मापसे गरेर टिपर कुदाउँदा चार जनाको ज्यान गयो, घाइतेको २० घण्टापछि बल्ल उद्धार

मापसे गरेर टिपर कुदाउँदा चार जनाको ज्यान गयो, घाइतेको २० घण्टापछि बल्ल उद्धार

A+ A A-

बुधबार हुम्लाको सदरमुकाममा भएको टिपर दुर्घटनामा मृत्यु हुनेको संख्या चार पुगेको छ । मृत्यु हुनेमा नाम्खा गाउँपालिका–१, हेप्का गाउँका छिरिङ कर्मा तामाङ, नरी लामा, खार्पुनाथ–१ का बबरजंग शाही र सिमीकोट गाउँपालिका–६ का बक्त रोकायाको जिल्ला अस्पतालमा उपचारको क्रममा मृत्यु भएको छ ।

बुधबार दिउँसो २ बजे भएको टिपर दुर्घटनाका घाइतेलाई बिहीबार बिहान १० बजे थप उपचारका लागि नेपाली सेनाको हेलिकाेप्टरबाट नेपालगञ्ज पुर्‍याइएको प्रमुख रामप्रसाद घर्ती मगरले बताए । ‘अहिले मृतकको पोस्टमार्टम जिल्ला अस्पताल हुम्लामा भइरहेको छ,’ उनले भने, ‘घाइतेको थप उपचारका लागि नेपालगञ्जमा लगिएको छ ।’

यसरी भयो दुर्घटना

टिपर दुर्घटना हुनुकाे प्रमुख कारण चालकले मदिरा सेवन गर्नु रहेकाे प्रहरीले जनाएको छ । घटनाका विषयमा नेपाल प्रहरीले अनुसन्धान गरिरहेको हुम्ला जिल्ला प्रहरी प्रमुख राम मगरले बताए । ‘दुर्घटनास्थलको कच्ची सडक खण्डमा दुई पटक सडकको उत्तरी र दक्षिणी भागमा ट्रिपर ठोकिएको र तेस्रो पल्ट दक्षिणी भागको भिरालो खण्डमा खसेको पाइएको छ,’ उनले भने, ‘अनियन्त्रित तरिकाले कुदाएकै कारण दुर्घटना भएको हाे ।’

को को भए घाइते ?

घाइते हुनेमा नाम्खा गाउँपालिका–१ का नाम्गेल लामा, नातोक लामा, सिन्दार तामाङ, सिमकोट गाउँपालिका–६ का कपिल रोकाया, खगेन्द्र रावत, कमल रोकाया, सन्तोष सुनार, रामकुमार रोकाया, सिमकोट–७ का नर सुनार, खार्पुनाथ– ५ का धनसिंह भण्डारी, सर्केगाड गाउँपालिका–२ का अंग फडेरा र चालक आनन्द तामाङ छन् ।

उपचार सरकारले गर्ने

घाइतेहरूको उपचार कर्णाली प्रदेशले गर्ने जनाएको छ । कर्णाली प्रदेश सरकारका सामाजिक विकासमन्त्री दल रावलले घाइतेको उपचार कर्णाली प्रदेश सरकारले नै गर्ने बताए ।

घाइतेको उपचारका लागि नेपाल कम्युनिस्ट पार्टी (नेकपा) हुम्ला जिल्लाले एकमुस्ट १ लाख नगद सहयोग गरेको कर्णाली प्रदेश अध्यक्ष गोरखबहादुर बोगटीमार्फत जिल्ला समन्वय समितिका अध्यक्ष दानबहादुर रावतले बताए । त्यस्तै, कर्णाली प्रदेशका सामाजिक विकासमन्त्री दल रावलले १० हजार प्रदान गरेका छन् ।

प्रकाशित मिति: बिहीबार, मंसिर १२, २०७६ १४:१७