आज दिनभर : सिद्धबाबा भागे, मनाङे समातिए

A+ A A-

आज ९ माघका नेपाली मिडियामा राष्ट्रियसभा निर्वाचनले प्राथमिकता पायो । यससँगै सिद्धबाबालाई पुर्पक्षका लागि थुनामा राख्न आदेश दिएको तर उनी भागेको खबर पनि आजका मिडियाको राम्रै खबर बन्यो । यसका अतिरिक्त नेकपाका गुट र तिलागुफाकी उपमेयरको अमेरिका पलायन पनि आजका मिडियाम चर्चामा रहे ।

...

राष्ट्रियसभाको निर्वाचनमा प्रदेश २ बाट राजपा–नेकपा गठबन्धनको अन्यतर्फको उम्मेदवारमा मृगेन्द्रसिंह यादव विजयी भएका छन् । यादव ५ हजार ४ सय मत ल्याएर विजयी भएका हुन् ।

उनले भाइलाई पराजित गरे । प्रतिद्वन्द्वी अनिरुद्दसिंह यादव उनका भाइ हुन् । उनले ४ हजार ५ सय १२ मतभार पाए ।

...

उच्च अदालत विराटनगरले सिद्धबाबाका नामले चिनिएका कृष्णबहादुर गिरीलाई थुनामा राख्न आदेश दिएको छ ।

धरौटीमा छाड्ने जिल्ला अदालत मोरङको आदेश बदर गर्दै उच्च अदालत विराटनगरका मुख्य न्यायाधीश तिलप्रसाद श्रेष्ठ र प्रेमराज कार्कीको संयुक्त इजलासले गिरीलाई थुनामा राखेर मुद्दाको प्रक्रिया अघि बढाउन आदेश दिएकाे हाे ।

...

दन्ता अहिले दोस्रो पटक देशभर चर्चामा छन् । पहिलो पटक दन्ताको चर्चा उपमेयरमा विजयी भएपछि भएको थियो । उनी सबैभन्दा कान्छी उपमेयर थिइन् । उनी उपमेयरमा विजयी हुँदा २३ वर्षकी थिइन् । २ वर्षअघि भएको स्थानीय तह निर्वाचनमा विजयी हुँदा जति चर्चा पाएकी थिइन दन्ताले, अहिले पनि त्यति नै चर्चा भएको छ ।

...

धुम्बाराहीस्थित भवनका लागि नेकपाले मासिक मासिक २ लाख २५ हजार भाडा तिर्छ । अर्को नेकपाको पार्टी कार्यालय पेरिसडाँडामा जनवर्गीय संगठनका कार्यालय छन् ।तर पार्टीका शीर्ष नेताहरू भने निजी र सरकारी निवासबाटै पार्टी प्रवेशदेखि पार्टीका आन्तरिक गतिविधिहरू गरिरहेका छन् ।

...

नेपालमा अहिले कलाकारहरू सामाजिक सञ्जालमा कति ब्यस्त छन् अर्थात् कति समय सामाजिक सञ्जालमा व्यतीत गर्छन् ? भन्ने चासो सबैमा हुन सक्छ । केही घटना हुँदा तर्क–वितर्क गर्ने कलाकारको जमात पनि ठूलो छ ।

...

नेकपाका नेता नारायणकाजी श्रेष्ठ राष्ट्रियसभा सदस्यमा निर्वाचित भएका छन् । आज भएको मतदानमा श्रेष्ठ ३ हजार ४ सय ६२ मतभार ल्याएर विजयी भएका हुन् । उनका प्रतिद्वन्द्वी नेपाली कांग्रेसका उम्मेदवार सूर्यप्रसाद रेग्मीले २ हजार २ सय ४४ मतभार पाए । श्रेष्ठले गण्डकी प्रदेशको अन्य समूहबाट राष्ट्रियसभा सदस्यमा उम्मेदवारी दिएका थिए ।

...

गण्डकी प्रदेशका सांसद राजीव गुरुङ (दीपक मनाङे) कुटपिट अभियोगमा पक्राउ परेका छन् । उनलाई आज पोखराको लेकसाइडबाट प्रहरीले पक्राउ गरेको जिल्ला प्रहरी कार्यालय कास्कीका प्रवक्ता डीएसपी राजकुमार केसीले जानकारी दिए ।

प्रवक्ता केसीका अनुसार उनलाई कास्कीका एन्फा अध्यक्ष मिलन गुरुङले दिएको जाहेरीका आधारमा पक्राउ गरिएको हो । हाल सांसद मनाङेलाई जिल्ला प्रहरी कार्यालय कास्कीमा राखिएको उनले जानकारी दिए ।

...

भ्रष्टाचारसम्बन्धी सूचकांकमा नेपाल गत वर्षभन्दा ११ स्थान माथि उक्लिएको छ । गत वर्ष १२४औं स्थानमा रहेको नेपाल अहिले १ सय १३औं स्थानमा रहेको छ । यद्यपि नेपाल अझै पनि विश्वका भ्रष्टाचार व्याप्त मुलुकको श्रेणीमा छ ।

...

सन् २०१९ मा वैदेशिक रोजगारीमा कुवेत पुगेका ४२ जना नेपाली श्रकिमको मृत्यु भएको छ । मृत्यु हुने ४२ जनामध्ये ३१ जना पुरुष र ११ जना महिला श्रमिक रहेको कुवेतस्थित नेपाली राजदूतावासले जानकारी दिएको छ । दूतावासका अनुसार एकतिहाइभन्दा बढीले हृदयघातका ज्यान गुमाएका छन् । हृदयाघात भई मृत्यु हुने कामदारहरूको संख्या १५ रहेको छ ।

प्रकाशित मिति: बिहीबार, माघ ९, २०७६ २१:१४