पश्चिम सेती निर्माणको दबाब दिन १ लाख पत्र संकलन गरिँदै

A+ A A-

‘आश्वासनका २८ वर्ष: पश्चिम सेती कहिले बन्छ ?’ ‘हिजो आशा मर्‍यो, आज जवानी मर्दै छ, भोलि सपना मर्नेछ,’ लगायतका नारासहित प्रस्तावित ७५० मेगावाट क्षमताको पश्चिम सेती जलविद्युत् आयोजना निर्माणको माग गर्दै अभियान चलाइरहेको ‘बोलन्या थली’ धनगढीले प्रधानमन्त्री केपी शर्मा ओलीलाई १ लाख चिट्ठी बुझाउन पत्र संकलन गरिरहेको छ ।

बुधबार धनगढीमा ‘पश्चिम सेतीका लागि प्रधानमन्त्रीलाई १ लाख पत्र अभियान’ अन्तर्गत धनगढीको खुलामञ्चबाट अभियानको सुरुवात गरिएको छ । धनगढीको सन्तोषी टोल निवासी ८४ वर्षीय भोजबहादुर चन्दको पत्रबाट अभियानको शुभारम्भ गरिएको बोलन्या थली धनगढीका संयोजक यादव जोशीले जानकारी दिए ।

पश्चिम सेती आयोजना निर्माणका लागि दबाब दिन ‘बोलन्या थली’ धनगढीले सुदूरपश्चिम प्रदेशबाट १ लाखवटा पत्र संकलन गरेर प्रधानमन्त्रीलाई बुझाउने तयारी गरेको छ । पश्चिम सेतीबारे रचनात्मक विरोधस्वरूप आयोजना गरिएको कार्यक्रमबाट संकलन भएको ७५० पैसासहित ती पत्र बुझाउने तयारी गरेको संयोजक जोशीले जानकारी दिए ।

पश्चिम सेती निर्माणका लागि दबाब दिन प्रधानमन्त्री ओलीलाई सुदूरपश्चिमबाट आशा र सपनाका १ लाखवटा चिट्ठी बुझाउने अभियानको थालनी गरिएको उनले बताए । सेती आयोजना निर्माणका लागि दबाब दिन यसलगत्तै ७५० डोकासहित डोटीमा प्रदर्शन र ७५० नागरिक ७५० मिनेट अनशन बस्नेसमेत उनले बताए ।

यसअघि बोलन्या थलीले पश्चिम सेतीका लागि माइतीघर मण्डलामा कचौरा जुलुस, सुदूरपश्चिमबाट संघीय संसदमा प्रतिनिधित्व गर्ने १३ जना सांसदसँग छलफल कार्यक्रम गरिसकेको छ ।

साथै, बोलन्या थलीले नेपाली कांग्रेसका सभापति एवं पूर्वप्रधानमन्त्री शेरबहादुर देउवासँग भेट गरेर पश्चिम सेतीका लागि आवाज उठाउन आग्रह गरेको थियो । भेटमा देउवालाई अनुरोधपत्रसमेत बुझाइएको थियो । देउवाले पश्चिम सेतीबारे संसदमा कुरा उठाउने प्रतिवद्धता जनाएका थिए ।

पश्चिम सेतीका लागि मेराे पत्र

पत्रमा लेखिएको छ, ‘पश्चिम सेतीका लागि सम्मानीय प्रभानमन्त्री केपी शर्मा ओलीज्यू, सिंहदरबार काठमाडौं । विषयः पश्चिम सेतीका लागि मेरो पत्र । हामी यता निकाइ छौँ । तमी पन त्यता निकाइ होला भन्या मान्याका छौँ । तुहार स्वास्थ्य मजामा रहा शुभकामना बा! आज पत्र पठाउनुको खास कारण त केही थिएन । तर, विगत २८ वर्षदेखिका मेरा आशा र सपनाहरूले एैठन गर्यो र लेख्न पो बाध्य भए । सुदूरपश्चिम प्रदेशको गौरव आर्थिक–सामाजिक रुपान्तरणको वैवभ हाम्रो ७ सय ५० मेगावाटको पश्चिम सेती जलविद्युत् आयोजनाको निर्माण प्रक्रिया तत्काल अगाडि बढाउन अनुरोध गर्दछु । उही लिपुलेक, लिम्पियाधुरा र कालापानीको भूगोलबाट ।’

प्रकाशित मिति: बुधबार, फागुन १४, २०७६ १६:४४