आज दिनभर : कालापानीका फाैज फिर्ता लैजाऊ, वामदेवलाई नेता बनाऊ

A+ A A-

संसदको अन्तर्राष्ट्रिय सम्बन्ध समितिले लिम्पियाधुरा, लिपुलेक र कालापानी क्षेत्रबाट भारतीय सुरक्षा दस्ता फिर्ताको पहल गर्न सरकारलाई निर्देशन दिएको छ ।

शुक्रबार सिंहदरबारमा बसेको समितिकाे बैठकले सरकारलाई लिम्पियाधुरा, लिपुलेक र कालापानी क्षेत्रमा रहेका भारतीय सुरक्षा फौज फिर्ता गरी नेपालको भौगोलिक अखण्डताको रक्षा गर्न भारत सरकारसँग आवश्यक तहमा वार्ता गर्नेलगायतका पाँच बुँदे निर्देशन दिएको हो ।

...

नेपाली कांग्रेसका सभापति शेरबहादुर देउवाले बहुमतबाटै पार्टीका रिक्त विभाग गठनको तयारी गरेका छन् । उनले विधानमा व्यवस्था भएभन्दा बढी संख्यामा विभाग गठन गर्ने तयारी गरेका हुन् ।

पार्टीका रिक्त विभाग, कार्यसम्पादन समिति, नेतृत्वविहीन तथा म्याद सकिएका भ्रातृ संस्थासहित उपनिर्वाचनको समीक्षालगायतका विषयमा छलफल गर्न बोलाइएको केन्द्रीय समिति बैठकलाई संस्थापनइतर समूहले बहिष्कार गरेपछि देउवाले बहुमतबाटै विभाग बढाउने गरी बैठकमा ४१ वटा विभाग प्रस्ताव गरेका हुन् ।

...

उपत्यकामा सार्वजनिक जग्गा अतिक्रमणमा उच्चपदस्थ र जनप्रतिनिधिकै संलग्नता रहेको पाइएको छ ।

जिल्ला प्रशासन कार्यालय काठमाडौंमा जनप्रतिनिधि र उच्चपदस्थले नै सार्वजनिक जग्गा अतिक्रमण गरेको भन्दै हटाउन माग गर्दै उजुरी पर्ने क्रम ह्वात्तै बढेको छ ।

...

बालाजुस्थित विष्णुमती पुलको छेउमा सानो जंगल छ । कम्पाउण्ड वालले घेरिएको यो जंगल गुठी संस्थानको स्वामित्वमा छ ।

झण्डै ३५ रोपनी क्षेत्रफलमा फैलिएको जंगल छिर्ने मुख्य द्वार बालाजु नयाँ बजार सडकतिर फर्केको छ । मुख्य द्वारमा दुईवटा बोर्ड छन् । एउटा बोर्डमा लेखिएको छ– श्री गुरु नानक सिख फाउण्डेशन । अर्को बोर्ड छ– प्राचीन उदासीन श्री गुरु नानक मठ ।

दोस्रो बोर्डमा लेखिएको छ– तपोवन, शंखवन साधुकुटी । बोर्ड कसले राखेको हो, खुल्दैन तर सम्पर्क नम्बर भने छ ।

जग्गाको स्वामित्व गुठी संस्थानको हो । लामो समयदेखि भोगचलन भने प्राचीन उदासीन श्री गुरु नानक मठले गरिरहेको छ । प्रश्न उठ्छ, त्यसो भए सिद्धबाबा फाउण्डेशनको बोर्ड यहाँ कसरी राखियो ?

...

प्रेस काउन्सिलको शुद्धीकरण र पत्रपत्रिका वर्गीकरण खारेज गर्न माग गर्दै प्रेस काउन्सिल नेपालमा तालाबन्दी गरिएको छ । असन्तुष्ट पक्षले संघर्ष समिति बनाई काउन्सिलमा एक घण्टा धर्नामा बसेपछि ताला लगाइएको संघर्ष समितिका संयोजक दीपक पाण्डेले बताए ।

...

दुई दिने ग्लोबल अन्तर्राष्ट्रिय सम्मेलन काठमाडौंमा सुरु भएको छ । २१औं शताब्दीको नेतृत्व, दिगो विकास र उच्च शिक्षाका विषयमा छलफल गर्न सम्मेलनको आयोजना गरिएको हो ।

शुक्रबार उद्योग वाणिज्य तथा आपूर्तिमन्त्री लेखराज भट्टले सम्मेलनको उद्घाटन गर्दै देश विकासका लागि नयाँ नेतृत्व आवश्यक रहेको बताए ।

...

मदन भण्डारी मेमोरियल कलेजका विद्यार्थी चढेको बस दुर्घटनामा परेको छ । शुक्रबार कलेजबाट भक्तपुरको घ्याम्पेडाँडा पिकनिकका लागि जाँदै गरेको बा ५ख ४२८६ नम्बरको बस सडकमै पल्टेको हो । दुर्घटनामा २२ जना घाइते भएका छन् । घाइतेमध्ये दुई जना गम्भीर छन् ।

...

नाै सदस्यीय सचिवालयमार्फत पार्टीका सबै गतिविधि गर्दै आएको नेपाल कम्युनिस्ट पार्टी (नेकपा) एकीकरणको १४ महिनापछि समानान्तर तीन शक्ति केन्द्रमा रूपान्तरण हुँदै छ । एकीकरणलगत्तै प्रधानमन्त्रीसमेत रहेका केपी शर्मा ओली र पुष्पकमल दाहाल (प्रचण्ड)को संयुक्त नेतृत्वमा चल्दै आएको नेकपाले तेस्रो शक्तिका रूपमा नेतृत्वमा वामदेव गौतमलाई स्थापित गर्दै छ ।

...

पश्चिमी निम्न चापीय प्रणालीको प्रभावले आज देशभरको मौसम बदली भएको छ । आज पश्चिम तराईमा मेघ गर्जनसहित वर्षा भइरहेको छ भने उच्च पहाडी र हिमाली भेगमा हिमपात भइरहेको छ ।

देशका उच्च पहाडी भूभागमा आज दिनभर भारी हिमपातको सम्भावना रहेको जल तथा मौसम विज्ञान विभागले जनाएको छ ।

...

बलात्कार प्रयासको आरोपमा पक्राउ परेका नेपाल मेडिसिटी अस्पतालका डा. रोहितकुमार झा थुनामुक्त भएका छन् । जबर्जस्ती करणी उद्योगअन्तर्गत मुद्दा अघि नबढाउन सरकारी वकिलको कार्यालयले आदेश दिएको छ । झा बिहीबार नै थुनामुक्त भएका हुन् ।

जिल्ला सरकारी वकिलको कार्यालयले मिसिल अध्ययन गर्दा जबर्जस्ती करणी उद्योग नभई यौन दुर्व्यवहार भएको पाइएको भन्दै थुनामुक्त गर्न आदेश दिएको जनाएको छ ।

प्रकाशित मिति: शुक्रबार, मंसिर २७, २०७६ १९:३५