आज दिनभर : पूर्वडीआईजी नयाँ पार्टी खोल्दै, ओली वामदेवलाई पेल्दै

A+ A A-

आज १४ फागुनका नेपाली मिडियामा वामदेव गौतमलाई राष्ट्रियसभामा ल्याउने विषयले नै प्राथमिकता पायो भने भारतको नयाँ दिल्लीमा भड्किएको हि‌ंसाले पनि महत्त्व पायो ।

यसरी नै अनियमितता, वैदेशिक रोजगार, हिमपातलगायतका खबर पनि आज प्रमुख खबरका रूपमा रहे ।

...

सत्तारूढ नेपाल कम्युनिस्ट पार्टी (नेकपा)ले आफ्ना उपाध्यक्ष वामदेव गौतमलाई राष्ट्रियसभामा लैजाने निर्णय गरेको छ । उनलाई राष्ट्रियसभा सदस्य डा. युवराज खतिवडाको ठाउँमा मनोनीत गर्न लागिएको हो । खतिवडा अहिले अर्थमन्त्री छन् ।

गौतम राष्ट्रियसभामा प्रवेश गर्दैगर्दा खतिवडा थप ६ महिना अर्थमन्त्रीकै रूपमा रहन्छन् वा बाहिरिन्छन् भन्ने चासो चौतर्फी छ ।

...

हाल विश्वमा चीनको वुहानबाट सुरु भएको कोभिड कोरोना भाइरसको सङ्क्रमणको त्रासमा आमनागरिक छन् । यस भाइरसको सबैभन्दा ठूलो प्रभाव एसियाका देशमा पर्न थालेको छ ।

एसियाका धेरैजसो नागरिक रोजगारीको खोजीमा एक देशदेखि अर्को देश जान्छन् । चीनका नागरिक त झन् व्यापार, रोजगारी र अन्य पेसाका लागि एसियाका देशमा दैनिक आवतजावत गर्छन् । यसका कारण पनि कोरोना भाइरसको त्रासमा धेरै एसियाली नागरिक छन् ।

...

मंगलबार साँझ उत्तरी दिल्लीको हिंसाग्रस्त क्षेत्रमा केही व्यक्तिलाई भीडले घेरेको थियो । भीडका केही मानिस घेरिएका व्यक्तिको हातबाट मोबाइल खोस्ने प्रयास गरिरहेका थिए ।

घेरिएका ती व्यक्तिको मोबाइलमा मंगलबार उत्तरी दिल्लीमा भड्किएको हिंस्रक घटनाहरूको फुटेज थियो ।

...

स्थानीय तहका पदाधिकारी तथा सदस्यहरूले पाउने सुविधासम्बन्धी विधेयक र एकीकरण गर्न बनेको विधेयक, २०७६ प्रदेशसभामा लगिएको छ । संशोधन गर्ने गरी संसदमा लगिएको उक्त विधेयकमा ४० प्रतिशतसम्म सुविधा बढाउने प्रस्ताव गरिएको छ ।

...

प्रतिनिधिसभाको आजको बैठकको शून्य समयमा सांसद रेखा कुमारीले निवर्तमान सञ्चार तथा सूचना प्रविधिमन्त्री गोकुलप्रसाद बाँस्कोटाको अडियो प्रकारणमा छानबिन गर्न सरकारसित माग गरिन् ।

सांसद भवानीप्रसाद खापुङले भ्रष्टाचारमा संलग्न हुनेलाई कडा कारवाही गर्न जोड दिए । सांसद राजेन्द्रप्रसाद गौतम, रामबहादुर विष्ट र विमला नेपालीले नेपालको सिमाना क्षेत्र जोगाउन सरकारको ध्यानाकषर्ण गराए ।

...

प्रधानमन्त्रीसमेत रहेका सत्तारूढ नेपाल कम्युनिस्ट पार्टी (नेकपा)का अध्यक्ष केपी शर्मा ओलीले उपाध्यक्ष वामदेव गौतमलाई राष्ट्रियसभा सदस्य बनाउन अस्वीकार गरेका छन् ।

बुधबार बसेको सचिवालय बैठकले उपाध्यक्ष गौतमलाई राष्ट्रियसभा सदस्य बनाउने निर्णय गरेको थियो । उक्त बैठकमा ओली पनि सहभागी थिए ।

...

पूर्व प्रहरी नायव महानिरीक्षक (डीआईजी) रमेशप्रसाद खरेलको नेतृत्वमा नयाँ पार्टी खुल्ने भएको छ । खरेलले खोल्ने पार्टीको नाम ‘हाम्रो नेपाल, हामी नेपाली’ रहने जनाइएको छ ।

खरेलले निकै अघिदेखि नागरिकको हक अधिकारलाई केन्द्रमा राखेर भ्रष्टाचारविरोधी, सुशासन र राष्ट्रहितमा काम गर्ने बताउँदै आएका थिए ।

...

यही २८–२९ फागुनमा हुने नेपाल उद्योग वाणिज्य महासंघको निर्वाचनमा व्यवसायी चन्द्र ढकालले वरिष्ठ उपाध्यक्षका लागि उम्मेदवारी घोषणा गरेका छन् ।

आज काठमाडौंमा उनले आफ्नो उम्मेदवारी घोषणा गरेका हुन् । उक्त कार्यक्रममा पूर्वअध्यक्षहरू चण्डी ढकाल र सुरज वैद्या उपस्थित थिए भने प्रदेश १, गण्डकी, ५, कर्णाली र सुदूरपश्चिमका अध्यक्षको पनि उपस्थिति थियो ।

...

आज (बुधबार) बाट कोटेश्वर-सूर्यविनायक सडक खण्डमा चल्ने सवारी साधनको लेन परिवर्तन हुने भएको छ ।

उपत्यकाको सवारी आवागमनलाई सहजता ल्याउन तथा सवारी दुर्घटना न्यूनीकरण गर्ने उद्देश्यले कोटेश्वर–सूर्यविनायकको लेन परिवर्तन गरिएको महानगरीय ट्राफिक महाशाखाका प्रवक्ता प्रहरी उपरीक्षक (एसपी) जीवन श्रेष्ठले जानकारी दिए ।

...

म्याग्दीका उच्च पहाडी बस्तीहरूमा मङ्गलबार सातौँ पटक हिमपात भएको छ । सोमबार रातीदेखि भएको वर्षा र हिमपातका कारण जनजीवनका साथै विकास निर्माणका योजनाहरु प्रभावित भएका छन् ।

धवलागिरी गाउँपालिकाको गुर्जा, लुलाङ, मङ्गलाको टोड्के, झाँक्रीपानी, रघुगङ्गा गाउँपालिकाको रुइसे, भगवती, कुइनेमङ्गले, अन्नपूर्ण गाउँपालिकाको घोडेपानी, चित्रे, टिकोट, राम्चे लगायतका बस्तीमा हिउँ परेको छ ।

प्रकाशित मिति: बुधबार, फागुन १४, २०७६ २०:१५