'कांग्रेस उपसभामुख माग्न कमण्डलु बोकेर आएको छैन'

A+ A A-

नेपाली कांग्रेसले उपसभामुख पदका लागि सत्तारुढ दल नेकपासँग ‘बार्गेनिङ’ नगरेको स्पष्ट पारेको छ । प्रतिनिधिसभाको सभामुखमा सत्तारुढ नेकपाका सांसद अग्निप्रसाद सापकोटा निर्विरोध निर्वाचित भएको घोषणा गर्नुअघि प्रतिनिधिसभा बैठकमा कांग्रेस सांसद डा. मीनेन्द्रप्रसाद रिजालले उपसभामुखका लागि कांग्रेस कमण्डलु बोकेर सदनमा प्रस्तुत नभएको बताएका हुन् ।

उनले सभामुख पद निर्वाचित गर्न यथेष्ट मत रहेको सत्तारुढ दल नेकपाले उम्मेदवार प्रस्तुत गरेको र सभामुख पद आफैँमा तटस्थ रहनुपर्ने भएकाले कांग्रेसले सभामुखमा उम्मेदवारी नदिने निर्णय गरेको बताए ।

पार्टीले गरेको निर्णय त्यति मात्रै भए पनि त्यसको व्याख्या र विश्लेष्ण बाहिर गलत तरिकाले भएको गुनासो गरे । संविधानमा सभामुखमा र उपसभामुख पद अलग अलग पार्टीका हुनुपर्छ भनेर लेख्दा कतैबाट खोजेर कुन दललाई दिँदा सत्तालाई सजिलो होला भन्ने आसयले संविधानमा नलेखेको रिजालले दाबी गरे ।

‘संविधानमा सभामुख र उपसभामुख पद अलग अलग पार्टीको हुनुपर्छ भन्दा त्यसको मर्म र भावनालाई प्रतिनिधित्व गरेको छ । त्यो मर्म र भावना सत्तारुढ दलले बुझ्ला, नबुझ्ला, बुझेर बुझ पचाउला र बुझ पचाउने काम नगर्ला, त्यो हाम्रो सरोकारको विषय होइन’, रिजालले भने ।

उनले कांग्रेस कमण्डलु लिएर उपसभामुख माग्न संसदमा प्रस्तुत नभएको भन्दै कांग्रेससँग उपसभामुख जिताउने मत नभएको र कमण्डलु लिएर सदनमा पनि नआएको बताए ।

‘हामीले संविधानबमोजिम सभामुख र उपसभामुख अलग अलग दलको हुनुपर्छ भन्दा अदालतमा रहेको मुद्दालाई प्रभावित गर्न खोजियो भनियो’, रिजालले भने, ‘अदालतलाई प्रभावित गर्न कांग्रेसले सक्दैनथ्यो, सक्नेहरूले केके गरे, त्यो सबै छर्लङ्ग छ ।’

नेपाली राजनीति र समाजमा महिला सशक्तीकरणको आवाजलाई कुनामा थन्क्याएर राख्न मिल्दैन भन्दै रिजालले सभामुख र उपसभामुख चयनमा लिएको बाटोले सत्तारुढ दलले पाठ नसिके पनि कांग्रेसले भविष्यमा राम्रो सन्देश पाएको जनाए ।

सभामुखको खोजी गर्दा सरकारको जन्म र मरणलाई हेरेर नहुने भन्दै रिजालले भोलि सभामुख हुने व्यक्तिले संसदीय सर्वोच्चतालाई कायम गर्न सक्ने कि नसक्ने महत्त्वपूर्ण भएको बताए ।

‘अग्निप्रसाद सापकोटामाथि व्यक्त भएका आशंकालाई तपाईंले भोलि कार्यसम्पादन गर्ने क्रममा सडकमा आएका आवाजलाई कसरी शान्त गर्दै जानुहुन्छ । त्यो तपाईंको परीक्षा हो’, चेतावनीपूर्ण शैलीमा सांसद रिजालले भने, ‘हिजो दुई पक्ष हुँदा एउटा पक्षमा भएका सापकोटा यो सभामा सबैको अनुहार बन्न सक्नुहोस् ।’

राजसंस्थाविरुद्ध आन्दोलनमा लाग्ने सहयात्रीहरूमध्ये केही आवाज बलियोसँग आएको भन्दै रिजालले भने, ‘भोलिको दिन विधिको शासनले चल्छ कि चल्दैन ? संविधानअनुसार मुलुक चल्छ कि चल्दैन ? लोकतान्त्रिक आवाज खुम्चन्छ कि खुम्चँदैन भनेर हेर्ने बेला आएको छ ।’

सापकोटालाई सभामुखमा प्रस्ताव गरेका नेकपा संसदीय दलका उपनेता सुवासचन्द्र नेम्वाङले ढिलै भए पनि संसदले सभामुखको रूपमा जीवनकालमा एउटा मिहिनेती, राम्रो शिक्षकको रूपमा भूमिका निर्वाह गरेका सापकोटालाई पाएको बताए । सापकोटाले सभामुखमा उम्मेदवारी दिँदा विकल्पमा कसैले उम्मेदवारी प्रस्तुत नगर्नुले सकारात्मक सन्देश गएको उनले बताए ।

सापकोटाको समर्थन सत्तारुढ नेकपाका सांसद ओनसरी घर्ती मगर, प्रमुख सचेतक देवप्रसाद गुरुङ र राजपाका सांसद लक्ष्मणलाल कर्णले समर्थन गरेका थिए । पूर्वसभामुख घर्तीले शान्ति प्रक्रिया र संविधान निर्माणमा सापकोटाले उल्लेख्य भूमिका खेलेको दाबी गरिन् ।

जनयुद्धमा परिवारका तीन सदस्य गुमाएका र आफैँ घाइते भएका सापकोटाको जीवन त्याग र समर्पणमा व्यतीत भएको भन्दै घर्तीले तटस्थ र सन्तुलित ढंगले सदनलाई अघि बढाउन सापकोटा सफल हुने विश्वास व्यक्त गरिन् ।

प्रकाशित मिति: आइतबार, माघ १२, २०७६ १८:४४