नोकियाको सहकार्यमा १००जी अप्टिकल नेटवर्ककाे कार्य विस्तार

A+ A A-

केबल टेलिभिजन, इन्टरनेट र नेटवर्क सेवा प्रदायक कम्पनी सुबिसु केबलनेटले नोकियाको सहकार्यमा १००जी अप्टिकल नेटवर्कको कार्य विस्तार गरेको छ । नेपाल सरकारको ‘डिजिटल नेपाल’लाई लक्षित गर्दै यो कार्य सुरु गरिएको कम्पनीले बताएको छ ।

अप्टिकल नेटवर्कको कार्य विस्तारले सम्पूर्ण देशलाई नै सामाजिक एवं आर्थिक विकासतिर अग्रसर हुन टेवा पुर्‍याउउने कम्पनीको विश्वास छ ।

समयको माग र ग्राहकको स्तरीय सन्तुष्टिका निम्ति सुबिसुले अत्याधुनिक सेवाको सुरुवात गरेको हो । यसबाट उपभोक्ताले आफ्नो ब्याण्डविथ १जीबीपीएसम्म विस्तार गर्न सक्नेछन् । यसको थालनीसँगै उपभोक्ताले हाई स्पिड इन्टरनेट र हाई डेफिनिसन इन्टरनेट प्रोटोकलको सेवा लिन सक्नेछन् ।

कम्पनीका अनुसार नेपालका ११ वटा स्थानमा नोकियाको १८३० फोटोनिक सर्भिस स्विच, डेन्स वेभलेन्थ डिभिजन पल्टिप्लेक्सिङ तैनाथ गरिसकिएको छ । यसबाट ग्राहकको बदलिँदो माग पूर्ति हुनुका साथै सुबिसुले १००जी सर्भिस प्रदान गर्न सक्नेछ ।

नोकियाका बिनिस बाबाले यसबाट नेपालका ग्राहक एवं व्यवसाय सबैले फाइदा लिन सक्ने र नेपालको सञ्चार प्रविधिको क्षेत्रमा यो महत्त्वपूर्ण कदम रहेको बताएका छन् । यस कदमबाट सम्पूर्ण ग्राहक एवं व्यवसायले राम्रो प्रतिफल प्राप्त गर्ने कम्पनीले विश्वास लिएको छ ।

कम्पनीका प्रमुख कार्यकारी अधिकृत विनयमोहन साउदले यसको थालनीसँगै ग्राहकको बदलिदो मागलाई सजिलैसँग पूरा गर्न सकिने र आगामी दिनहरूमा पनि सेवा विस्तारमा कुनै समस्या नआउने उल्लेख गरेका छन् ।

प्रकाशित मिति: सोमबार, फागुन १२, २०७६ १५:२४