१२ करोडमा बनेकाे लिफ्ट खानेपानी आयोजनाको परीक्षण सफल

A+ A A-

जलजला गाउँपालिकाको वारीबेनीमा निर्माण भएको जिल्लाकै ठूलो ‘लिफ्ट’ प्रविधिको खानेपानी आयोजनाको परीक्षण सुरु भएको छ । सरकारको ७० र स्थानीयको ३० प्रतिशत गरी करिब १२ करोड ३० लाख लागतमा निर्माण भएको लिफ्ट खानेपानी आयोजनाको परीक्षण मंगलबारदेखि सुरु भएको उपभोक्ता समितिका अध्यक्ष लोकनाथ रेग्मीले जनाए ।

‘कालीगण्डकी किनारबाट रिजर्भ ट्याङ्कीसम्म पानी तान्ने उपकरणको परीक्षण सफल भयो,’ उनले भने, ‘मंगलबारदेखि वितरण र शाखा पाइपलाइनको परीक्षण शुरु गरेका छौँ, बगरफाँट क्षेत्रको मुख्य र वितरण पाइपलाइनको परीक्षण सकिएको छ ।’

पानी थिग्राउने पोखरी, वरीबेनी र लामाखेतको वितरण लाइन परीक्षण सफल भएपछि नियमित खानेपानी वितरण शुरु गरिनेछ । कालीगण्डकी किनारको जुगेधारामा प्रतिसेकेण्ड १२ लिटर पानी तान्ने क्षमताको समसिवल वयल पम्प जडान गरिएको छ ।

जुगेधाराको पानी १५० मिटर उचाइमा रहेको ट्याङ्कीमा विद्युतीय उपकरण प्रयोग गरेर पु¥याइएको छ । मुहानदेखि ट्याङ्कीसम्मको दूरी ७५० मिटर छ । मुहानमा पानी तान्ने सम्पवयल पम्प, पानी सङ्कलन गर्ने ट्याङ्की निर्माण भएको छ ।

चार लाख लिटर क्षमताको फेरो ट्याङ्की, दुईवटा पानी छान्ने र थिग्राउने पोखरी, कार्यालय भवन, मुख्य पाइपलाइन निर्माण गरिएको छ । १५ किलोमिटर मुख्य पाइप लाइन निर्माण भएको छ । पम्प, ट्याङ्की, भवन, पोखरी र मुख्य पाइप लाइन निर्माणका लागि चन्द्र एण्ड वसन्त एएम जेभीले १० करोड ३० लाखमा ठेक्का लिएको थियो ।

उपभोक्ता समितिसँग वितरण पाइप लाइनसहितको पूर्वाधार बनाउन दुई करोड १२ लाख रुपैयाँमा सम्झौता भएको थियो । सरकारको ७० र उपभोक्ताको ३० प्रतिशत लगानीमा विसं २०७४ कात्तिकदेखि खानेपानी डिभिजन कार्यालयले आयोजना निर्माण सुरु गरेको थियो ।

आयोजनाबाट जलजला गाउँपालिकाको २, ३ र ४ नं वडामा पर्ने बगरफाँट, वारीबेनी र लामाखेतका ५५ घरधुरी लाभान्वित हुने अध्यक्ष रेग्मीले बताए । प्रत्येक घरमा मिटरसहितको निजी धारा निर्माण भएको छ । घर–घरमा निजी धारामार्फत खानेपानी वितरण गर्ने व्यवस्था मिलाएको कोषाध्यक्ष बरुवालले बताए ।

प्रकाशित मिति: बिहीबार, मंसिर १२, २०७६ ०९:२३