अस्पतालमा पीपीई नपाएर तनाव व्यहोरिरहेका नर्सहरूलाई छिमेकीले समेत अस्पतालबाट घर नफर्किन सुझाउने कीर्तीपुर घर भएकी एक नर्सको गुनासो छ ।

उता, सुदूरपश्चिम धनगढीका ३ वटा अस्पताल तथा नर्सिङ होममा कार्यरत नर्सहरूलाई त घरभेटीले कोठा छाड्न नै भनेका थिए ।

सेती प्रादेशिक अस्पताल, निसर्ग र माया मेट्रो अस्पतालमा कार्यरत नर्सहरूलाई डेरा गरी बसेका घरका घरधनीले कोठा छाड्न आग्रह गरेको सेती प्रादेशिक अस्पतालमा कार्यरत नर्सहरूको गुनासो छ ।

प्रकाशित मिति: बुधबार, चैत १२, २०७६ १५:४५