नेपाली सेनामा भर्नाका लागि मधेसी युवामा आकर्षण

A+ A A-

नेपाली सेनामा भर्नाका लागि बाराको जीतपुरस्थित ब्यारेकमा अहिले भीड लागेको देखिन्छ । ती भीडमा अधिकांश मधेशीहरु देखिने गर्छन् । मधेशहरु पहिला प्राविधिकतर्फ मात्रै सेनामा देखिन्थे अहिले जवान तर्फपनि आकर्षित हुन थालेका छन् ।

भर्नाका लागि जितपुरको गणमा प्रत्येक दिन दिने निवेदनमध्ये ७० प्रतिशत मधेशी युवा युवती नै रहने गरेको श्री नम्बर २८ बाहिनी गण जीतपुरका गणपति अनुपजंग थापाले बताए । सो गणको द्वारमा निवेदन केहीदिन देखि लिने गरिएको छ ।

‘म सैनिक बनेर देशको सेवा गर्न चाहन्छु,’ रौतहटको पिररिया बौधीमाई नगरपालिका–६ का सन्तोषकुमार यादवले बताए । उनले सेनामा छनौटका लागि केही महिनादेखि निरन्तर फिजिकल तयारी पनि गरिरहेका छन् ।

शरीर स्वस्थ भएका र एथलेटिकलाई प्राथमिकता दिइने गरिएको आफूलाई थाहा भएकाले बिहान घण्टौं तयारी गर्ने गरेको उनले बताए । गरौंडा नगरपालिकाका रामअधार कुमार दासले निकै उत्साहित भएर निवेदन दिएको बताए ।

आर्थिकस्थिति कमजोर भएकाले सेनामा काम गरेपछि आर्थिक अवस्थामा सुधार हुने आफूलाई विश्वास रहेको उनले बताए ।

युवाहरु मात्रै नभई कयौ मधेशी महिलाहरुपनि सेनामा जागिरका लागि निवेदन दिएका छन् । कलैया नगरपालिका २४ बनरवाकी सरिता कुमारीले देशको सेवा गर्नका लागि आफू सेनामा भर्ती हुन निवेदन दिएको बताइन् ।

सेनामा काम गर्नेलाई निकै सम्मानका साथ हेरिने गरेको फिल्ममा देखेपछि त्यसैबाट प्रभावित भएर निवेदन दिन आएको उनले शिलापत्रलाई बताइन । कतिले विद्यालय समयदेखि नै सेना बन्ने आकांक्षा बोकेको बताए ।

केहीदिन अघि सोही गणमा भएको सैनिक छनौट प्रतियोगितामा १३ महिला र १६६ पुरुष गरी १७९ जना छनौट भएका थिए । छनौट भएकाहरुको श्री नम्बर २८ बाहिनी गणमा तालिम चलिरहेको छ ।

छनौट प्रतियोगितामा गाउँमा दौड गराउनेका साथै सेनाद्वार सञ्चालित विद्यालय विद्यालय कार्यक्रमका कारण पनि मधेशी युवाहरु सेनाको जागिरतर्फ आकर्षित हुन थालेको श्री नम्बर २८ बाहिनी गणका गणपति थापाले बताए ।

नेपाली सेनाको देशभरी विद्यालयहरुमा कार्यक्रम चलिरहेको हुन्छ । सो कार्यक्रममा जाँदा सेनामा काम गर्न कसरी तयारी गर्नुपर्ने गणपति थापाले बताए ।

प्रकाशित मिति: आइतबार, फागुन ११, २०७६ १४:४९