तीन गुणा कम भन्दै मुआब्जा लिन गएनन् स्थानीय

A+ A A-

बुढीगण्डकी जलविद्युत आयोजनाबाट प्रभावित गोरखा र धादिङमा बजार क्षेत्रको मुआब्जा निर्धारण गरे पनि स्थानीय बासिन्दा लिन गएका छैनन् । सरकारले तोकेको मुआब्जा चलनचल्तीको मूल्यभन्दा ३ गुणा सस्तो भएको भन्दै उनीहरूले मुआब्जा निर्धारणको विरोध गरिरहेका छन् ।

पछिल्लो पटक गत आइतबार दुवै जिल्लाका प्रमुख जिल्ला अधिकारीको नेतृत्वमा रहेको समितिले डुबानमा पर्ने क्षेत्रका जग्गाको मुआब्जा निर्धारणको निर्णय गरेको थियो ।

सरकारी समितिले गोरखाको आरूघाट बजार क्षेत्रमा प्रतिआना ७ लाख रूपैयाँदेखि प्रतिरोपनी ८ लाख रूपैयाँसम्म मुआब्जा निर्धारण गरेको छ । आरूघाट बजार क्षेत्रमा ९ सय ८९ जनाले मुआब्जा पाउनेछन् ।

गोरखाकै साविक थुमी गाविसमा भने प्रतिआना ५० हजार रुपैयाँदेखि १ लाख २० हजार रूपैयाँसम्म निर्धारण भएको छ, जहाँ ४३ जनाले मुआब्जा पाउने छन् । गोरखामा १ हजार ३२ जनाले ६ सय ९ रोपनी जग्गाको मुआब्जा पाउनेछन् ।

धादिङतर्फको साबिक सल्यानटार गाविसमा पनि प्रतिआना ७ लाखदेखि ८ लाख रूपैयाँसम्म मुआब्जा निर्धारण भएको छ। धादिङमा १ हजार १ सय ६१ रोपनी जग्गाको १ हजार ७ सय १६ जनाले मुआब्जा पाउनेछन् । गोरखा र धादिङमा गरी २ हजार ७ सय ४८ परिवारलाई अधिग्रहणमा परेको उनीहरूको १ हजार ७ सय ७० रोपनी जग्गाको मुआब्जा लिन आउनका लागि आयोजनाले सूचना निकालिसकेको छ ।

समितिद्वारा निर्धारण गरिएको दरमा चित्त नबुझाएका स्थानीयले गत सोमबार आरूघाट बजार बन्द गरेर विरोध जनाएका थिए ।
यसअघि सरकारले ४४ हजार ६ सय ५८ रोपनी जग्गाको २६ अर्ब ८५ करोड रुपैयाँ मुआब्जा बाँडिसकेको छ ।

बजार क्षेत्रको घरजग्गाको मुआब्जा निर्धारण नहुँदा बाँकीको पनि वितरणमा ढिलाइ भइरहेको थियो ।

प्रकाशित मिति: बिहीबार, मंसिर १९, २०७६ १५:३०