व्यक्तिको घर बचाउन मन्दिरको फूलबारी मिचियो, ८५ लाखको चलखेल

A+ A A-

एकीकृत शहरी विकास परियोजनाअन्तर्गत जानकी मन्दिरवरिपरिको सडक विस्तारको नाउँमा अतिक्रमण गरिएको भन्दै फूलबारीको साविक क्षेत्रफल र सडकको नापी भएको छ ।

सडक विस्तारका क्रममा जनकपुरधामको प्रसिद्ध धार्मिकस्थल जानकी मन्दिरको प्राङ्गणभित्रको फूलबारी अतिक्रमण गरी जनकपुरधाम उपमहानगरपालिकाले रातारात जग्गा मिचेर सडक विस्तार गरेपछि चौतर्फी रूपमा विवाद सिर्जना भएको थियो । मन्दिरको जग्गा मिचेर केही व्यक्तिको घर बचाइएको थियो । बचाइएका घरहरूको करोडौंको जग्गा बचेको थियो । व्यक्तिको जमिन बचाएको सो घटनामा ८५ लाख रुपैयाँको खेल भएको जनकपुरधाम– ३ का वडाध्यक्ष दीपेन्द्र साहले आरोप लगाएका थिए ।

करिब ३ महिनापहिले उपमहानगरले रातारात अतिक्रमण गरेपछि प्रदेश २ को सरकारको निर्देशनमा नापी कार्यालयले छानबिन कार्य अगाडि बढाएको छ । स्थानीय युवाले फूलबारीको जग्गा मिचेको भन्दै दबाब दिएपछि प्रदेश सरकारले नापीका लागि निर्देशन दिएको थियो ।

जनकपुरधाम उपमहानगरपालिका तथा नापी विभागको संयुक्त टोलीले जानकी मन्दिर प्राङ्गणभित्रको फूलबारी बुधबार नापी गरेको छ । नागरिक समाज र जनप्रतिनिधिको रोहबरमा गरिएको नापीमा जानकी मन्दिरको फूलबारी अतिक्रमण गरिएको पाइएको अमिनहरूले आफ्नो प्रतिवेदनमा उल्लेख गरेका छन ।

कुल ३ कट्ठा १० धुर क्षेत्रफलमा रहेको फूलबारीको जमिन अतिक्रमण भएको पाइएको छ । नापीमा सहभागी नागरिक समाजका मुरली मनोहर मिश्रका अनुसार फूलबारीको दक्षिण पूर्वी कुनामा ११ फिट, फूलबारीको सडकतर्फको बीच भाग २.३ फिट र उत्तर पूर्वको कुनातर्फ १० फिट जग्गा अतिक्रमण गरिएको छ ।

नापी विभागको नक्साअनुसार सि.नं. १३५५–८४ र कित्ता नम्बर ८ मा रहेको यो फूलबारीको क्षेत्रफल ३ कट्ठा १० धुर रहेको छ ।

फूलबारीको अतिक्रमण गरिएको भन्दै राजपा नेपालबाट निर्वाचित जनकपुरधाम– ३ का वडाध्यक्ष दिपेन्द्र साह र वडा नम्बर ४ का वडाध्यक्ष सुदर्शन सिंहले जनकपुरधामका मेयर लालकिशोर साहको विरोध गरेका छन् ।

एसियाली विकास बैंकको सहयोगमा निर्माणाधीन सडकको निर्माण कार्यका क्रममा जानकी मन्दिरको फूलबारीलाई अक्रिमण गरी बाटोमा परेका घरहरू जोगाउनका लागि जानकी मन्दिरवरिपरिका होटल व्यवसायीले ८५ लाख रुपैयाँ दिएको भन्दै युवाहरूले निर्माण कार्यको विरोध गरेका छन् ।