आज दिनभर : वुहानबाट आएकामा देखिएन कोरोना, महराले खुलाएनन् जेल जानुको कारण

A+ A A-

आज ७ फागुनका नेपाली मिडियामा चीनको वुहानबाट ल्याइएका नेपालीमा कोरोना भाइरस नदेखिएको समाचार प्रमुख रह्यो भने रोजगारीको खोजीमा विभिन्न देश पुगेका ५ सय १३ जना श्रमिकले ज्यान गुमाएको खबर पनि आजका मिडियामा समेटियो ।

यसका अतिरिक्त पूर्वसभामुख महराले आफू बलात्कार अभियोगमा ३ महिनाभन्दा बढी जेल बस्नुपरेको कारण नखुलाएको तथा नेपाल राष्ट्र बैंकका गभर्नर नियुक्तिमा अन्योल पनि आजका मिडियामा प्राथमिकतामा परेका छन् ।

...

मुलुकमा अर्थ क्षेत्रको महत्त्वपूर्ण २ प्रमुख पद रिक्त हुने अवस्थामा छन्, एक अर्थमन्त्री र अर्को राष्ट्र बैंकका गभर्नर । अर्थमन्त्री डा. युवराज खतिवडाको सांसदको कार्यकाल आगामी २१ फागुनमा सकिँदै छ भने गभर्नर चिरन्जीवी नेपालको पदावधि पनि ५ चैतमा सकिँदै छ ।

...

आफूमाथि षड्यन्त्र भएको दाबी गर्दै आएका महराले किन र कसले त्यस्तो षडयन्त्र गर्‍यो स्पष्ट रूपमा भन्न चाहिरहेका छैनन् ।

यद्यपि, उनले कथामा भनेको हड्डीको विम्बात्मक संकेत अमेरिकी च्यालेन्ज कर्पोरेसन (एमसीसी) कम्प्याक्ट हो भनेर अन्दाज लाउनचाहिँ सकिन्छ । किनकि, महराले आफूले एमसीसी टेबुल गर्न रोकेको र यो पनि एउटा कारण रहेको बताएका छन् । अनि आफू जेल जानुमा आन्तरिक र बाह्य कारण रहेको पनि उनले दाबी गरेका छन् ।

...

आर्थिक वर्ष सुरु भएको ७ महिनामा ३ लाखभन्दा बढी नेपाली श्रमिक वैदेशिक रोजगारीमा विभिन्न देश पुगेका छन् । वैदेशिक रोजगार विभागको तथ्याङ्कअनुसार साउन मसान्तयता कामको खोजीमा ३ लाख १ हजार ६ सय ८७ जना श्रमिक विदेशिएका छन् ।

यस्तै, यस अवधिमा रोजगारीको खोजीमा विभिन्न देश पुगेका ५ सय १३ जना श्रमिकले ज्यानसमेत गुमाएको वैदेशिक रोजगार प्रवर्द्धन बोर्डले जनाएको छ ।

...

भारतको उत्तर प्रदेश प्रहरीकाे इन्काउन्टरमा दिल्लीका कुख्यात डन शिव शक्ति नायडू मारिएका छन् । भारतीय सञ्चार माध्यमका अनुसार मेरठको कङ्करखेडामा प्रहरीले नायडूलाई इन्काउन्टरमा मारेको हो ।

प्रहरी र गुण्डाहरूबीच मुठभेटका क्रममा भएको गोली हानाहानका कारण कङ्करखेडामा भागदौड मच्चिएको थियो । आधा घण्टासम्म गोली हानाहान भएपछि प्रहरीले दिल्लीका कुख्याद डन नायडूलाई मारेको हो । प्रहरीले नायडूलाई जिउँदो वा मारेर ल्याउनेलाई १ लाख रुपैयाँको पुरस्कार पनि राखेको थियो ।

...

प्रहरीले गुण्डागर्दीमा संलग्न भएको अभियोगमा सिन्धुपाल्चोकका पासलाल तामाङलाई पक्राउ गरेको छ । उनलाई महानगरीय अपराध महाशाखाको टोलीले आज काठमाडौंको जडीबुटीबाट पक्राउ गरेको हो ।

तामाङले सिन्धुपाल्चोकको बलेफी हाइड्रो पावरका ठेकेदारलाई हतियार देखाएर धम्की दिएको उजुरीको आधारमा पक्राउ गरिएको अपराध महाशाखाका प्रमुख वरिष्ठ प्रहरी उपरीक्षक (एसएसपी) सहकुल थापाले जानकारी दिए ।

...

चीनको वुहानबाट उद्धार गरी नेपाल ल्याइएका १ सय ७५ जना सुरक्षित रहेको स्वास्थ्य मन्त्रालयले जनाएको छ ।

वुहानबाट फर्किएका सबैको नाक र घाँटीभित्रका नमुनाहरू परीक्षण गरिएकामा सबैमा कोरोना भाइरस (कोभिड- १९) नभएको पुष्टि मन्त्रालयले गरेको हो । मन्त्रालयका प्रवक्ता महेन्द्रप्रसाद श्रेष्ठले राष्ट्रिय जनस्वास्थ्य प्रयोगशाला टेकुले गरेको परीक्षणका क्रममा सबैमा कोभिड- १९ नकारात्मक देखिएको बताए ।

प्रकाशित मिति: बुधबार, फागुन ७, २०७६ १९:३५